No Regulamento de Réxime Interno do Centro atopamos recollidos os seguintes dereitos e deberes dos comensais, así como as medidas correctoras.

DEREITOS DOS ALUMNOS COMENSAIS

Á marxe dos dereitos que asisten os alumnos comensais na súa calidade de alumnos do Centro, estes posúen en calidade de usuarios do Servizo do Comedor os seguintes dereitos específicos:

• Dereito a beneficiarse de todas as prestacións que comprende o Servizo de Comedor Escolar nas mellores condicións posibles de seguridade, hixiene e benestar.

• Dereito a recibir un trato correcto, con respecto e sen discriminación de ningún tipo, tanto por parte dos compañeiros de comedor, coma de todo o persoal adscrito ao Servizo.

DEBERES DOS ALUMNOS COMENSAIS

Os usuarios do Servizo de Comedor teñen os seguintes deberes:

• Deber de participar activa e correctamente no desenvolvemento das actividades do Servizo de Comedor, con espírito de colaboración e solidariedade.

• Deber de tratar coa corrección debida, respecto e cordialidade aos seus compañeiros de comedor, así como a todo o persoal adscrito, obedecendo as súas indicacións.

• Deber de usar correctamente e coidar as instalacións que o Centro pon a disposición do Servizo de Comedor para o desenvolvemento das actividades que lle son propias.

• Deber de respectar as seguintes Normas Xerais do Comedor Escolar:

  1. Os alumnos que fan uso do Comedor Escolar deben de comer de tódalas comidas e nas cantidades que se lles sirven dun xeito axeitado á súa idade.

  2. Antes de entraren ao comedor, tódolos alumnos deberán lavar as súas mans e asearse.

  3. Os alumnos de 3º ciclo de Primaria colaborarán no servizo e orden das mesas, así como axudar aos alumnos de Educación Infantil.

  4. So estarán de pé os encargados de servir as mesas. O resto permanecerá no seu sitio habitual, que será o mesmo desde o principio do curso, agás cirscuntancias especiais. Se fose necesario algún servizo, pedirase educadamente aos servidores.

  5. Ninguén abandonará o comedor antes de rematar a comida ou sen permiso do persoal colaborador.

  6. As conversas cos compañeiros serán en voz baixa e sen berros.

  7. Á hora da comida non se permitirá inxerir as que non sexas servidas polo comedor.

  8. Ningún alumno pode saír do recinto escolar durante o tempo que dura o servizo, agás na presenza dos pais ou titores legais.

  9. Os alumnos non poderán desprazarse libremente polas dependencias do colexio. So poderán acceder a aquelas que lles sexan indicadas.

  10. Os alumnos terán un comportamento solidario, correcto e respectuoso cos demais compañeiros. Non se permitirán pelexas, ofensas nin tratos desconsiderados cos demais.

APLICACIÓN DE MEDIDAS CORRECTORAS

Se as circunstancias así o esixen, adoptaranse as medidas necesarias para favorecer o estrito cumprimento dos dereitos e deberes dos alumnos beneficiarios do Servizo de Comedor Escolar. A aplicación das medidas que en cada caso conveña terá un marcado carácter educativo, procurando sempre garantir o respecto a todos os implicados no devandito servizo complementario e a convivencia solidaria entre todos eles.

Cando algún usuario considere que se incumpre algún dos dereitos antes expresados, comunicarao ao Encargado do Comedor, para que se tomen as medidas oportunas ao respecto.

Para tal efecto consideraranse tres tipos de faltas.

Serán faltas leves aquelas derivadas da falta de obediencia ao persoal colaborador e o non cumprimento das normas máis elementais: falta de interés por manter as “boas maneiras” na mesa, pelexas ou insultos aos compañeiros, maltrato ás instalacións ou mobiliario…

Serán faltas graves: a reiteración de faltas leves e aquelas que prexudiquen o normal funcionamento do comedor, así como a falta de respecto ao persoal colaborador.

Serán faltas moi graves: a reiteración de faltas graves e aquelas que alteren gravemente o funcionamento do comedor, en relación cos demais compañeiros e persoal colaborador.

Medidas correctoras de faltas leves

As primeiras medidas correctoras intentarán, a través do diálogo, correxir o comportamento equivocado. Informarase ás familias dos feitos significativos (persoalmente, por teléfono ou carta).

Todos os feitos quedarán rexistrados nun “libro de incidencias” (tanto os de comportamento como os referentes á nutrición). Darase conta á dirección do centro daquelas situacións especiais.

Estas medidas serán aplicadas polo encargado do comedor.

Medidas correctoras de faltas graves

Notificación aos pais do alumno implicado, con apercibimento de suspensión do dereito ao Servizo de Comedor, por espazo de tres a cinco días se se producise reiteración na conducta motivo de corrección.Este tipo de medidas correctoras tomaraas a Dirección previo informe do Encargado do Comedor.

Medidas correctoras de faltas moi graves

Suspensión do dereito ao Servizo de Comedor Escolar, polo que resta de curso.

Esta medida será de aplicación no caso tamén de reiteración de faltas graves.

O Consello Escolar será o encargado de adoptar esta medida excepcional, oídos o encargado do comedor e os pais do alumno afectado.

PERDA DA CONDICIÓN DEFINITIVA DE USUARIO DO COMEDOR

• Por a falta de aboamento das cotas do servizo do comedor por parte dos usuarios durante o mes corrente.

• Por presentar problemas de conducta moi graves.