A Concellería de Benestar Social, xunto coas entidades que forman parte do grupo de traballo de infancia, adolescencia e familia (impulsado por esta propia área municipal), puxo en marcha o segundo trimestre de 2020 unha Escola de Familias, na que se abordou a prevención de condutas aditivas, tanto de substancias habituais, como outras que, ademais, se incrementaron durante a etapa de confinamento (xogos de azar -apostas sobre todo-, consolas ou pornografía). Dita escola tivo un carácter de experiencia piloto e, tanto pola participación como polos contidos abordados, foi un éxito. Así as cousas, o ano pasado ampliamos esta Escola a todo o curso, constituindo a ESCOLA DE FAMILIAS MUNICIPAL, e desenvolvimos, a maiores do indicado, un módulo sobre a importancia da sexualidade da xuventude e un terceiro sobre educación en diversidade.
Á vista dos resultados obtidos, este curso abordaremos, novamente, a prevención de condutas aditivas, a sexualidade na xuventude e, como módulo novo, o acoso escolar. As sesións serán os mércores, como sempre, pero mudamos de espazo para facilitar o acceso a un maior número de familias: salón de actos da Casa Solidaria (rúa Velázquez). os días 26 de outubro e 2, 9, 16, 23 e 30 de novembro de 2022 en horario de 17:00 a 18:30 horas.
Se estades interesad@s en participar, podedes inscribiros na asociación Asfedro a través do correo electrónico: prevencionasfedro@gmail.com, antes do día 21 de outubro de 2022, adxuntando: Nome e apelidos, número de fillos/as e idade dos mesmos/as, teléfono de contacto e dirección de correo electrónico, ou ben acceder ao formulario de Google no seguinte enlace https://cutt.ly/8Bwr6u5
Para máis información, podedes chamar á entidade Asfedro (981372112), e preguntar pola técnica de prevención. Como na edición anterior, dirixímonos a vós, centros escolares e ANPAS, para pedir a vosa colaboración. Por iso, ademais desta carta, mandamos o programa do primeiro módulo e a ficha de inscripción para que, se é posible e como xa vos adiantamos a través de Asfedro, a difundades entre o alumnado e as súas familias.
Agradezo a vosa colaboración e quedo ao voso dispor para resolver calquera dúbida que xurda ao respecto.
Recibide un cordial saúdo,
Eva Martínez Montero
Concelleira de Benestar Social e Patrimonio Histórico
MÁIS INFORMACIÓN NO ARQUIVO ADXUNTO