Blog da biblioteca

A biblioteca da escola sumouse ás distintas iniciativas que se levaron a cabo para celebrar o Día das Letra Galegas, dedicado este ano a Francisco Fernández del Riego, Don Paco, mediante unha exposición.

Este ilustre persoeiro, nado no concello lucense de Lourenzá, contribuíu a manter a afianzar a cultura galega dende que entrou en contacto coa obra de Rosalía de Castro, Curros e Vicente Risco entre outros. De feito, foi un dos impulsores da celebración da festa que este ano se lle adica. Cabe destacar tamén que foi socio fundador da Editorial Galaxia en Vigo, cidade á que permaneceu vencellado ata a súa morte.

Ademais de diferentes obras que falan sobre a vida de Don Paco, coa exposición que celebra as Letras Galegas tamén quixemos recuperar outras figuras homenaxeadas en anos anteriores coa colección dos Bolechas As miñas primeiras letras galegas.

Hoxe, 28 de abril, recibimos a visita de Sabela Fernandez Trelles, autora de O ladrón de soños entre outras obras.

Puidemos escoitar de primeira man o seu conto mentres faciamos actividades moi divertidas relacionadas cos nosos soños e pesadelos! As actividades consistiron en que cada alumno e alumna contara os seus soños máis preciados para poder expoñelos na biblioteca e que o resto do centro puidese coñecelos e engadir os seus. E por outra banda, cos pesadelos aprendemos a expresalos e falar sobre eles, meténdoos nun cofre pechado para que non escapen e que así non lles teñamos medo.

Finalmente firmounos os libros e entregámoslle un pequeno agasallo de parte de todo o alumnado. Grazas Sabela!

Por Marta Cernadas, titora de 1º B Ed. Primaria

Un ano máis, a Biblioteca da escola organizou a caza da gralla para loitar contra as incorreccións ortográficas. A resolución do concurso realizouse o 24 de abril para celebrar o Día do Libro. Tras o sorteo levado a cabo entre todas as grallas achegadas, con testemuñas do equipo da biblioteca, resultou gañadora a participación número 17.

A persoa que achegou a gralla con ese número é Chloe Leyenda Pousa, alumna de 2º A Ed. Primaria. Parabéns! Durante a Lectura Compartida do mércores 26 fíxoselle entrega do seu premio: un e-book para poder desfrutar dos libros alá onde queira!

A gralla coa que participou é a que se amosa a continuación: 

O resto de participantes no concurso. non foron coas mans baleiras, senón que levaron un pequeno agasallo coa forma da mascota da biblioteca. Velaquí unha mostra dos afortunados: 

Grazas a todos os participantes!

A Deputación de Pontevedra vén de agasallarnos unha colección coas obras de Ramón María del Valle-Inclán, pai do esperpento. Autor de teatro e novela, tamén se aventurou na poesía. Entre as súas obras máis destacadas, temos Luces de Bohemia (teatro) e as catro Sonatas (narrativa). Todas elas están dispoñibles en préstamo para a comunidade educativa.

 Outras obras tamén doadas pola Deputación son 365 días 365 mulleres e Alma e corazón: unha aventura multicolor, de Ledicia Costas. Ambolos dous libros tratan a igualdade dende dous puntos de vista ben diferentes. O primeiro é un recopilatorio de referentes femininos de todos os tempos, mentres que o segundo é o resultado do Concurso "Búscase talento".

O 13 de marzo celébrase o Día Mundial sen Faltas de Ortografía. Por iso, dende a escola queremos lanzar de novo a caza de grallas ortográficas! Só tes qeu cubrir a ficha de participación que se atopa nos ficheiros adxuntos ou en Conserxería, indicando:

• O teu nome e curso
• A fotografía inédita coa falta (ou captura de pantalla)
• A corrección

Cada participante poderá achegar un máximo de dúas fotografías. A data límite de participación é o 21 de abril, ás 12h.

O sorteo do premio (un fantástico Ebook) realizarase o 24 de abril, coincidindo co Día do Libro

Máis información nas bases do concurso.

Na formación de Lectura e Familias do mes de marzo, fixemos un taller sobre Como contar contos, a cargo da contacontos e actriz Soledad Felloza.

Aprendemos técnicas e estratexias para narrar un conto a un grupo de nenas e nenas sen morrer no intento: como escoller o conto, xestos, posturas, que voces poñer, levar pensadas saídas para posibles conflitos, etc.

Agardamos poñer en práctica o aprendido nas sesións de contacontos que as familias realizarán no mes de abril, para celebrar o Día do Libro.

O programa Lectura e Familias continúa coas súas actividades de formación con Como ler un conto, o vindeiro xoves 2 de marzo ás 16h30. Nela, aprenderemos a interpretar e dar vida ás primeiras lecturas que compartimos coa rapazada.

Por outra banda, iniciaremos en breve a actividade Contando un conto, moi relacionada coa próxima xornada de formación, máis non vinculante. Co obxectivo de incorporar ás familias ao ensino - aprendizaxe e ao mesmo tempo afianzar a autoestima do alumnado, invitámosvos a facer de contacontos na aula das vosas crianzas (especialmente nas aulas de Ed. Infantil e 1º e 2º de Ed. Primaria).

Para ambas actividades, é necesario facer unha inscrición. 

Agardamos a vosa participación!

Os sapoconchos máis espelidos da escola volven para presentarnos as novidades da biblioteca: Perrock Holmes, Resuelve el misterio e moito máis!

Ademais, tamén se poden consultar as novidades no panel do corredor da biblioteca! Alí atópanse os libros marcados coas cores por idades: vermello (todos os públicos), verde (a partir de 3ºEd. Primaria), amarelo (a partir de 5º de Ed. Primaria) e sen cor (Ed. Secundaria).

O Programa Lectura e Familias, concedido este curso ao centro, ten como un dos seus obxectivos fomentar a lectura entre as familias e a rapazada, así como fornecer das ferramentas axeitadas para tal fin.

Unha das súas actividades é a formación das familias en diferentes campos relacionados coa lectura. Así, o xoves 2 de febreiro, comezamos o ciclo de talleres con Como seleccionar lecturas axeitadas, en horario de 16h30 a 18h30. O seguinte taller, a celebrar o 2 marzo, será Como narrar un conto. Se estás interesada/o en participar, comunícao ao centro para poder organizar axeitadamente a actividade.

Así mesmo, para incorporar as familias ao proceso en ensino - aprendizaxe tamén faremos xornadas de contacontos nas que as e os protagonistas serán as familias.

Seguiremos informando das novidades do programa!

O 3 de decembro celebrouse o Día Internacional das Persoas con Discapacidade. Para darlle visibilidade a este colectivo e contribuír á súa integración plena, dende a Biblioteca organizouse unha exposición con lecturas nas que os protagonistas son persoas con distintas discapacidades.