CURSO 2023/2024

O luns 27 de maio de 2024 tivo lugar a estrea da nova produción teatral de Telón de Aquiles cunha dobre representación no Salón de Actos do noso centro da comedia clásica grega "As nubes" de Aristófanes, nunha adaptación máis cercana ao actual século XXI. A nosa compañía Telón de Aquiles, maxistralmente dirixida polo noso compañeiro, Rafael Alonso Pica, está composta no curso 2023-2024 polo seguinte alumnado: Álex Atán, Antonio Canosa, Valle Martínez, Luca Calvo, Ale Gallego, Julia Ramil, Anthony Rivas, Yordani Mateo, Irene López, Lena Ayerbe, Ian Iglesias, Mateo Iglesias e Daniel Collazo. Nas representacións Telón de Aquiles tivo o magnífico apoio musical de Dijo Cuatro, o grupo instrumental de Moas, dirixido na súa excelencia polo noso compañeiro Juan Dios Cañada. Nesta ocasión a formación de Dijo Cuatro estivo formada polos seguintes alumnos e alumnas: Tomás Fernández, Alberte Díaz, Carmen López, Paula Rodeiro e Adrián López.

Aquí tedes unha selección de fotografías da estrea.

O martes 14 de maio de 2024 alumnos e alumnas de 1º e 2º de ESO, dirixidos e coordinados polo noso compañeiro Rafael Carrasco del Pozo, realizaron sendas representacións da obra teatral "Romeo e Xulieta" de William Shakespeare, con gran ilusión e éxito ante o público do primeiro ciclo da ESO. 

No mes de maio de 2024 quedou instalado un novo mural no salón de Actos, obra da artista Laura Romero. O mural conmemora o extraordinario e triunfal paso polo concurso "Saber y ganar" do noso alumnado de 4º de ESO do curso 2023-2024, Carmela Taboada Rodríguez, Renata Pía Rial e Adrián López Bocija. O fermoso e alegre mural tamén fai alusión ao noso centro e a lugares simbólicos que están na lembranza da nosa contorna de Oza, Castrillón e os Castros.

No mes de maio de 2024 o EDLG coa colaboración do Departamento de Lingua e Literatura Galega e o Departamento de Xeografía e Historia botou a andar un proxecto no que participou o alumnado desde 1º ESO ata 1º Bacharelato.

O alumnado deseñou cartolinas sobre artistas e grupos de música en galego de todos os xéneros nas que incluíron un código QR que leva a unha canción dese grupo que cada persoa escolleu. A exposición puidose visitar nos corredores do Instituto durante o mes de maio.

Durante os recreos e á saída do instituto durante o mes das Letras Galegas soaron as cancións seleccionadas polo alumnado para darlle visibilidade ao enorme potencial da música galega actual.

Nos meses de abril e maio de 2024 celebrouse, organizado pola Biblioteca o IES Monte das Moas, o Mercado Solidario de Libros, vinculado ao Día do Libro e ao Mes do Libro (abril) de 2024. Estas celebracións están tamén relacionadas co Día das Letras Galegas. 

Durante este tempo a comunidade escolar puido traer alimentos non perecedoiros (pasta, arroz, latas de conservas, azucre, leite, legumes...). Por cada quilogramo de alimentos puidose levar un libro. Os beneficios estiveron destinados ao Banco de Alimentos de A Coruña Rías Altas.