Co gallo da conmemoración do 150 aniversario da publicación de CANTARES GALLEGOS de Rosalía de Castro, o alumnado do centro fixo este libro dixital ilustrando algúns poemas desta obra.
O 24 de febreiro celébrase o Día de Rosalía de Castro e a Asociación de Escritoras e Escritores en Lingua Galega (AELG) convidou aos centros de ensino a participar nunha lectura colectiva do seu libro de poemas Cantares Gallegos, con motivo do 150 aniversario da súa publicación.
O noso centro participou nesta actividade coa lectura do capítulo número 17.
ACTIVIDADES DESENVOLVIDAS DURANTE A SEMANA DAS LETRAS GALEGAS 2012
Durante a Semana das Letras Galegas, do 14 ao 16 de maio, desenvolvimos varias actividades culturais. Algunhas delas tiveron como obxectivo dar a coñecer a vida e obra de Valentín Paz-Andrade (homenaxeado no Día das Letras Galegas) e de Celso Emilio Ferreiro (con motivo do centenario do seu nacemento).
Nas seguintes reportaxes podes ver as fotografías e vídeos correspondentes a estas actividades:
Exposición multimedia sobre Valentín Paz-Andrade e Celso Emilio Ferreiro
Valentín Paz-Andrade e Celso Emilio Ferreiro centran a actividade cultural deste ano. Ambos estiveron vinculados á cidade de Vigo e nela pasaron varias etapas da súa vida e ambos loitaron, a nivel persoal e profesional, por defender e dignificar a cultura e a lingua galega.
Valentín Paz-Andrade
(Pontevedra, 1898 - Vigo, 1987)
Este ano dedícase o Día das Letras Galegas a este home polifacético que destacou como xurista, economista, político, empresario, ensaísta, poeta e xornalista. Sempre tivo presente, tanto na súa obra literaria como na súa faceta empresarial, a Galicia e a súa lingua.
Nos seguintes arquivos podes visualizar os carteis, publicados pola Xunta de Galicia, que forman parte da exposición que está ubicada na entrada do edificio principal do colexio e no aulario .
Carteis para Educación Primaria
Carteis para Educación Secundaria
Celso Emilio Ferreiro
(Celanova, 1912 - Vigo, 1979)
Celebramos o centenario deste recoñecido escritor que dá nome ao noso centro. Celso Emilio Ferreiro é a máxima figura da poesía social galega e un home comprometido coa realidade cultural, social e política da súa terra.
Co obxectivo de achegar a vida e obra destas dúas ilustres figuras da nosa cultura deseñamos actividades e recompilamos e creamos materiais para traballar co noso alumnado.
-Exposición multimedia
Percorrido pola vida e obra destes autores a través dos carteis, libros e revistas expostos na entrada do colexio.
Reportaxe fotográfica da exposición
Proxección dunha presentación en vídeo, realizada polo Equipo de Normalización Lingüística do colexio, sobre a vida e obra de Celso Emilio Ferreiro.
Interacción virtual cunha liña do tempo multimedia, realizada polo Equipo de Normalización Lingüística do colexio, sobre a vida e obra de Celso Emilio Ferreiro.
Conferencia sobre a obra musicada de Celso Emilio Ferreiro, impartida polo musicólogo Xaime Estévez Vila, para alumnado de ESO.
Xogos: o departamento de Educación Física deseñou dúas xornadas de xogos e de petanca para desenvolver co alumnado.
Festival das Letras Galegas: O mércores 16 de maio celebraremos este festival no que o alumnado nos fará disfrutar coas súas actuacións.
Programa do Festival das Letras Galegas
Queremos expresar o noso agradecemento a dona Rosario Rodríguez Paz Andrade, sobriña de Valentín Paz Andrade, por colaborar co noso centro co empréstito de libros, revistas e documentación sobre a vida e obra do seu tío.