Skip to Content

Escola_nais_pais Curso 2018-2019

 

Que é unha escola de nais e pais?

 

É un lugar de encontro entre a familia e o centro educativo.

Na escola de nais e pais os e as docentes xuntámonos coas familias para reflexionarmos sobre aspectos esenciais nos que debemos camiñar xuntos. Trátase dun espazo onde levar a cabo un intercambio de experiencias, poñer en común as preocupacións particulares, explicar os distintos puntos de vista ... en fin, informar(nos) e reflexionar sobre distintos temas de interese educativo.

E que temas son eses...? Pois os que decidamos entre todos e todas: a coeducación, as novas tecnoloxías, hábitos de vida saudables, a educación afectivo-sexual, a planificación do estudo...  Temos tanto do que falar e tanto que aprender...

 

Novembro do 2018:

Iniciamos neste mes de novembro esta escola e pensamos que é unha ocasión moi acaída para reflexionarmos convosco sobre un tema ben actual: a educación en igualdade. Nesta ocasión, no seo da campaña de educación en igualdade que estamos realizando co alumnado, queremos estender a reflexión tamén ao ámbito familiar, por iso enfocamos a sesión a partir de dous relatorios:

  • O alumnado de 3º de ESO C exporá as conclusións sobre un estudo realizado para comprobar o reparto das tarefas domésticas nas familias do alumnado da ESO.

  • Unha charla a cargo de Mercedes Renda, axente de igualdade pertencente a APAIOGA (Asociación Profesional de Axentes de Igualdade de Oportunidades Galega).

APAIOGA é unha entidade sen ánimo de lucro constituída en xaneiro de 2004 que promove a realización de actividades de igualdade de oportunidades a través da presentación de proxectos e propostas. Algunhas actuacións levadas a cabo por esta asociación son a elaboración e participación en diferentes estudos; deseño e redacción de guías, monográficos e materiais educativos; exposición de relatorios en xornadas, foros e mesas de debate; servizos de orientación e asistencia técnica en igualdade de oportunidades a administracións públicas, empresas e asociacións; elaboración e avaliación de plans de igualdade municipais (Cuntis, Moraña, Catoira…)...



page | by Dr. Radut