blogue debiblioteca

O noso alumnado de 4º da ESO na materia de TIC levou a cabo este ano unha actividade relacionada coa Educación Vial con tan bos resultados que decidiron presentalo aos Premios Nacionales de Cortometrajes de Educación Vial organizados pola DGT e a Fundación RACE.

O resultado deste traballo é o vídeo titulado "Los peligros de la vía", que se atopa na seguinte ligazón. Se vos gusta podedes votar por el.

Co gallo da Celebración Internacional do Día da Muller o 8 de marzo de 2022, a Bibliotelleiras levou a cabo na sala de lectura unha exposición de materiais bibliográficos procedentes dos nosos fondos baixo o título “Artellando feminismo”, unha mirada sobre a historia deste movemento, e sobre as variadas opinións en torno a un tema que resulta esencial para a convivencia. Trátase de achegar ao alumnado e a toda a comunidade escolar en xeral obras que nos axudan a seguir formándonos e van dirixidas por igual a mulleres e homes que queren vivir en igualdade e traballar por ela.
Durante a mañá do día 8, nos dous tempos de lecer, un grupo de alumnos e alumnas da ESO  botoulle moitas ganas e moito ánimo  e animouse a facer chapas con deseños que o Departamento de Plástica previamente ideara sobre a conmemoración desta data e tamén sobre un non rotundo á guerra e  coas cores de Ucraína; posteriormente estas chapas foron repartidas entre todo o alumnado, o profesorado e o persoal non docente con gran éxito de acollida e  participación.

Agradecemos tamén  o traballo de colaboración do coordinador do Club de Ciencia, Manuel Couceiro, quen se encargou de poñer en marcha e supervisar a montaxe e funcionamento  do aparello de facer chapas xa desde días antes para que todo resultase sen problemas.
Así mesmo taboleiro do vestíbulo vestiuse de cor morada para acoller unha proposta do ENL sobre “Grandes mulleres tan brillante como descoñecidas”.

O IES AS TELLEIRAS, PIONEIRO NA IMPARTICIÓN NA MATERIA MOBILIDADE ESCOLAR SOSTIBLE E SEGURA, É UN REFERENTE PARA OS CENTROS DE PRIMARIA DO CONCELLO DE NARÓN QUE ESTE CURSO 2021-2022 CURSAN POR PRIMEIRA VEZ A MATERIA DE EDUCACIÓN VIAL.
Tres colexios de Narón, concello comprometido desde hai anos na promoción da educación vial e con amplo recoñecemento neste sentido tanto a nivel estatal como europeo, veñen de poñer en marcha este curso escolar a materia de Educación Viaria no nivel de 4º de Primaria; trátase dos CEIP Ponte de Xuvia, A Solaina e Piñeiros que, como experimento piloto, o Concello espera exportar en próximos cursos a outros centros.
A novidade desta materia nos centros de Primaria do concello non o é tanto na Secundaria, onde desde hai tres anos o IES As Telleiras leva impartindo a materia de Mobilidade escolar sostible e segura a todo o alumnado no nivel de 1º da ESO como materia de libre configuración, cun balance moi positivo xa que se trata dunha materia interdisciplinar que permite traballar todas as competencias con actividades moi diversas.
Este ano a profesora responsable da materia, Aurora Romar, conta con un Scape room diseñado polo patrimonio de Narón e que en próximas datas estará a disposición da cidadanía a través do blog da Bibliotelleiras, na páxina web do instituto; así mesmo o alumnado traballará sobre o Camiño Inglés e a análise da súa mobilidade.
Xa o curso pasado o alumnado de 1º da ESO do centro levou a cabo un proxecto ligado á celebración do 8 de marzo, Día internacional da Muller, establecendo unha interesante comparativa entre o desprazamento das súas avoas e a mobilidade que pensan que os mozos e as mozas terán no futuro.

Para que o noso alumnado máis pequeno, da materia de Mobilidade Escolar Sostible e Segura, poida gozar do patrimonio cultural, artístico e natural do noso Concello e da nosa contorna, o alumnado de 2º de Bacharelato da materia de TIC deseñou uns traballos de Scape Room, que estamos seguros que lles van gustar. Estades todos invitados a compartilos!

El Tesoro de Artabria.

Nuestra ciudad, Narón.

Resuelve el homicidio.

Diario de un Percebeiro.

O campo de concentración e exterminio nazi de Auschwitz-Birkenau foi liberado polas tropas soviéticas precisamente  o 27 de xaneiro de 1945.
Entre 1933 e 1945, durante o réxime nazi en Alemania, o mundo atravesou un período de destrución e persecución sen precedentes. A culminación deste período foi a II Guerra Mundial que se desenvolveu entre 1939 e 1945 e que se transformou no maior conflito que a  humanidade xamais experimentara.
Non obstante, máis aló das atrocidades da guerra, o Holocausto levado a cabo polo goberno nazi converteuse nun dos xenocidios máis terribles da historia da Humanidade. Detencións  ilegais, deportacións, torturas, asasinatos en masa e outras moitas barbaridades  foron as  súas consecuencias.
As SS foron a principal organización responsable do asasinato xenocida e da limpeza étnica que se produciu  durante a duración do réxime de Adolf Hitler e da Segunda Guerra Mundial, período no que se calcula que morreron uns  6 millóns  de persoas de diversas minorías étnicas europeas, principalmente xudeus, pero onde tamén pereceron homosexuais, persoas LGTBI, xitanos, presos políticos, republicanos, disidentes, polacos, eslavos, discapacitados e persoas de color. De feito Auschwitz-Birkenau foi  o campo de prisioneiros, exterminio e traballo escravo máis grande da Alemania nazi onde foron liberados os 2.819 superviventes que alí se atopaban no momento da súa liberación. Miles de persoas no sobreviviron ás atrocidades cometidas neste campo de concentración e exterminio, o  máis salvaxe do nazismo.

É por esta razón que cada ano a UNESCO rende tributo á memoria das vítimas do Holocausto e ratifica o seu compromiso de loitar contra o antisemitismo, o  racismo e toda outra forma de intolerancia que poida conducir a actos violentos contra determinados grupos humanos.
A educación pode desempeñar un papel clave na prevención do xenocidio, proporcionando un marco para abordar as situacións  de violencia no pasado, ao mesmo tempo que se promoven os coñecementos, as capacidades, os valores e as actitudes que fomentan a prevención da violencia con respecto a determinados grupos de persoas nas sociedades actuais.
O ensino sobre cuestións  relativas ao Holocausto e a prevención do xenocidio forman parte dos esforzos que leva a cabo a Organización para promover a Educación para a Cidadanía Mundial, que é unha de las prioridades da Axenda 2030 da Educación. Neste contexto, a UNESCO apoia aos interlocutores do sector educativo nos seus esforzos para axudar ao alumnado a adquirir unha mirada crítica, a converterse en cidadáns mundiais responsables e activos capaces de valorar a dignidade humana e o respecto por  todas as persoas, a rexeitar  o antisemitismo, o racismo e outras formas de prexuízo que poden levar á violencia e ao  xenocidio.

A campaña  “We remember”, “Lembramos”, é unha iniciativa mundial do Congreso Mundial Xudeu e  a UNESCO orientada a concienciar sobre a importancia que para o presente ten a cultura da memoria; desde o 2017 invitan a grupos de persoas do mundo enteiro a que participen na campaña e suban a Internet unha foto co  hashtag #WeRemember  co fin de expresar o seu compromiso coa memoria do Holocausto.
O xoves 27 de xaneiro, as doce do mediodía,  o IES As Telleiras quixo unirse a esta iniciativa e levar a cabo unha actividade de recordo e conmemoración de todas vítimas do xenocidio cun pequeno acto de acendido de sete candeas brancas no vestíbulo do edificio de Bacharelato con alumnado deste nivel para iluminar o recordo e manter viva a memoria,  unha para cada colectivo que foi vítima del nazismo;  a última candea foi prendida  en honra dos “Xustos entre as Nacións”, aquelas valentes persoas que puxeron en risco a súa vida para salvar aos xudeus e xudías perseguidos.

O acto acompañouse das palabras do profesor do Departamento de Xeografía e Historia do centro, don Javier González, que imparte a materia de Historia do Mundo Contemporáneo quen  fixo un magnífico discurso no que recordou os feitos acaecidos nesta época e que foi unha chamada de atención aos mozos e mozas para que non dean a esquecemento o pasado.
A continuación sete  alumnos e alumnas, representantes dos catro grupos de 1º Bacharelato, levaron a cabo o acendido das sete candeas, mentres se escoitaba a música do tema principal da película A lista de Schindler, de John Williams.
Damos as grazas ao noso orador pola súa xenerosa implicación e a todo o alumnado que participou na actividade pola súa colaboración.