Hoxe temos novas sobre as medidas anunciadas na prensa, aínda que non foron explicadas na reunión telemática do pasado venres aos responsables dos Equipos Covid do centro. Atopamos o seguinte documento, despois de recibir xa os Test de antíxenos no centro.
PROTOCOLO PARA A DETECCIÓN DE INFECCIÓN POLO SARS-CoV-2 CON TEST RÁPIDO DE ANTÍXENO EN SALIVA EN CENTROS DE EDUCACIÓN PRIMARIA
Dirección Xeral de Saúde Pública
Facemos un pequeno resumo:
A proba rápida de antíxeno de COVID-19 en saliva é un test que, ao igual que o test de antíxeno con mostra nasofarínxea, permite obter un resultado positivo ou negativo en 10-15 minutos. Este test, baseado en inmunocomatografía de fluxo lateral, analiza a posible presenza da proteína do virus na mostra de saliva depositada previamente no tubo de recollida da mostra e teñen unha sensibilidade maior do 90% e unha especificidade mínima do 97%.
Ámbito de aplicación: Alumnado do ámbito da educación primaria pública e privada da Comunidade Autónoma de Galicia que voluntariamente desexe realizar a proba diagnóstica da COVID-19 tras a detección dun caso esporádico de COVID-19 entre a súa rede de contactos máis próximos (aula, comedor, etc) e que cumpra os seguintes requisitos:
• Non atoparse en situación de illamento por ser caso confirmado de COVID-19.
• Non atoparse en situación de corentena por ser contacto estreito dun caso confirmado.
• Non ter padecido COVID-19 nos 3 meses previos.
Procedemento para a despistaxe de infección con test rápido de antíxeno en saliva no ámbito da educación primaria:
Todos os centros de educación primaria de Galicia disporán dun stock inicial de test de antíxeno en saliva equivalente ao 25% do alumnado de educación primaria.
Procedemento de toma e análise da mostra biolóxica:.
• Unha vez enviados os test ao centro educativo, o responsable do equipo COVID do centro proporcionará aos/ás alumnos/as que formen parte da rede de contactos máis próximos ao caso un kit para a realización da proba no domicilio.
• O procedemento para a toma da mostra de saliva realizarase segundo as especificacións recollidas no manual de instrucións do test.
• A toma da mostra e a técnica diagnóstica será realizada no domicilio do/a alumno/a.
• Antes de realizar a proba, debe permitirse que o kit e a mostra se equilibren a temperatura ambiente (15-30 °C).
As instrucións de uso son as seguintes:
Preparación para a recollida da mostra de saliva
• Antes de comezar, asegurarse de que o/a neno/a cumpra as seguintes condicións: non comer, beber, cepillar os dentes nin mascar chicle polo menos 30 minutos antes da recolección de saliva.
• Non deixar caer o hisopo nin depositalo sobre ningunha superficie. Isto contaminaría o hisopo e podería causar un mal resultado da proba.
• O/a neno/a deberá respirar profundamente e logo tusir de 3 a 5 veces nun pano desbotable ou no oco do brazo se non dispón de pano.
Recollida da mostra de saliva (premer para ver un video explicativo)
• A recollida dunha mostra de saliva pode tomar de 2 a 5 minutos.
• Antes de cuspir, pechar a boca, relaxarse e fregar intensamente as fazulas durante 40 segundos para xerar saliva.
• Colocar a parte superior do embude preto da parte inferior dos beizos e comezar a depositar a mostra de saliva cuspindo no tubo.
• Recoller 0,5 ml da súa saliva no tubo. Trate de evitar as burbullas. Pre-tratamento da mostra
• Sobre a saliva do/a neno/a, agregar o líquido tampón no tubo de recolección de saliva (2/3 do vial do tampón) de líquido tampón no tubo de recolección de saliva. Empregue o contagotas se é necesario.
• Tapar o tubo de recollida de saliva de forma segura.
• Despois de tapar o tubo de recolección de saliva, darlle a volta tres veces para mesturar a mostra co líquido do tubo.
• Esperar 3 minutos.
Carga da mostra no casete de proba
• Rachar a bolsa de papel de aluminio para abrir, sacar o casete de proba e colocalo en horizontal nunha superficie plana.
• Retirar a tapa superior do tubo de recolección de saliva. Premer suavemente para poñer 3-4 pingas da mestura da mostra na rexión de mostra (S) do casete de proba.
Lectura dos resultados
Esperar 10-15 minutos, ler o resultado despois de 15 minutos. Non ler os resultados despois de 30 minutos.
Interpretación dos resultados
Negativo: Aparece unha liña de cor na rexión da liña de control (C). Non aparece ningunha liña na rexión da liña de detección (T). Indica que non se detecta o antíxeno do SARS- CoV-2 e o resultado é negativo.
Positivo: Aparecen dúas liñas de cor. Sempre debe aparecer unha liña de cor na rexión da liña de control (C) e outra liña na rexión da liña de detección (T). Significa que se detecta o antíxeno do SARS-CoV-2 e o resultado da proba é positivo.
NOTA: A intensidade da cor das liñas de proba pode variar segundo a concentración de antíxeno do SARS-CoV-2 presente na mostra. Polo tanto, calquera ton de cor na rexión da liña de proba debe considerarse como un resultado positivo.
Inválido: A liña de control non aparece. As razóns máis probables de falta da liña de control son un insuficiente volume de mostra ou unha técnica de procedemento incorrecta. Revise o procedemento e repita a proba cun novo kit.
Comunicación e rexistro do resultado da proba:
Todos/as os/as nenos/as que obteñan un resultado positivo na proba de antíxenos de autodiagnóstico serán consideradas directamente como caso confirmado de infección activa polo SARS-CoV-2. Polo tanto, estes/as nenos/as deberán seguir as medidas de illamento dispoñibles na páxina web do coronavirus (ligazón). En todo caso, o caso confirmado sempre deberá seguir as indicacións dos profesionais sanitarios que se encarguen do seu seguimento clínico.
Co fin de realizar o seguimento e estudo do caso confirmado, a persoa responsable do/a neno/a deberá notificar o positivo a Saúde Pública a través do formulario de declaración responsable de autotest positivo dispoñible na páxina web do coronavirus (ligazón) ou chamar ao 881 540 045.
En ningún caso notificaranse resultados negativos.
Como indica o protocolo de educación, calquera persoa cun resultado positivo deberá informar ao centro educativo desta circunstancia.