Estimadas familias:

Unha das nosas celebracións do curso é o Día Escolar da Non Violencia e a Paz, recoñecido pola UNESCO dende 1993.

Coma presentación do mural realizado nestes días, alumnado de todos os cursos fixeron un recitado de poemas para concienciar da necesidade dunha educación para a tolerancia, a solidariedade e baseada nos respecto aos Dereitos Humanos.

Achegamos un breve vídeo desta xornada ("Click" na imaxe). Esperamos que vos guste.

(Aviso: Houbo un problema técnico coa participación de 5ºA, polo que o luns haberá que repetila e darlle mellor ao botón de gravar).

Recibide un cordial saúdo,

O equipo docente do CEIP P. Froebel

Estimadas familias:

Na situación actual, de alta transmisión da Covid pero cuns índices de contaxio dentro dos centros educativos moi inferiores ao resto de ámbitos de exposición, a Dirección Xeral de Saúde Pública confirmounos as novas pautas de actuación co fin de priorizar a presencialidade do ensino.

1. Os casos confirmados non deben acudir ao centro e deberán permanecer en illamento ata transcorridos 3 días do fin do cadro clínico e cun mínimo de 7 días dende o inicio dos síntomas ou dende o diagnóstico do caso asintomático. Tampouco deberán acudir á escola alumnado con síntomas compatibles coa COVID.

2. Unha vez rematado o illamento, nos tres días posteriores, extremaranse as precaucións, reducindo as interaccións sociais e evitando o contacto con persoas vulnerables.

3. Para a incorporación do alumnado ao grupo non é preciso aportar unha proba diagnóstica negativa nin un informe de alta.

4. Ante a aparición dun primeiro caso na aula e ata un total de 4 (ou o 20% do grupo) nun período de 7 días, non se realizará corentena do grupo (a excepción de alumnado con inmunosupresión)

5. En ningún dos escenarios actuais se recomenda realizar cribados masivos no centro escolar, a non ser que de forma excepcional o indiquen as autoridades de saúde pública.

6. Aínda que a organización e protocolo do centro segue a ser a mesma, facemos un chamamento á necesidade de reforzar todas as medidas preventivas.

Esperando que esta información facilite unhas pautas sinxelas e homoxéneas de actuación, aproveitamos a ocasión para enviarlles un cordial saúdo,

O equipo COVID do CEIP P. Froebel