O pasado día 4 de xuño o alumnado de 6º de Educación Primaria do CPI Ramón Piñeiro e do CEIP do Páramo participaron nunha xornada de acollida e convivencia. O alumnado de 6º destes dous centros remata a etapa de Educación Primaria e inicia unha nova, a ESO. Ademáis o alumnado do CEIP Plurilingüe do Páramo cambia de centro, xa que serán novos alumnos e alumnas do CPI Ramón Piñeiro no vindeiro curso polo que aproveitamos para ter unha xornada de convivencia e que foran coñecendo as instalacións e aos novos compañeiros/as.
Explicámoslles as variacións máis significativas asociadas a este cambio de etapa: máis horas de docencia, profesorado e materias, maior esixencia académica, distinto horario... Pero os cambios non rematan aquí. Coa chegada da ESO, aparece tamén a pubertade, con todos os cambios físicos e psicolóxicos que conleva e que configuran un fenómeno curioso denominado "Adolescencia".
Disto tamén quixemos falar, para axudar ao alumnado a coñecerse e comprenderse un pouco mellor nesta época de tantos cambios. Así pois, contamos coa colaboración da Deputación de Lugo e o médico Miguel Otero para o desenvolvemento dunha interesante charla sobre a "Educación Sexual".
Nesta charla abordáronse temas e conceptos como os cambios físicos e psicolóxicos da pubertade: os órganos sexuais masculinos e femininos, primarios e secundarios, a menstruación, as polucións nocturnas, cambios hormonais...
Tamén se falou de certos contidos que están accesibles na Internet e que non son reais: por exemplo, a industria da pornografía como parte da industria do cine e, que polo tanto, ten unha parte moi grande de ficción que nada ten que ver co que son as relacións afectivos-sexuais reais. Ou a importancia de respetar a orientación sexual, a cal se consolida arredor dos vinteún anos, a diversidade sexual, o abuso sexual ou a igualdade de xénero.
En definita, resultou ser unha actividade moi interesante para o alumnado, que rematou cunha enquisa de valoración da mesma.
