“Se á miña biblioteca a destruíran as chamas ... por sorte nunca pasou. Pero fixen mudanza de casa moitas veces e tiven suficientes amigos que me pediron libros prestados como para ter unha idea bastante aproximada da natureza da catástrofe. Ingresar na codia dunha habitación apreciada e atopala baleira, agás por unha grosa capa de cinza que unha vez foi a literatura favorita dun : só pensalo é tétrico. Pero felizmente os libros son substituíbles, polo menos a clase de libros que enchen os andeis da miña biblioteca. Carezo de espírito de coleccionista e nunca me interesaron as primeiras edicións e as antigüidades. Só me preocupa o contido do libro, non a súa forma, nin a súa data, nin o número nas súas solapas. O lume, os amigos, e as mudanzas nunca poderán despoxalo a un de nada que non poda, como os fillos, camelos e mulas de Job, substituírse na súa completa medida”. (Aldous Huxley)
Procuraremos neste apartado expoñer os volumes (libros, discos, revistas, xornais, e-books, etc.) que son novidades na nosa biblioteca.
Dennis Lehane é un mestre da novela policial. Nesta obra amosa un excelente argumento no que se mestura a influencia psicolóxica dos acontecementos da infancia, das relación de amizade, do drama da morte dunha filla; e todo no crisol das forzas máis intrínsecas da personalidade humana.
A lectura dos clásicos sempre é beneficiosa. Séneca, o estoico máis senlleiro do primeiro século da nosa era, ofrécenos nas súas obras unhas receitas para a vida que serán útiles en todas as épocas. Sen esquecer o pracer estético dos textos.
Xa temos na nosa biblioteca a novela, La espada y la pluma, escrita por Javier Rivas, alumno do noso centro. Unha lectura para mergullarse nas aventuras de piratas no mar dos Sargazos.
Benjamin Black é o pseudónimo de John Banville. Na actualidade é un dos mellores escritores en lingua inglesa, unha proba son as novelas El mar e Antigua luz.
Tamén é un mestre do xénero detectivesco. El secreto de Christine describe moi ben o poder das organizacións clandestinas, con pretensión de filantropía por parte dos poderes fácticos, sobre a vida e a morte das persoas.
REO é un graffiteiro comprometido coa súa arte. Xesús Fraga amosa nesta novela o universo das inquedanzas da mocidade contemporánea. Unha lectura que fai reflexionar.
Arthur Conan Doyle escribe uns relatos moi interesantes para reflexionar sobre a ciencia e a tecnoloxía. E ademais no marco dunha obra de aventuras. Que máis se pode pedir?
Dickens é un escritor imprescindible. Tolstoi, Dostoievski, Kafka, Orwell, Shaw; recoñeceron que foi o seu mestre. A variedade dos personaxes, a mensaxe ético-moral, a liña argumental engaiolante; xenial.
O cine non foi xusto coas obras de H. G. Wells, porque cercenou a reflexión crítica sobre os avances científico-tecnolóxicos.
Hai libros esquecidos durante os últimos anos, en beneficio doutros que o mercado considerou promocionar. Os clásicos sempre volven. O auténtico valor literario é consubstancial coa permanencia. Un exemplo, O principiño.
