Actividades nas aulas

Hoxe, 23 de abril, conmemoramos o Día do Libro convertindo o patio nun espazo de lectura onde o noso alumnado puido desfrutar ao aire libre da actividade de apadriñamento lector. Este ano os máis pequenos foron os mestres e mestras de cerimonia e escolleron un libro para lerllo ao alumnado dos cursos superiores que, en agradecemento, lle entregou un marcapáxinas que elaboraron como agasallo.

Gozaron da lectura en compañía e fixeron novos amigos e amigas. Feliz Día do Libro!

Dentro do proxecto de centro Vivindo como galegas e galegos e con motivo da celebración do Día Internacional da Muller realizáronse actividades diversas nas aulas e o alumnado de 6º asistiu a unha charla desenvolvida por rapazas e rapaces do IES Álvaro Cunqueiro sobre esta temática.

A biblioteca tamén se sumou a esta conmemoración con exposicións e outros materiais de relevancia. Visita o seu blog

Agardamos que todas estas actividades sirvan de inspiración e motivación ás nosas alumnas e aos nosos alumnos.

O pasado xoves 24 de novembro, o alumnado de 6º, tivo unha sesión de aprendizaxe de redacción de regueifas. Coa axuda da métrica e dunha zanfona, cada alumno creou a súa regueifa, grazas a actividade do Equipo de Normalización da Lingua galega do Concello de Vigo.

Enmarcada no Plan de Benester Emocional, desenvolvimos unha actividade de reflexión na aula sobre as diferentes vivencias experimentadas ao longo destes dous derradeiros cursos. Elaboramos a nosa bandeira particular e sacamos á luz todas as nosas inquedanzas.

Finalmente, o día 30 de maio saímos ao patio a colgar as nosas Bandeiras do Himalaia para que o vento realice o traballo de axitar e esfiañar a tea en sinal de boa fortuna.