Novas

BIBLIOTECA PARA NAIS,PAIS,FAMILIAS

Mér, 08/11/2017 - 3:14pm — A Maía

Estimadas nais, pais, familias,

Durante este curso queremos poñer á vosa disposición para lectura e consulta, unha selección de libros de pedagoxía de temas varios. A finalidade é que poidades coñecer distintos enfoques,  aprender, reflexionar  e incrementar a vosa seguridade como nais e pais e contar con informacións e criterios veraces, que sen dúbida, pódenvos axudar a exercer un bo desempeño pedagóxico na crianza dos vosos fillos e fillas. Tentamos seleccionar libros con  unha visión sinxela e amena sen renunciar ao rigor, e que vos axuden no exercicio de vosa máis apaixonante responsabilidade: a de ser nais e pais.

Poderedes retiralos na nosa biblioteca os luns en horario de 16:30h a 17:30h. Esperamos que vos animedes a lelos, e que os atopedes de utilidade.

O noso agradecemento para a ANPA que será quen xestione directamente o préstamo.

 

 

ESTRELAS DO ROCK

Sáb, 21/10/2017 - 12:17pm — A Maía

Parabéns para Aida, Marta, Raquel e Sabela, as estrelas do rock do Ceip A Maía!  que co tema “Tolemia animal” veñen de acadar o 3º premio na categoria infantil no certame Quero Cantar. Parabèns por suposto ao seu profe de guitarra, q as preparou e animou a participar. 
Noraboa rapazas! Orgullosos de vós!

 

AS ESTRELAS DO ROCK

Ven, 20/10/2017 - 11:22am — A Maía

Para os que aínda non as coñecedes queremos presentarvos ás estrelas do rock!! Catro mozas de Bertamiráns que acuden ás clases de guitarra de Miguel Alonso no Ceip da Mahía e que hoxe a partir das 18.30 tamén van estar no teatro Colón da Coruña, na gala final do Quero Cantar. Queremos transmitirvos todo o noso apoio, estamos orgullosísimos de que chegaredes á final e desexamos que hoxe pola tarde brilledes como o que sodes: as estrelas do rock. Ánimo rapazas

Proxecto ELISA: Estudo Lonxitudinal para unha Infancia Saudable

Dom, 27/11/2016 - 11:05am — A Maía

 

ELISA É UN ESTUDO LONXITUDINAL, PERO…QUÉ É ISO DUN ESTUDO LONXITUDINAL?

Un estudo lonxitudinal é un estudo que investiga a un mesmo grupo de xente de forma repetida ao longo do tempo (é dicir, hai varios momentos de avaliación ou recollida de datos). Polo tanto, ELISA vai estudar aos mesmos nenos/as durante varios anos.

Así, este ano ELISA vai empezar estudando ao grupo de nenos/as de entre 3 e 5 anos. O vindeiro curso, farase unha nova recollida de datos (seguimento 1) cando estes rapaces teñan de 4 a 6 anos. E por último, no seguinte curso, cando eses nenos/as teñan de 5 a 7 anos, farase outra avaliación (seguimento 2). Se esta primeira fase sae ben, o esperable é que o estudo teña maior continuidade ao longo dos anos.

 

 

POR QUE É IMPORTANTE UN ESTUDO LONXITUDINAL?

Cubrir varios cuestionarios e recoller información ao longo do tempo permítenos ver a evolución e o crecemento dos nenos/as e, polo tanto, axúdanos a ver o que inflúe de forma positiva ou de forma negativa na súa adaptación psicolóxica e social.

Podedes saber máis do proxecto no propio centro e nos seguintes enderezos:

http://www.usc.es/gl/investigacion/grupos/udipre/ELISA.html

 

https://www.facebook.com/proxectoELISA

 

Esperamos que esta información vos axude a acercarvos máis ao ELISA. Necesitamos da vosa participación, as melloras na calidade da educación fanse entre todos!

 

CELEBRACIÓN DE CUMPLEANOS EN EDUCACIÓN PRIMARIA

Ven, 25/11/2016 - 2:50pm — A Maía

Estimadas nais, pais, familias,

Tal e como se vos adiantou nas reunións de outubro, estábamos pendentes de adoptar un acordo en canto á celebración de aniversarios nas aulas de educación primaria. Nestes días chegamos a unha decisión:

Aínda que non se pode considerar competencia nosa nin estamos obrigados, non nos opoñemos a celebrar os aniversarios na aula, entendendo por celebrar: felicitar, facer protagonista ao alumno ou alumna nese día especial permitíndolle que elixa unha actividade para facer conxuntamente na aula (lectura dun libro, cantar, propoñer un xogo para o recreo,…), facilitar que se lle prepare por parte dos compañeiros e compañeiras un recordo, felicitación colectiva, etc. poñendo en valor a súa autoestima e o sentimento de pertenza a un grupo.

Non se admiten lamberetadas [i](pasteis, galletas, bombóns, caramelos, etc).

 

As razóns nas que nos baseamos para adoptar este acordo e  que queremos  compartir con vós son fundamentalmente as seguintes:

  • De saúde:  O incremento de alerxias e intolerancias entre o alumnado.
  • Curriculares: A escola e transmisora de valores e hábitos, entre eles os hábitos saudables e os valores de non consumismo.
  • De respecto ás familias, ao alumnado  e a función equilibradora e compensatoria da escola: Ás veces, de xeito non intencionado, e con algo tan aparentemente inocuo como a celebración dun aniversario, suscítase a competitivade e/ou marxínase a quen non participa destas celebracións;  outras, nin se ten en conta que, nalgúns casos, vai  en contra dos modelos de crianza adoptados e asumidos polas familias.

 

 

Esperamos que entendades e respectedes a nosa decisión.

 

 

Atentamente.

 

Mª Isabel Abelleira Bardanca

Directora

 

 



[i]

Lamberetada: Alimento, xeralmente doce, de sabor agradable que se toma máis por gusto ca polo valor alimenticio.

AVISO REUNIÓN DE 3 ANOS

Lun, 05/09/2016 - 7:19am — A Maía

   Mañá martes 6 de setembro ás 5 da tarde terá lugar a  reunión cos pais e nais de 3 anos nas respectivas aulas de infantil.

     4º A - aula 5 - Titora: Sara Delgado

     4º B - aula 1 - Titor: Jose Carlos Domínguez

     4º C - Aula 7 -Titora : María SanMartín

novas da Anpa

Dom, 13/09/2015 - 8:22pm — A Maía

http://anpa-maia.es/?cat=77

AVISO IMPORTANTE: ALERTA METEOROLOXICA

Lun, 16/01/2023 - 6:18pm — Dirección do Centro

A Axencia Estatal de Meteoroloxía e MeteoGalicia alertan dun fenómeno meteorolóxico adverso de nivel LARANXA por acumulacións de neve por riba dos 20 cm, que comezará o martes día 17.01.2023 ás 06.00 horas e prolongarase ata as primeiras horas do mércores 18.01.2023. Este adverso afectará á zonas da montaña de Lugo e Ourense.

 

O aviso será amarelo no mesmo período horario nas áreas: Interior de A Coruña, interior de Pontevedra, centro de Lugo, sur de Lugo, noroeste de Ourense, sur de Ourense e Valdeorras.

 

Adicionalmente se alerta dun fenómeno meteorolóxico adverso de nivel LARANXA por vento dende hoxe día 16.01.23 ata o medio día do mércores 17.01.2023 nas zonas da Mariña Lucense e noroeste de A Coruña.

 

Ante a devandita situación de risco, a Comisión Escolar de Alertas acordou o seguinte:

 

1. A SUSPENSIÓN do transporte escolar DURANTE O MARTES 17 dos centros educativos situados nos concellos das zonas de predición das montañas de Lugo e Ourense, con seguimento das condicións climáticas nas zonas do interior da Coruña, interior de Pontevedra, centro de Lugo, sur de Lugo, noroeste de Ourense, sur de Ourense e Valdeorras. 

O noso centro pertence á zona do interior da Coruña, polo estaremos en seguimento das condicións climáticas e avisaremos dos cambios coa maior celeridade posible.

 

2. SUSPENSION do transporte escolar EN HORARIO DE TARDE DO MARTES 17 dos centros educativos situados nos concellos das zonas de predición do interior da Coruña, interior de Pontevedra, centro de Lugo, sur de Lugo, noroeste de Ourense, sur de Ourense y Valdeorras.

 

3. A SUSPENSIÓN DE ACTIVIDADES NO EXTERIOR nos centros educativos situados nas zonas da Mariña Lucense e o noroeste de A Coruña ata as 12h do martes 17.

 

Moitas grazas pola súa colaboración e un saúdo.

CIRCULAR INFORMATIVA: Consello Sectorial de Nenos e Nenas do Concello de Ames

Xov, 04/11/2021 - 12:02pm — Dirección do Centro

Estimadas nais, pais, nenas e nenos

O Concello de Ames quere crear e poñer en funcionamento o Consello Sectorial de Nenos e Nenas do Concello de Ames; é un consello sectorial de características singulares dada a composición principal dos seus membros, polo que a falta dunha representación mediante entidades inscritas no rexistro municipal de asociacións procedese a unha representación directa dos nenos e nenas de 6 a 12 anos escolarizados no termino municipal de Ames.

A súa función primordial é incorporar as vivencias da poboación infantil e favorecer a intervención de nenos e nenas nos debates, propostas, suxestións, queixas respecto de calquera actuación municipal, así como ser informados e opinar sobre todas as actuacións doutras administracións públicas que actúen no municipio. Este Consello está inspirado na Convención dos Dereitos  da Infancia que inclúe a participación infantil como modo de visibilización dos seus dereitos. É un órgano onde se lles dará voz para que poidan participar activamente da vida municipal e onde poder expoñer as súas necesidades, puntos de visa.

O regulamento do Consello de Nenos e Nenas será aprobado polo Pleno do Concello e nel concretarase a súa organización, composición e funcionamento.

A composición sería a seguinte:

  • Presidencia : Será exercida polo titular da Alcaldía do Concello de Ames ou concelleiro/a no que delegue.

  • Secretaría: Será exercida por persoal técnico da concellería competente en materia de infancia.

  • Vogais. Os vogais será os seguintes: Vogais de representación política: un representante de cada grupo municipal no pleno do Concello de Ames. Cada grupo designará titular e suplente.

  • Vogais de representación infantil: 9 representantes do alumnado de 6 a 12 anos dos centros escolares de Ames ca seguinte composición: 3 representantes de 1º a 3º de educación primaria e 6 de 4º a 6º de educación primaria. Cada representante terá o seu suplente.

A representación dos nenos e nenas nunca será inferior á representación política, incrementándose, cando fora preciso, no grupo de 4º a 6º de educación primaria. Os representantes dos nenos e nenas renovaranse ao longo do mes de outubro de cada curso escolar.

Solicitarase de UNICEF o nomeamento dunha persoa en calidade de asesor/a permanente deste órgano.

Poderán asistir ás sesións do Consello con voz pero non voto, aquelas persoas e/ou asociacións que sexan convidadas pola presidencia ou a requirimento do Consello.

 

Si estades interesadas/os en que a vosa filla ou fillo presente candidatura para formar parte deste Consello, por favor, entregade a folla de presentación de candidaturas á titora ou titor antes do 8 de novembro.

MODELO PRESENTACIÓN DE CANDIDATURA

 

 

A DIRECTORA

 

Distribuir contido