2. Netiqueta nos foros, e-mail e chats

 
... unhas zurras. Agustín Carracedo. CC BY-SA. Imaxe tomada de Web Máster Comunicaciones [1], adaptada e traducida ao galego

Os foros, o correo electrónico, a mensaxería e os  chats adoitan ter usos e costumes  propios que convén coñecer, respectar... e ensinar.

Foros:

• Evita a tentación de saudar a todos os participantes nos foros agás se eres o moderador e das aos participantes a benvida ao curso, cousa que é recomendable.
  
  
• Cando inicies un tema, escribe un título claro e representativo do contido. Evita títulos imprecisos e xerais como: "Teño un problema"

• Se a túa resposta a unha mensaxe só interesa ao autor non lle contestes no foro senón envíalle un correo persoal.

• Non envíes comentarios innecesarios, só causan perda de tempo e dificultan a localización de mensaxes de maior interese.

• Non volvas preguntar algo que xa se tratou. Antes de preguntar sobre algún tema debes asegurarte de que non fose contestado con anterioridade.
  

• Inclúe suficiente información cando envíes unha pregunta.
  

• Non esperes recibir unha resposta inmediata.

• Se queres mandar unha mensaxe de proba no asunto da mensaxe describe que é unha "Proba, NON ler".

E-mail:

• Se citas parte da mensaxe á que respondes facilitarás aos demais o entendemento da túa contestación pero debes borrar a información que non teña interese para evitar que se perda tempo lendo algo innecesario.
  
  
• Se a importancia da mensaxe o xustifica,  é preferible contestar rapidamente ao remitente para que saiba que leiches a súa mensaxe aínda que lle respondas máis adiante.

• Considérase unha norma de cortesía anunciar no corpo da mensaxe a inclusión dun arquivo adxunto, doutro xeito podería pensarse que é un virus e sería borrado antes de lelo.

• Trata sempre de que os arquivos que achegues ocupen o mínimo posible, xa que moitos usuarios non teñen unha conexión rápida.

• Evita achegar un arquivo cun formato pouco común.
  

Chats:

• Ao entrar envía un saúdo conciso e correcto e considérate benvido por todos cando o moderador conteste ao teu saúdo.
  
  
• Antes de intervir, espera uns momentos ata ver que se está a tratar na charla.
  
  
• Ao saír envía unha despedida curta e correcta, sen esperar nada máis que unha despedida do moderador.
  
  
• Cando envíes unha mensaxe non esperes a escribilo completo antes de envialo, senón que cando escribas unhas cantas palabras, vai enviándoas para que os teus interlocutores poidan ir lendo a mensaxe sen ter que esperar a que estea completa.
  
  
• O resto de participantes na charla actuará de forma similar polo que cando un partícipe deixe unha frase en suspenso significará que está a editar outra liña, polo que se recomenda non o cortar cunha nova frase ou pregunta.
  
  
• Non facer "inundacións" de texto, poñer mensaxes excesivamente longas, nin repetir a mesma frase.
  
  
• Se queres comunicar unha mensaxe a unha persoa concreta, conecta con ela en "privado".
  
  
• Non envíes mensaxes privadas se observas que o destinatario está moi atento ao desenvolvemento da conversación, a menos que a túa mensaxe sexa realmente importante para el.
  
  
• Cando te ausentes momentaneamente, é mellor que conserves a conexión pero advirte aos demais que non estarás durante uns momentos. Cando regreses avísaos cunha mensaxe breve.