Skip to Content

Fontán. O primeiro rostro de Galicia

O alumnado de 3º e 4º ESO asistiu hoxe na biblioteca á proxección do documental ‘Fontán. O primeiro rostro de Galicia’. A peza audiovisual trata sobre a figura do matemático e xeógrafo Domingo Fontán, autor da Carta Xeométrica de Galicia, mapa físico realizado entre 1817 e 1834, considerado como o primeiro mapa topográfico e trigonométrico feito en España con métodos científicos e medicións matemáticas.
A proxección estivo precedida por unha introdución e seguida por un coloquio a cargo de parte do equipo realizador, Kaito Estudios. Ao remate do acto, o alumnado puido manipular instrumental para medir distancias e ángulos, similar ao utilizado por Fontán, e unha reprodución da Carta Xeométrica.
Esta actividade foi facilitada polo Concello de Fisterra.

Día do Libro

Chegou o Día do Libro, e como o celebramos nós? Recomendando lecturas, posando coas nosas suxestións na biblioteca, e recibindo como agasallo un marcapáxinas personalizado.

Ver montaxe

Día de Rosalía

O xoves 23 celebramos o Día de Rosalía con varias actividades. Seguindo a proposta da AELG, elaboramos o cartel-mural "Rosalía contra a inxustiza" cunha selección de recortes de prensa recollidos polo alumnado nas sesións de titoría. Durante o recreo puidemos escoitar a través da megafonía un recital poético protagonizado polo alumnado, e repartimos poemas de Rosalía e chapas realizadas por alumnas do Equipo de Voluntarias da biblioteca.

Entroido 2023

Despois de catro días seguindo os "mandadiños do Entroido", o venres chegou o día grande da celebración no IES Fin do Camiño: degustación de manxares propios destas datas, desfile de disfraces cun animadísimo acompañamento musical a cargo de alumnado de 2ºESO e premios para o mellor disfrace individual (Xusto), mellor disfrace en parella (Paula e Adrián), mellor disfrace en grupo (Irene, Lucía e Valeria) e mellor comparsa ou clase máis participativa (3ºA coa súa arca de Noé Valdi). Parabéns a todas e todos!!

Ver imaxes

Día da Paz

Durante o recreo do luns inaugurouse o mural que dá visibilidade aos haikus pola paz realizados durante a semana pasada polo alumnado do centro en galego, castelán, francés e inglés, mentres parte do alumnado de 2º ESO interpretaba coa flauta Imagine, de John Lennon. O espazo ocupado polo mural serviu como photocall para que os diferentes grupos posasen.

Ver imaxes

DigitalWeek

Hoxe o alumnado de 4º ESO remataba a súa estancia no Complexo Xuvenil As Mariñas en Bergondo, despois de gozar dunha semana de inmersión lingüística en inglés con actividades dixitais, xogos, veladas... e facer novos amigos e amigas doutros centros de Galicia.

25-N

O noso centro participou onte no acto organizado polo Concello de Fisterra para conmemorar o Día Internacional para a Eliminación da Violencia contra a Muller. Alumnado de 1º ESO leu un manifesto e fragmentos de varios libros relacionados con este tema; proxectouse un vídeo no que Carla interpretou La puerta violeta de Rozalén, acompañada de Iván á guitarra; e rendemos homenaxe ás mulleres asasinadas durante este ano, colocando estrelas co nome de cada unha delas.

Ver vídeo

Ver imaxes



by Dr. Radut