Skip to Content

Educación Infantil

Proposta do Departamento de Orientación

 

Boa tarde familias!

Deixámosvos unha proposta do Departamento de Orientación para facer cos nenos e nenas:

 

Dende que o 13 de marzo confináronnos nos nosos fogares, deixando baleiro o
Virxe da Cela, as familias asumiron unha gran responsabilidade ao
proporcionar entornos de aprendizaxe que ata o momento realizábamos de
forma compartida.

Esta nova situación que nos tocou vivir fai que cando volvamos á escola pode
que teñamos que adaptar as nosas formas de relacionarnos e de utilizar os
espazos.

Imaxinades ter que falar, xogar, estar na aula,… a unha distancia mínima de
dous metros?

Non debemos volver con medo, pero si con precaución; tampouco volver sen
afecto, pero si gardando as distancias e cunhas normas mínimas de hixiene
básica que xa todos e todas coñecemos.

Propoñémosvos unha actividade con dúas preguntas ou hipóteses plantexadas
de cara a unha nova realidade nas nosas aulas. No seguinte enlace podedes
descargar o PDF onde se describe a mesma.
https://asendadoxestal.wordpress.com/2020/05/12/cando-chegue-o-momento-de-voltar-como-imaxinariamos-esa-nova-realidade/

Para os máis peques, o alumnado de Educación Infantil, poden realizar as respostas
empregando calquer tipo de formato (vídeo, audio, escrito, debuxo...).

Moitas grazas,

Departamento de Orientación

 

 

 

Deixámosvos o enlace ao blogue coa actividade: https://www.edu.xunta.gal/centros/cpivirxedacelamonfero/?q=node/367

 

Podedes enviar as vosas achegas ao correo orientacionvirxedacela@gmail.com

 

Moitas grazas pola vosa colaboración!
 

Seguimos traballando coa natureza :D

 

Bo día! 
Hoxe continuamos traballando actividades con material non estruturado ao aire libre :)
 
 
 
Mandalas:

 

O mandala ten a súa orixe na India e significa círculo ou roda. Axúdalle aos nenos e nenas a concentrarse, manter a atención, traballar as figuras xeométricas, as simetrías, a orientación espacial, a coordinación óculo manual, as cores…
Hoxe imos crear os nosos propios mandalas cos elementos da natureza que máis nos gusten.
 
Aquí tedes un exemplo.
 
 
 
 
 
 
 
Construcións:
 
Estamos acostumados a facer construcións con material estruturado como pezas Lego ou similar. Hoxe, trátase de que os nenos e nenas reunan elementos da natureza como pedras, paus, trozos de madeira… e con estes elementos contrúa o que lle apeteza (casiñas, castelos, figuras xeométricas, cabañas...)
 
 
 
 
 
 
Por outra banda, o mestre Dani, que fixo as prácticas con nós o curso pasado, mándanos esta bonita proposta para traballar coas letras galegas. 
Mirade o vídeo. O xogo consiste en escribir distintas letras e ir formando palabras en galego con elas, logo os nenos e nenas poden facer un debuxo desa palabra.
 
 
 
 
 
 
 

 

 
Animádevos! É unha proposta xenial para traballar a lectoescritura e conmemorar as letras galegas do pasado domingo.
 
MOITAS GRAZAS POR ACORDARTE DE NÓS PROFE DANI!
 
 
 
 
 
Tamén vos deixamos as propostas de música:
Neste vídeo "FUXAN OS VENTOS" cantan unha canción que seguro que coñecedes.

PARA APRENDER

 

Foliada de Nadela 

 
 
PARA CANTAR
 
FUXAN OS VENTOS – Foliada de Nadela (karaoke)
 
Podedes mandarlle as vosas tarefas ao correo dosinda@edu.xunta.gal
 
 
 
 
 
 
Nós seguimos en contacto en virxedacelainfantil@gmail.com
 
Ata o próximo día :)
 

 

 
 

 

Actividades na natureza :)

 

Bo día familias!
 
Hoxe traemos unhas propostas para poder facer cos peques ao aire libre para que xoguen de xeito manipulativo con elementos da natureza.
Xogar coa natureza e con material non estruturado permítelles traballar o xogo creativo coñecendo o mundo que lle rodea. É unha fonte de estímulos que favorece e reforza a súa aprendizaxe.
 
 
 
 
Contamos:
 
Imos escribir nun papel os números en grande do 1 ao 15, recortámolos. Cando xa os temos recortados imos facer unha fila con eles por orden de arriba a abaixo. Agora tempos que buscar elementos da natureza (flores diferentes, paus, follas, pedras…) e poñemos ao lado de cada número ese mesmo número de elementos. Por exemplo: 1- unha flor, 2- poñen dúas pedras…
 
 
 
 
Simetría:
 
Para que os nenos e nenas traballen a simetría imos coller un pau grande e poñelo no chan ou na mesa. Despois o adulto pode seleccionar os elementos que lle apeteza e colocalos como queira. O neno e nena no outro lado terá que reproducir cos mesmos elementos esa simetría como vedes neste exemplo. Cando os nenos e nenas o dominen que sexan eles mesmos os que creen o modelo e logo reproduzan a súa simetría sen que o adulto interveña.
 
 
 
 
 
 
 
Pedras contacontos:
 
Agora imos buscar cos peques pedras que teñan unha forma alongada e un pouco plana. Agora imos pintar diferentes personaxes en cada pedra para logo contar un conto. Pode ser o noso conto favorito, un conto inventado…
 
Se vos apetece, podedes pintar as pedras e decoralas sen ter que contar logo un conto, simplemente traballar e decorar as pedras de xeito creativo.
 
 
 
 
 
 
 
 
 
 
 
Por outra banda, deixámosvos as tarefas da profe Noelia de relixión:
Este mes de Maio é o mes dedicado á Virxe María, a nosa nai do ceo, polo que imos cantarlle unha canción e regalarlle flores.
 
 
 
Podedes mandarlle as tarefas ao seu correo matarranz@edu.xunta.es
 
 
 
 
Nós seguimos en contacto no correo virxedacelainfantil@gmail.com
 
Ata o próximo día :)
 
 
 
 

 

FELIZ DÍA DA FAMILIA!

 

Bo día familias!
Hoxe é o día da familia e este ano máis que nunca temos moi presente o importante que é gozar do tempo en familia, querernos e aproveitar o tempo xuntos.
 
Gustaríanos poder celebrar este día no cole xa que para nós é moi importante que as familias coñezan a vida do cole e desfruten das actividades cos cativos e cativas. Aos nenos e nenas tamén lles fai moita ilusión que a súa familia veña ao cole e colabore con eles nas actividades e ver todo o que fan!!! Canto aprenden e como evolucionan en tan pouquiño tempo por si mesmos!!!!
 
Pero este ano, como é así de diferente, propoñémosvos unha serie de actividades para que podades gozar todavía máis de todo este tempo en familia, sobre todo agora que podemos visitar aos nosos seres queridos, porque non hai nada máis importante que a NOSA FAMILIA!!!!
 
 
 
Proposta de actividades para facer xuntos en familia:
 
Bailamos e movémonos xuntos:
Unha actividade na que o podemos pasar moi ben todos xuntos é o baile. As cancións e o baile póñennos de bo humor polo que imos gozar da música que nos guste e inventar coreografías divertidas e graciosas. Cada membro da familia escollerá unha canción que lle guste e inventará unha pequena coreografía para que os demais o imiten. Así todos nos sentiremos integrados e desfrutaremos dos diferentes gustos de cada un. Tamén podemos organizar un karaoke para os máis atrevidos!!! A gozar da música!!!!
 
Cociña en familia:
Agora que podemos reunirnos de novo coa nosa familia imos aproveitar esas comidas para involucrar aos máis pequenos dun xeito divertido. Eles serán protagonistas elaborando un dos pratos que se poñan na mesa. Elaborade, por exemplo , un rico postre cos nenos e nenas e que todos os familiares o proben. Tamén poden elaborar un entrante sinxelo ou axudar na elaboración da comida que se vaia facer. Seguro que pasades un momento moi bonito cociñando xuntos, aos nenos e nenas failles moita ilusión que se coman as súas receitas e ademais pásano ben colaborando na tarefas da familia e da casa.
 
Representamos o noso conto favorito xuntos:
Escollemos o conto que máis nos gusta e aproveitamos para contalo todos xuntos. Gustoulle a historia a todos os membros da familia? Que foi o que máis lle gustou a cada un? Por que?
Agora ímonos animar e representalo entre todos. Toca disfrazarse e caracterizarse!! Veña, vai ser moi divertido!!! Cada membro da familia representará a unha personaxe (tamén poden representar máis cambiando o disfrace) ;)
 
Cápsula do tempo da familia:
Estamos a vivir un momento histórico que contaremos ás futuras xeracións polo que podemos gardar na nosa cápsula do tempo as nosas vivencias durante a corentena en familia. Como viven os peques a situación e como o queren contar, polo que poden meter debuxos do que fixeron en familia, fotos dos momentos xuntos na cuarentena, os irmáns maiores e os pais poden escribir unha carta contando as vivencias positivas que sacaron de todo isto e que poderán ler todos xuntos dentro de moito tempo. Podemos recopilar tamén as mensaxes de ánimo que elaboramos ou nos quixeron dar a nós, como por exemplo os arcos da vella que fixemos, algún recorte de xornal,
Todo isto metémolo nunha caixa adornada por toda a familia e a agocharemos nun rinconciño dun armario, sótano ou baixo terra no xardín.
 
Xogamos a adiviñar! :
Aproveitemos esas reunións familiares para realizar xogos divertidos e adiviñas. Cada membro da familia pode representar mediante a mímica un animal, personaxe coñecido, imitar a outro membro da familia para averiguar de quen se trata, representar unha historia para averiguala entre todos, un conto, unha película…
Veredes que divertido é intentar adiviñar o que realizan co seu corpo os demais sen falar!
 
 
Todas estas actividades son ideas para que podades gozar do tempo en familia, de reencontrarse cos seres queridos aos que fai tanto tempo que non viamos, e de sacar un sorriso e ver o lado positivo de toda esta experiencia que tivemos que vivir.
Podedes facer algunha, todas ou simplemente gozar dos paseos xuntos aos aire libre, dos paseos en bici, de plantar… GOZAR DA NOSA FAMILIA!!!!!!
 
 
 
 
 
 
PERO...NON VOS ESQUEZADES DA GRAN FAMILIA QUE TEMOS NO COLE TAMÉN!!

 

Quixemos facervos este vídeo para que non vos esquezades do importantes que son os nosos amigos e amigas e os vínculos tan fortes que formamos no cole.
 
 
 
 
Botámosvos moitísimo de menos, esperamos que vos guste este pequeno recordo de todo o que aprendemos e avanzamos xuntos, porque…
 
As profes quérenvos moito!

 

 

 

Lectoescritura con contos

 

Bo día familias!
 
Hoxe vos deixamos un vídeo con todos os vosos traballiños cos contos. Esperamos que o disfrutedes :)
 
 
Ata mañá!!

 

Celebramos o día das letras galegas :)

 

Ola familias, como cada mércores estamos actualizando o blogue. Hoxe imos coñecer a Ricardo Carvalho Calero, autor que eloxiamos este ano no día das letras galegas, o 17 de Maio.
 
 
Primeiro de nada, coñezamos este autor. Para iso indaguemos pola Internet con axuda da nosa familia. Escribimos o seu nome, apelidos, buscamos onde viviu e por último debuxámolo.
 
Agora que lle poñemos cara imos ler un dos seus relatos.
Imos aló!
Este é o conto co que vamos traballar:
AS PITAS BAIXO A CHOIVA
Velaquí o podedes ver:
 
 
O autor fala das pitas, ti saberías debuxar unha e poñer as partes dunha galiña?

 

E como será o galo máis antigo? Sabes?
 
Agora imos facer unha secuencia de 6. Debuxamos 6 cadrados nun folio, agora poñemos a cada cadrado un número: 1,2,3,4,5 e 6 (nunha esquiniña). En cada cadro vamos poñer un debuxo para contar a historia da nosa pita. A historia podes inventala ti ou basearte na do conto. Iso si, ponlle un nome a túa galiña.
Non te vaias esquecer!
 
Vamos indagar máis sobre as galiñas, a ver canto sabemos delas. Cal é o ciclo de vida das galiñas?
Fai un círculo grande nun folio ou cartolina e agora reparte dentro do círculo a vida das pitas: de onde nacen, como saen, como son de “pequeniñas” todo o proceso ata chegar a ser unha galiña.
Si che apetece podes facer un círculo do mesmo tamaño e cortarlle un cachiño (modo quesito), podes enganchalos polo centro cun encadernador, deixando o debuxo abaixo e así podes xiralo e ver soamente a fase de crecemento da galiña que che interesa.
É unha boa técnica para despois contarllo a outra persoa, así non pode ver o que pasará.
 
Tal que así pero coa pita, a ver que sae. Seguro que cousas moi interesantes.

 

 
 
Por último, que vos parece si facemos unha pequena rima coa palabra pita ou galiña?

 

Van saír rimos moi interesantes.
 
 
Por outra banda deixámosvos as tarefas de inglés:
3 anos:
- Paint the clown with colours.
- Song: Red, yellow, green and blue!:https://supersimple.com/song/red-yellow-green-blue/
 
4 e 5 anos:
- Transportation 1: sinalar o debuxo e dicir o nome.
 
 
- Transorpation 2: contar os medios de transporte e sinalar o número correspondente. Por exemplo: one car, two cars, three cars, four cars...
 
 
- Song: Vehicles!:
 
- Song: Driving in my car!
 
Podédeslle mandar as tarefas ao teacher ao seu correo: 
jatobv87@gmail.com

Ademáis, lembrade que tedes moitas máis propostas na páxina de aulas galegas por se lle queredes botar un ollo: https://aulasgalegas.org/category/infantil_3_a_6/

 
Seguimos en contacto en virxedacelainfantil@gmail.com
 
Ata o venres peques, moito ánimo!
 
 

 

 

 

Por catro esquiniñas de nada

 

Bo día familias!
Hoxe imos continuar traballando os contos con diferentes propostas que podedes adaptar ou escoller para facer cos peques :)
Hoxe tócanos o conto de “Por cuatro esquinitas de nada” que fala sobre a amizade, a aceptación das diferenzas, a exclusión e a empatía.
 
Neste enlace podedes visionalo:
 
 
 
 
 
Aquí tedes as propostas para hoxe:

 

 
 
1. Xogamos coas emocións. O adulto pode facer preguntas sobre as emocións do cadradiño. Por exemplo: como cres que se sinte cadradiño? Por que? Que solución lle deron os seus amigos os círculos para que deixara de sentirse así? Ti que outras solucións lle darías?…
Agora representaremos con mímica e co corpo ditas emocións. Poñer cara triste, alegre, enfadada…
Escribe todas as emocións nun papel, non vos olvidedes de poñer o voso nome en minúsculas. Os nenos e nenas de 4 anos poden buscar as vogais de cada palabra, rodealas e escribilas en minúscula. Os demais, ou quen se anime, poden escribir todas as palabras en minúscula.
 
 
2. Facemos figuras xeométricas. Podemos debuxar e colorear un cadrado e un círculo. Que outras figuras xeométricas coñeces? Debuxa e colorea un rectángulo, óvalo, triángulo ou rombo.
Agora busca pola túa casa obxectos que teñan esa forma e clasifícaos en grupos. Tamén podes xogar con estes obxectos e facer series, primeiro con dúas formas (por exemplo alternando círculo-cadrado-círculo-cadrado…) e logo aumenta a dificultade con máis formas.
 
 
3. Estampamos figuras xeométricas. Podes buscar pola casa caixas ou envases con esas formas para pintalos e poder estampar con eles nun folio ou podes crear ti as figuras cun cartón, pintalas e logo estampalas para crear as túas propias figuras xeométricas.
 
 
 
4. Traballamos as texturas do conto. Imos buscar pola casa diferentes texturas como a parede, a corteza dunha árbore, follas... poñemos un papel por encima e frotamos coa cera para ver as diferentes texturas. Tamén podemos crear diferentes texturas coa nosa pintura mezclando a témpera con fariña, sal, area… e pintar con ellas.
 
 
 
 
 
 
 
 
 
Tamén vos deixamos as tarefas de música:
 
IMOS DE CONCERTO!
 
Xosé Lois Romero e Aliboria – Concerto – Caroi – 21 de maio de 2017
 
Podédeslle mandar as tarefas ou poñervos en contacto con Mercedes no seu correo: dosinda@edu.xunta.gal
 
 
 
 
 
As tarefas de relixión:
 
 
 
Podédeslle mandar as vosas tarefas ao correo de Noelia: matarranz@edu.xunta.es
 
 
 
 
 
 
Seguimos en contacto en virxedacelainfantil@gmail.com
 
Ata o próximo día!
 
 
 

Topito terremoto!

 

Bo día familias!
Hoxe continuamos traballando de forma lúdica cun conto.
Tócanos coñecer a “Topito terremoto!”
 
Aquí tedes o enlace para visionalo:

 

 
 
Este conto relacionado coa intelixencia emocional é moi divertido e trata temas como a hiperactividade, as etiquetas negativas ou a canalización da enerxía.
 
No día de hoxe imos traballar a CONCIENCIA FONOLÓXICA. Este aspecto é fundamental traballalo xa que é o paso previo para adquirir unha boa lectoescritura. Os nenos e nenas deben comprender que a linguaxe é oral e ten sons, polo que é moi importante que ademais de coñecer o nome dunha letra a relacione co seu fonema, o seu son.

 

 
 
 
Para iso imos traballar unha serie de xogos:
 
1. Rimas: No conto vemos como a toupiño os seus amigos lle poñen moitas etiquetas negativas polo que el está moi triste. O primeiro que faremos é elaborar unha listaxe con esas etiquetas: Inquieto, nervioso, inseguro, plomo, hiperactivo, impulsivo, impaciente…Escríbeas e, solo se te ves animado, podes empregar as minúsculas. Vai dicindo en alto como sona cada letra.
Cres que estas etiquetas son boas para toupiño? Son certas? Como cres que se sinte? Que podemos facer para que se poña contento?
Imos elaborar unha listaxe con palabras positivas que lle podemos dicir a toupiño (por exemplo alegre, anérxico…) para que se sinta mellor. Escribe esta lista tamén.
 
Agora imos traballar a conciencia fonolóxica facendo rimas!
Colle a listaxe das etiquetas negativas, ves algunha que rime entre sí? Une ou rodea. Hai algunha que rime coa listaxe de palabras positivas que fixeches? Une ou rodea.
Agora busca palabras que rimen con cada unha das palabras das túas dúas listaxes.
 
 
 
2. Palmadas coas sílabas:A maiores de todas as etiquetas anteriores, no conto se traballa moito vocabulario relacionado coas emocións. Ímos traballar un pouco con estas palabras.
Elabora outra listaxe e se te animas escribea co seguinte vocabulario (vai dicindo en alto como sona cada letra e como sonan formando as sílabas): Calma, atención, alegría, arriba, abaixo, enerxía, turbo, bo, creativo, soño, temor, marabilloso, relaxación, concentrado e motivado.
Coñeces o significado de todas estas palabras? Explícaas coas túas palabras ou represéntaas co teu corpo.
Agora imos xogar con elas, temos que dicir cada palabra en alto e dar palmadas por cada sílaba. Contade cantas sílabas ten cada palabra e escribe o seu número debaixo, busca cal é a máis longa e cal é a máis curta, tes que dicirllas a un adulto ou rodealas se as escribiches previamente.
 
 
 
3. En busca de sons: Vamos escoitar con moita atención o conto de novo, poñendo atención nos sons das palabras. Por exemplo, en busca de palabras co son da letra R: terremoto, turbo, rompe, carril… Para facelo máis sinxelo, a persoa que vos axude pode escoller varias palabras do conto e despois que o neno ou nena teña que buscar nelas o son que se pide: R, S,T,L… Rodea, subraia, tacha…
 
 
 
4. Xogamos co nome: Todos os nomes comezan por unha sílaba; non si? Pois imos utilizala para xogar. Primeiro escribimos a primeira sílaba do noso nome e logo completamos a palabra con outras sílabas para formas novas palabras
Podes debuxar ao seu carón o que escribiches.
Sería así:
GEN……GENTIL
SAN….SANDÍA
 
 
 
* O IMPORTANTE destes xogos é traballar a conciencia fonolóxica cos nenos e nenas polo que se non lles apetece escribir estas listaxes simplemente poden dicilas e xogar coas rimas e as sílabas.
 
 
 
Para rematar, Topito Terremoto tiña que entregar un traballo de fin de curso.
Imos nós facer un.
Que vos parece se facemos un debuxo? Fixádevos que os debuxos do conto son como de cartón…animádesvos a facer un debuxo con cartóns.
(Facer as figuras con cartón, facer o debuxo en tres dimensións, Debuxar no propio cartón… o que vos guste máis).
Esperamos impacientes por esas obras.
 
 
 
Ata a próxima semana, que pasedes bo fin de semana!
 
Seguimos en contacto en virxedacelainfantil@gmail.com
 

 

Así é o meu corazón

 

Bo día familias, como ides? Volvemos co noso blogue propoñendo unha serie de actividades co conto
ASÍ ES MI CORAZÓN”
Velaquí tedes a ligazón para velo:
 
 
 
 
 
 
Agora imos escribir a un lado do folio, con letras minúsculas se vos animades, as emocións que experimenta a protagonista do conto (enfadada, triste, contenta, medosa...). Logo debuxamos na outra parte, ao carón da emoción correspondente, a forma do corazón e cor da que nos fala a nosa protagonista.
Volve ver o conto para fixarte nas formas!!
 
 
 
 
 
Seguro que na casa tes un montón de xornais, revistas, panfletos... que quedaron en desuso.

 

 
Vai en busca deles!
 
Xogo de letras: Recorta letras, moitas letras.... que che axuden a escribir palabras que representen como te sentes neste momento. Por exemplo: entusiasmado, feliz, contenta... o que ti queiras!
Logo, vai pegando as letras para ir formando as palabras. Podes volver a escribilas con letras minúsculas debaixo.
 
Veña ti podes!!
 
 
 
Collemos distintas témperas de cores ou algún material similar e colocamos tantas pegadas do dedo polgar como letras teñan as palabras que imos escribir. As palabras son os animais que aparecen no noso conto.

 

Cantos animais contaches? E cantas letras ten cada animal?
 
Colle cores clariños para que se vexan as letras!!
 
 
 
Despois de facer este traballo relaxámonos facendo o noso corazón colgante. Precisamos:
- Un cordón ou fío.
- Cartolinas ou goma eva.
- Pegamento.
- Lápis e goma

 

Fixámonos nas cores dos corazóns do conto e facemos nós tantos como teña o libro. Todos do mesmo tamaño, fai o primeiro e cálcao e así sucesivamente.
 
Agora para que se vexan todas as cores temos que ir facendo corazóns de máis grandes a máis pequeniños nos que fixemos anteriormente... así veranse todos cando os xuntemos ( debemos colocalos os que teñan os corazóns máis grandes abaixo e encima os máis pequenos).
Podemos xuntalos de varias formas; pegalos ou ven facer un buratiño arriba por onde metemos o fío que nos permitirá colgalo, como prefirades.
Ao gusto de cada un podemos poñer purpurina, pegar brillantiños, debuxar cariñas... o que máis vos chame á atención.
 
Xa temos o noso colgante feito!!
 
 
Finalmente, de que cor é o teu corazón? Iso nos preguntan no conto. Escollede unha cor ou varias e debuxádeo. Logo poñede debaixo unha mensaxe, palabras, emoticonos...que exprese o motivo desa ou desas cores.
 
Seguro que saen uns corazóns ben coloridos!!
 
 
Que vos parece se para rematar as tarefas con este conto elaboramos unha lista de palabras que nos axuden a mellorar aquelas emocións máis negativas que aparecen no conto, como pode ser o enfado.
Entre todos e todas seguro que atopamos moitas palabras que nos axuden a que se nos pase ese enfado que nos pon as meixelas vermellas.
 
Ánimo peques!!
 
 
Tamén vos deixamos as tarefas do teacher José:
Imos repasar os estados de ánimo (happy, sad, angry, bored, etc.). Podemos facer conversacións tipo:
- How are you?
- I am happy/sad/relaxed/angry.
 
 
 
Se podedes imprimide o documento, o neno/a pode sinalar a súa resposta (se responde "sad", sinala a
imaxe correspondente).
 
E tamén imos repasar os animais, podendo facer conversacións tipo:
- Where is the rabbit/elephant (onde está o coello/elefante?)
 
- The rabbit/elephant is here (o neno/a contesta e sinala a tarxeta correspondente).
 

 

 

 
E tamén van varias cancións:

 

 
- How are you?
 
 
 
- Yes, I can.

 
 
 
 
 
Lembrade tamén visitar o blogue da profe Ruth:
Ata moi pronto

 

AVISO PARA AS FAMILIAS

Boas familias!

Queremos informarvos que o Venres día 1 de Maio e o Luns 4 de Maio son días non lectivos para o noso centro polo que non haberá actividade no blogue nin teredes tarefas para ditos días.

 

Podedes continuar coas propostas de actividades do conto da Ovelliña que veu cear ou facer algunha actividade doutros días colgadas no blogue. Ademáis, animámosvos a facer as tarefas dos especialistas.

 

Tamén podedes seguir consultando a web de Aulas galegas se buscades algunha idea máis de actividades para facer cos nenos e nenas este fin de semana

https://aulasgalegas.org/category/infantil_3_a_6/

 

 

Desfrutade moito estes días en familia e non vos olvidedes de movervos e xogar moito!!

Moitísimo ánimo!

 

Seguimos en contacto en virxedacelainfantil@gmail.com

 

Distribuir contido


by Dr. Radut