O mércores 23 celebramos o Día de Rosalía con varios obradoiros: un obradoiro de rap coa Vella Escola para o alumnado de 1º ESO, un de dramatización con Marta Lado para o alumnado de 3º ESO e un de poesía con Lucía Aldao e María Lado (Aldaolado) para 2º e 4º ESO. Ademais houbo agasallos para todo o mundo: un poema de Rosalía e chapas deseñadas e elaboradas polo alumnado de 4º na materia de Plástica.
Este venres durante o recreo gardamos un minuto de silencio, portando unha pancarta na que se incluían uns versos de Bernardino Graña, para amosar a nosa solidariedade coas familias dos mariñeiros e tripulantes vítimas do naufraxio do Villa de Pitanxo. Como integrantes dun centro localizado nunha vila mariñeira, compartimos dun xeito especial a súa dor.
Onte o alumnado de 2º, 3º e 4º ESO realizou unha excursión á Coruña, na que visitou a Casa das Ciencias e o Aquarium Finisterrae.
O alumnado de 2º, 3º e 4º ESO participou onte nunha excursión a Santiago, na que asistiu no Auditorio a un concerto didáctico da Real Filharmonía de Galicia baixo o título Das tebras á luz. Visitou tamén o MUPEGA e a Cidade da Cultura.
Onte participamos, xunto cos outros centros educativos da vila, no acto convocado polo Concello de Fisterra con motivo do Día Internacional da Eliminación da Violencia contra a Muller. O alumnado de 1º e 2º ESO portou unhas candeas por cada unha das mulleres asasinadas este ano, o de 3º ESO elaborou unha pancarta, e representantes do club de lectura de cada curso leron fragmentos de diferentes obras relacionados con este tema e un breve manifesto. No acto participou tamén o poeta Alexandre Nerium.
O Samaín volveu ao IES Fin do Camiño! Despois da paréntese imposta o curso pasado pola COVID-19, espíritos do alén e outros seres sinistros fixeron acto de presenza no centro... quizais atraídos pola convocatoria de varios concursos: de disfraces individuais e en grupo, de decoración de aulas, de minivídeos de terror...
Hoxe tivo lugar no noso centro unha xornada de presentación da 1ª Liga Maker Drone de Galicia na que participará parte do alumnado de 3ºESO. Organizada pola Fundación Barrié e a Fundación Instituto Tecnolóxico de Galicia (ITG), é a primeira competición a nivel autonómico que presenta o reto de construír un sistema drone enfocado á solución dun problema social particular.
 |
881 960 528 |
 |
ies.findocamino@edu.xunta.es |
