SOLIDARIEDADE EN PROL DE LA PALMA
Comezado este novo curso sorprendeunos a noticia da erupción do volcán en La Palma. Estes acontecementos xeraron curiosidade nas aulas e en nós mesmos o que nos levou a estudar sobre o tema. Iniciada a investigación atopámonos con que o máis afectado é o lado humano. Por iso, dende o centro educativo queremos involucrar ao noso alumnado na actualidade traballando a solidariedade a través do Aprendizaxe Servizo.
Tralos faladoiros desta semana descubrimos que nós tamén podemos axudar. E, de que maneira?
Unha, enviando palabras de ánimo aos habitantes de La Palma usando as nosas mellores ferramentas: a nosa lingua e noso corazón.
E dúas, solicitando a colaboración da comunidade educativa de Forcarei e facendo unha recollida de produtos básicos ou de primeira necesidade tales como comida (enlatados, para bebés, aceite, alimentos non perecedoiros,...), toallas, mantas, produtos de hixiene, material escolar,.... Poderanse depositar no centro dende hoxe ata o luns 4 de outubro. Recordamos que esta recollida está aberta a calquera membro da comunidade que queira axudar e que se solidarice coa situación de La Palma.
Todo o recadado enviarase por correo postal a La Palma grazas á campaña impulsada pola asociación de comerciantes Zona Monumental de Pontevedra.
Esperamos a vosa colaboración e recordade que,
“Moita xente pequena, en lugares pequenos,
facendo cousas pequenas, poden cambiar o mundo”.
Eduardo Galeano
Equipo de Dinamización da Lingua Galega, equipo de actividades complementarias extraescolares e equipo de biblioteca do CEIP Nosa Señora das Dores.