Desde o Equipo de Biblioteca queremos conmemorar o día do nacemento de Rosalía de Castro, 24 de febreiro, compartindo con toda a comunidade educativa do CEIP A Solaina un Genially que recolle algúns aspectos básicos da vida e obra da poeta galega.

O 21 de febreiro celébrase o Día Internacional da Lingua Materna para promover a consciencia sobre a pluralidade lingüística. Na imaxe podes acceder á proposta do Portal da Lingua Galega.

Desde o equipo de Dinamización da Biblioteca Escolar do CEIP A SOLAINA, queremos conmemorar esta data, publicando aquelas obras literarias infantís e xuvenís que contan a vida de mulleres que destacaron no eido da ciencia, e que temos dispoñibles para o alumnado e que traballarán nos vindeiros días.

Unha colección ilustrada e educativa que pon de manifesto as numerosas contribucións das mulleres no eido das matemáticas, as tecnoloxías, as ciencias, o coidado do medio ambiente... coa finalidade de loitar por un mundo mellor.

Este sábado, 24 de outubro, celébrase o Día Internacional da Biblioteca. Desde a Biblioteca Pública Municipal de Narón, propóñennos participar nunha serie de actividades na Praza de Galicia desde as 11 da mañá. É necesaria a inscrición previa. Animádevos a participar!

E para ir facendo boca convídannos ás persoas maiores de 16 anos, o mércores 21, a un obradoiro práctico con Pedro Brandariz, titulado Como contar contos?

LETRAS GALEGAS 2020

RICARDO CARVALHO CALERO

O día 17 de maio é para os cidadáns e cidadás galegos o Día das Letras Galegas desde que, en 1963, a Real Academia Galega (RAG) decidiu dedicarlle esta data a un autor ou autora que destacase na defensa e promoción da lingua e cultura de noso. Este 2020, a RAG tomou o acordo de honrar nesta celebración a Ricardo Carvalho Calero (Ferrol, 1910 – Santiago de Compostela, 1990), de quen a douta institución salienta o seu compromiso galeguista, que o levou mesmo a sufrir cárcere tras a guerra civil; a súa faceta de creador literario nos eidos da poesía, da narrativa e do teatro; o seu labor no campo da historia literaria galega, do que pode considerarse fundador coa monumental Historia da literatura galega contemporánea (1963); o feito de ser o primeiro profesor e catedrático universitario de Lingüística e Literatura Galega e a influencia, nos últimos anos da súa vida, das súas ideas sobre a lingua propia de Galicia. A traxectoria de Ricardo Carvalho Calero pode rastrexarse nas numerosas institucións e entidades vinculadas á lingua e á cultura galegas das que formou parte ou que recoñeceron o seu labor. Foi membro do Seminario de Estudos Galegos, do Partido Galeguista, da Real Academia Galega e da Academia de Ciências de Lisboa, ademais de membro de honra da Asociación de Escritoras e Escritores en Lingua Galega e da Associaçom Galega da Língua (AGAL); dirixiu o colexio Fingoi; participou activamente nas actividades do Grupo Galaxia; foi recoñecido coa Medalla Castelao da Xunta de Galicia (1984) e declarado Fillo Predilecto de Ferrol (1990) ano no que finou.

POEMAS CANTADOS

Vídeo elaborado polo IES de Arzúa para achegarnos á figura de Ricardo Carvalho Calero:

Atrévete a xogar con Carvalho Calero (AGAL)

Infantil e Primaria

Organizado polo equipo da Biblioteca, o escritor madrileño Pedro Mañas visitou o noso centro. O alumnado de 4º descubriu a súa obra e coñeceu en persoa os avatares da súa biografía, realizando unha bateria de preguntas ás que o autor respondeu con satisfacción, sobre todo as preguntas relacionadas co libro que tan ben coñece os noso alumnado, Apestoso tío Muffin. Pincha no enlace para ver as fotos do evento.

O xoves 5 de abril contamos coa presenza do autor Chinto na Biblioteca do centro. Falounos dos seus últimos libros: Minimaladas e Novas minimaladas. Podes ver no enlace a reportaxe fotográfica co alumnado de 3º nesta animación á lectura.

Hoxe, 3 de abril, o alumnado de 6º curso da Solaina puido asistir a unha animación á lectura con María Canosa, escritora e, entre outras cousas, colaboradora do programa Coma un allo. Escoitamos a versión persoal sobre o seu libro Muriel e fixémoslle unha morea de preguntas. Podes ver as imaxes no enlace.

Do 6 ao 10 de marzo celébrase nos centros educativos galegos a 29º edición da Semana da Prensa na Escola. Na Solaina dámoslle visibilidade uns días máis para que o alumnado e o resto da Comunidade Educativa se familiaricen tanto coa prensa escrita coma a dixital, sempre tendo moi en conta o espírito crítico que se espera do fomento da lectura en forma de prensa, analisando e contextualizando as noticias que van saíndo estes días. Igualmente no hall temos instalado un acceso directo ás distintas formas de prensa.