O luns da pasada semana, 13 de novembro, chegou Exeria para explicarnos detalles da súa viaxe e para convidarnos a seguir camiñando con ela polo seu libro, camiño das palabras...

O alumnado de 1º de Bacharelato tivo a oportunidade de charlar con Marisa Vidal Collazo, autora de Eu son Exeria, lectura feminista dunha viaxe no século IV, sobre a vida desta interesante muller pioneira do seu tempo.

Grazas, Marisa, pola túa visita.

O club de lectura do alumnado de Bacharelato e profes despídese por este curso 22/23 coa lectura da peza teatral As alumnas, de Paula Carballeira. Volveremos en setembro con novas lecturas!

Feliz verán a toda a comunidade educativa!

Para despedir o curso 22/23, o noso Club de lectura da ESO xunto co Club de lectura do CEIP Fermín Bouza Brey mantiveron un pequeno encontro a carón do río, no que compartiron lecturas e unha pequena sesión de convivio. Agardamos que fose unha xornada interesante e que volvan o vindeiro curso con ganas de seguir vivindo aventuras a través das lecturas!

No IES Val do Tea celebramos as Letras Galegas os 365 días do ano!

E con motivo deste 17 de maio, 60º edición do Día das Letras Galegas, non esquecemos conmemorar a figura de Francisco Fernández del Riego, grande intelectual e defensor da lingua e a cultura galega (e fundador ademais da celebración do Día das Letras Galegas!). 

"Na lingua, sáibano ou non os indiferentes, está o máis íntimo e san do noso espírito". Francisco Fernández del Riego.

Este 24 de abril celebramos o Día do Libro! 

O EDLG, como vén facendo nos últimos anos, organizou un amig@ invisible entre o alumnado de 2º Bacharelato e o profesorado que tivo unha moi boa acollida e no que se agasallaron lecturas realmente interesantes!

Ademais, desde a Biblioteca organizouse un pequeno posto de intercambio/agasallo de libros no que podedes coller o libro que vos apeteza ler, do mesmo xeito que compartir aquel que teñades por casa e xa non precisedes, para que outra persoa teña ocasión de lelo. A que agardades para pasar por el?!

"Para viaxar lonxe, non hai mellor nave ca un libro", Emily Dickinson.

Neste Día do libro, alumnado e profesorado do IES Val do Tea compartimos convosco unha serie de recomendacións que podedes atopar na nosa Biblioteca.

Por 365 días de boas lecturas!

Nunha nova sesión do Club de lectura de profesorado e alumnado de Bacharelato tivemos a ocasión de comentar a novela Circe ou o pracer do azul, de Begoña Caamaño. Unha novela que nos permitiu falar de mitos e de feminismo, achegándonos ao mito da Odisea, e do tan recoñecido Ulises, desde o punto de vista das mulleres da historia, tantas veces relegadas a un segundo plano, Circe e Penélope. 

Vémonos en xuño cunha nova lectura! 

Neste mes de marzo estase a desenvolver unha exposición de poesía no eirado e nas árbores medraron follas e poemas.

Desde o día 21 ata o 27 celebramos no instituto a Poesía e o Teatro. Primeiro convocounos, de sorpresa, a poesía. O mércores 22 Leti Breijo, Arancha Nogueira e o chío dun paxaro entraron nas aulas de 3º da ESO, sen previo aviso, e con dozura e arroubo para recirtar os seus versos. Quince minutos de poesía condensada. Ademais, ao longo da semana, os alumnos e alumnos do citado nivel recibiron audios de poemas recitados e creados polos integrantes do obradoiro de poesía “Arquitecturas do poema” desenvolvido pola editorial Apiario. Rematamos a semana “turrando polo poema como por un becerro”, xa que venres tivemos a sorte de ter no centro a Olga Novo, Premio Nacional de Poesía 2022 polo seu poemario FelizIdade, libro que lemos este mes no Club de lectura de familias. Arredor da súa poesía e dun venres fermoso, “aprendemos a ladrar”.

E para poñer fin ás actividades poéticas destes días, tivemos un encontro poético e on line con Dores Tembrás, que falou coa rapazada de 3º da ESO (con elegancia e cariño) do feito poético e do oficio de escribir versos, que é seu.

Está claro que nos gusta celebrar, por iso, non quixemos esquecernos do teatro e da súa festa. Para poñer en valor a súa importancia, lemos, cos versos de Olga Novo, o texto dramático “O senso da floración” da dramaturga Laura Porto, ex alumna do centro, e lectora de Olga Novo. Por iso as fixemos coincidir no tempo e na literatura e tamén asistiu ao encontro do venres. Di Laura que “O senso da floración” foi escrito con Olga Novo. Del bebeu e nós quixemos achegarnos ás dúas autora simultanemente. O teatro saíulle ao encontro á poesía.

Que gusto facelas coincidir esta semana no noso insti!

Foi un gusto verdadeiro recibirvos ás catro. Grazas por deixardes aquí as vosas miradas.