O pasado 10 de abril pasamos toda a mañá na biblioteca de Marzán cun conto e unhas propostas sobre o universo moi divertidas que nos propuxo o equipo de biblioteca do CRA.
Logo xogamos fóra cos nenos e nenas de Marzán.
Ao final, cada neno/a colleu dous libros para ler na casa.
O mes pasado tivemos unha bonita xornada en San Xián coas familias que nos acompañaron a visitar as cabuxas da comunide de montes de Santa Mariña do Rosal.
Soltan as cabras polo monte para mantelo limpo e previr incendios e quedan na corte as crías recén nacidas ata que pola noite volven as súas nais para darlle de mamar.
Nos fomos paseando ata a corte e por turnos fomos entrando para ver as cabuxas e acaricialas.
Despois fomos merendar a antiga escola de San Xian onde xogamos e descansamos.
Na Escola de Fornelos quixemos plantar un bosque para ter un patio diferente, máis acolledor, con árbores que nos protexan, que drenen a lagoa que se forma cando chove moito e que se poda convertir nun ecosistema cheo de vida.
Queremos agradecer á estación Fitosanitaria Areeiro que nos donara as 19 árbores a través da Deputación de Pontevedra, ao Concello que nos fixera os buratos no patio e que nos trouxera terra negra para poder plantar e sobre todo, ás familias que viñeron plantar as árbores cos nenos e nenas nunha tarde soleada e bonita.
Moitas grazas!
Aquí vos deixamos o vídeo resumo da actividade e máis abaixo, algunhas imaxes da árbore que plantamos ao día seguinte cos nenos e nenas que non puideron vir coas súas familias o martes 27.
Cada neno e nena das Escolas de Fornelos fixo un agasallo coas súas mans na casa e logo regaloulle a outro neno e nena da escola pero sen dicir quen o fixo.
Así é un agasallo sorpresa dun amigo/a invisible.
Logo fixemos a merenda con cousiñas ricas que trouxeron as familias.
