Durante o mes de xaneiro, na etapa da ESO tivemos unhas titorías moi especiais, impartidas polo alumnado de 2º curso do ciclo medio de Atención a persoas en situación de dependencia.

Estes compañeiros/as, estiveron a traballar os estilos de comunicación (asertivo, agresivo e pasivo) no módulo de Destrezas Sociais, e despois de traballalo na súa aula, transmitiron os seus coñecementos e formaron á rapazada da ESO nas sesións de titoría. Para elo, deseñaron uns robots con cartón, cada un dos cales representaba un estilo de comunicación, e organizáronse en grupos de traballo. Presentaron ós seus compañeiros/as máis novos os robots e os distintos estilos de comunicación, e posteriormente cada alumno/a debía escribir unha situación e introducila no robot correspondente, segundo fora unha situación de estilo pasivo, agresivo ou asertivo. O alumnado do ciclo foi lendo cada unha das situacións e comentando cos rapaces/as da ESO o tipo de estilo empregado e o xeito adecuado de actuar en cada unha delas, transformando as situacións nas que se actuou de xeito pasivo ou agresivo, en modo asertivo.

Motivouse a aprendizaxe de habilidades sociais mediante o intercambio de ideas e a reflexión, facendo consciente ós compañeiros/as máis novos/as da importancia do diálogo e o respecto nas relacións sociais, sendo o estilo asertivo o modelo óptimo de comunicación.

Comezamos o ano coa visita do cabo Ramón Fdez., da Garda Civil, que falou ós rapaces e rapazas da Formación Profesional Básica e de 2º e 3º da ESO, da importancia de facer un uso responsable das novas tecnoloxías e redes sociais.

Sen dúbida, os xeitos e formas de relación van mudando, e as novas tecnoloxías xogan un papel central en todo este cambio, pero tamén é certo que entrañan riscos dos cales moitas veces os máis novos non son conscientes. Ciberbullying, grooming, sexting, sextorsión....son algúns dos perigos nos que a rapazada se poden ver envoltos se non son prudentes na utilización destes medios. Nalgúns casos, o comportamento que teñamos na rede, mesmo pode ser constitutivo dun delito sen sabelo. Así, faise primordial facilitar información a modo de prevención e co fin de garantir un uso responsable e crítico das novas tecnoloxías.

No mes de decembro, o centro ACODE impartiu un obradoiro práctico de varias sesións de duración ó alumnado de 1º e 2º do ciclo básico de Servizos Administrativos.

O obradoiro, que leva por nome “Encantado de coñecerme”, trata de favorecer a motivación do alumnado, traballando cuestións como o autocoñecemento, autoestima, cohesión grupal, resolución de conflitos, habilidades sociais e estilos de comunicación.

O programa, especialmente pensado para alumnado de ciclos básicos da formación profesional, potencia a conciencia das capacidades propias no alumnado, partindo do enfoque de intelixencias múltiples e mediante o emprego de dinámicas grupais que favorecen unha aprendizaxe activa e construtiva.

Sen dúbida, unha boa iniciativa de empoderamento, válida para que o alumnado aprenda a valorarse e detectar as súas fortalezas, máis aló do meramente académico, dotándoo á vez de estratexias para enfrontarse ás adversidades, ó tempo que se favorecen as relacións interpersoais positivas baseadas no respecto e comunicación. 

No mes de novembro recibimos a visita de persoal da Asociación Amarai. Situada na Arzúa, a asociación foi fundada no 1997 por un grupo de persoas con discapacidade e os seus familiares, e ten como misión loitar pola plena inclusión das persoas con discapacidade en tódolos ámbitos da sociedade, a través da defensa e promoción dos seus dereitos, da reivindicación do cambio social e da prestación de servizos que satisfagan as súas necesidades e expectativas.

Dentro do amplo abanico que abrangue a discapacidade, inclúese a discapacidade física, en moitos casos provocada polas lesións medulares, aspecto no que se centraron Jaime, fisioterapeuta, e Mario, membro da Xunta Directiva de Amarai.

Leváronse a cabo tres charlas, dirixidas a alumando de 4º da ESO por un lado, alumnado de Formación Profesional Básica e ciclo medio de Soldadura e Caldeiraría por outro, e alumnado do ciclo medio de Atención  a persoas en situación de dependencia por outra banda. Na actividade, Jaime presentou inicialmente ó alumnado o centro de Amarai e os seus servizos, para abranguer posteriormente cuestións relativas ás lesións medulares e ás súas consecuencias, entre elas, a discapacidade física. Os asistentes puidemos coñecer cuestións como os diferentes tipos de afectación (paraplexía, hemiplexía, tetraplexía) en función da zona ou altura na que se sitúa a lesión medular, medios técnicos de axuda á mobilidade ou a importancia das terapias de rehabilitación.

Tendo en conta que as lesións medulares son consecuencia en moitos casos dunha imprudencia, como por exemplo accidentes por exceso de velocidade ou condución baixo efecto de sustancias, accidentes de moto sen empregar o casco ou elementos protectores pertinentes, inmersións perigosas...é preciso concienciar á xuventude para promover comportamentos responsables e previr este tipo de lesións. No caso do alumnado do ciclo de Atención a persoas en situación de dependencia, e pola transcendencia que ten no seu futuro desempeño laboral, a actividade xirou ademais entorno á atención profesional ás persoas afectadas con lesións medulares.

A actividade rematou nos distintos casos coa presentación por parte de Mario da súa propia experiencia persoal, como persoa que sofre unha lesión medular, sen dúbida, un exemplo de superación!

No mes de novembro, o alumnado de 2º da ESO tivo unha sesión de titoría impartida por Melisa, psicóloga e sexóloga do centro ACADAR (Asociación de Mulleres con Discapacidade de Galicia).Na sesión abordouse a igualdade de xénero e discapacidade.

Se as mulleres se teñen que enfrontar no seu día a día a múltiples dificultades e desigualdades polo feito de selo, isto aínda é máis acusado no caso das mulleres que ademais sofren algún tipo de discapacidade. En ACADAR loitan pola defensa dos dereitos destas mulleres en tódolos ámbitos, concienciando tamén á sociedade e neste caso ó noso alumnado.

No mes de novembro e coincidindo coa proximidade da conmemoración do Día Internacional contra a Violencia de Xénero, o alumnado de 3º e 4º da ESO e 1º e 2º de Formación Profesional Básica, recibiron unha charla sobre violencia de xénero encamiñada á prevención e sensibilización sobre a mesma.

A charla foi impartida por persoal especialista da Garda Civil, concienciando ó alumnado sobre a escalada da violencia, causas e consecuencias.