Orientación

BECAS MINISTERIO DE EDUCACIÓN CURSO 2024-25.

(2-04-2024)

Informamos que xa saíu publicada a convocatoria de becas MEC (Ministerio de Educación) de carácter xeral para o vindeiro curso 2024-25 dirixidas ao alumnado de ensinanzas postobrigatorias (Bacharelato, FP básico, medio, superior…).

Normativa: Resolución da Secretaría de Estado de Educación, pola que se convocan becas de carácter xeral para o curso 2024/25 para estudantes que cursen estudos postobrigatorios.

Enlace a información sobre becas:

https://www.educacionyfp.gob.es/prensa/actualidad/2024/03/20240315-convocatoriabecas.html

Prazo de presentación de solicitudes: do 19 de marzo ao 10 de maio (ambos incluídos)

Forma de presentación: O procedemento é electrónico e iníciase coa solicitude que debe facerse na sede electrónica da páxina web do Ministerio debendo incluírse un enderezo de correo electrónico que vaia estar operativo durante todo o proceso, para recibir os avisos de notificacións (requirimentos; comunicacións, propostas, resolucións...); tamén deberán conservarse as chaves de acceso iniciais para que, en calquera momento, poidades entrar no voso expediente e consultalo.

Enlace á sede electrónica do Ministerio: 

https://sede.educacion.gob.es/portada.html

INFORMACIÓN SALIENTABLE:

-O número de conta que poñades na beca ten que estar como titular ou cotitular o estudante.

-Despois de cubrir a solicitude tede en conta que só queda presentada cando vos deixa xerar o xustificante de presentación que debedes conservar e ler para saber se tedes que presentar documentación adicional no voso caso (padrón, sentenzas...). Isto é moi importante, moitas becas quedan denegadas na primeira fase por non xustificar datos.

-A fase inicial adoita rematar a mediados de xullo; despois cruzaranse os datos económicos co Ministerio de Facenda e recibiredes ao longo do verán a notificación de se cumprides ou non os requisitos económicos. Debedes consultar o voso correo (introducido na solicitude) para ver se tedes notificacións ou acceder (coas vosas chaves) ao voso expediente para comprobalo.

Para calquera dúbida podedes consultar no Departamento de orientación.

CHARLA PREVENCIÓN DE DELITOS SEXUAIS E DELITOS DE ODIO.

(19-03-2024)

O Departamento de orientación ten entre as súas funcións colaborar no crecemento persoal do alumnado (a nivel social, emocional…) e axudar no desenvolvemento dos denominados elementos transversais, como poden ser a educación para a convivencia e a educación para a saúde. En relación con estas dúas, e, contando coa colaboración da Garda Civil (dentro do Plan director de formación en centros educativos), o alumnado de 3° e 4° da ESO asistiu no día de hoxe a dúas charlas formativas. Por un lado, sobre para a prevención dos delitos de odio e por outra parte sobre a prevención de delitos sexuais.

Na primeira das charlas abordáronse temas como o racismo, a xenofobia, a homofobia, transfobia… o odio ao diferente. Tamén se analizou o que implican os delitos de odio (ao diferente) tanto a nivel penal e xudicial como a nivel persoal.

Na charla sobre delitos sexuais, que resultou moi interesante para o alumnado saíron cuestións como as agresións sexuais (que son, que implican para vítima e agresor, consecuencias penais para o agresor e psicolóxicas para a vítima, o papel de vítima e agresor nas agresións sexuais), o consumo de pornografía, a educación sexual, a sexualidade, o consentimento nas relacións sexuais e afectivas, as relacións sexuais sanas, que se entende por delitos sexuais, a difusión de imaxes doutras persoas, menores, etc.

Ben seguro que estas charlas proporcionaron ao noso alumnado unha unha información valiosa para entender mellor estas realidades e problemáticas sociais e lles axudarán a reflexionar ao respecto das mesmas.

ORIENTACIÓN PROFESIONAL LIBRE DE ESTEREOTIPOS.

(06-03-2024)

O CPI Ramón Piñeiro ven de ser admitido para participar no programa "Que non te líen, ti elixes", que ten como finalidade favorecer a orientación vocacional libre de estereotipos na elección de itinerarios formativos, especialmente nos ciclos de formación profesional con menor presenza de mulleres. En definitiva, trátase de ofrecer dende o centro educativo unha igualdade de oportunidades entre mulleres e homes na orientación profesional e vocacional, con especial atención ao incremento da presenza de alumnas en estudos do ámbito das ciencias, tecnoloxía, enxeñaría, artes e matemáticas, así como nas ensinanzas de formación profesional con infrarrepresentación feminina. Con este fin realizaránse diferentes charlas no centro educativo dirixidas ao alumnado de 3º e 4º da ESO. 

OBRADOIRO DE PREVENCIÓN DO CONSUMO DE DROGAS.

(22/04/2022)

A escola ten demostrado ser un contorno ideal para a posta en práctica de actuacións preventivas que eviten ou diminúan a probabilidade de aparición de problemas futuros (a nivel persoal e/ou social). Neste sentido, unha das finalidades da educación é a formación integral do alumnado, favorecendo o seu desenvolvemento cognitivo, afectivo, social e físico. A esta finalidade contribúen as áreas, pero tamén os denominados temas transversais, entre os que se atopa a "educación para a saúde";entendida como un proceso de formación da persoa enfocado a adquisición de coñecementos e hábitos que promovan a defensa da saúde individual e colectiva. Dentro da educación para a saúde, a prevención no consumo de drogas é unha das áreas de referencia no traballo con población adolescente. Unha das maneiras de desenvolver na práctica os contidos propios da educación para a sáude é acción titorial.

O Departamento de orientación, ten entre as súas funcións apoiar iniciativas e actuacións en relación coa acción titorial. Así as cousas, contado coa colaboración da da asociación "Bordón sarriao", desenvolveuse un obradoiro sobre a prevención do consumo de drogas, entre o alumnado de 5º e 6º de educación primaria e de 3º e 4º da ESO. Durante estas charlas abordáronse temáticas como o tabaco, o alcol e os seus efectos na saúde. Unha das actividades que máis entusiasmou ao alumnado foi poder experimentar (cunhas gafas de recreación virtual) os efectos do alcohol sobre o equilibrio e as facultades mentais e físicas, instando a reflexionar sobre como pode afectar esta droga na conducción ou na nosa vida diaria.

O alumnado experimenta coas gafas de recreación virtual como inflúe estar "baixo os efectos do alcol" no equilibrio no clásico xogo de "rayuela".