Boas a todos/as, agardamos que estes días sexan o máis levadeiros posible para vós, e para as vosas familias. Xa hai un mes que non nos vemos e cada día que pasa o noso reencontro está máis preto.
A actividade física é un medio idóneo para ser capaces de levar mellor estes momentos e por iso temos unha proposta moi completa para estes días nas vosas casas.
Todas as situacións teñen a súa parte positiva e, neste caso, é compartir máis tempo coas vosas familias. Podedes facer todos estes xogos acompañados/as e axudados/as pola vosa xente, nalgúns ata é necesario.
Para explicar a nosa proposta queremos sinalar que:
- Hai 6 documentos (máis abaixo onde pon adxuntos), cada un cunha temática diferente de xogo.
- Todos os xogos son modificables, é dicir, podedes cambiar materiais ou inventarlles normas ó voso gusto. A creatividade é unha parte importante neste proceso.
- Isto é unha proposta, non é obrigatorio que fagades todo, simplemente vos ofrecemos unha serie de ferramentas para que poidades pasar mellor todos estes días.
- Os xogos están encamiñados ás diferentes idades da Ed. Primaria, aínda que algúns en concreto, teñen idades ideais para a súa práctica. Iso non quere dicir que non o poidades facer. Animádevos a explorar todas as propostas.
- Outro aspecto a ter en conta é que a lectura e interpretación dos xogos permitirá mellorar a vosa compresión lectora como se fora un conto, un libro ou calquera tarefa do libro de texto. Isto quere dicir que parte do voso traballo é ser capaces de entender as normas e regras dos diferentes xogos.
- As máis pequenas/os (1º, 2º, 3º curso) poden requirir de axuda de persoas maiores nalgunhas propostas, tamén para poder entendelas.
- Calquera dúbida, inquedanza ou simplemente se queredes compartir con nós unha foto ou vídeo de como facedes calquera xogo, non dubidedes en contactar con nós na dirección xoanderequeixo.efnacasa@gmail.com. Estaremos encantados de que nos manteñades informados dos vosos avances.
Por último, queremos pedir disculpas, sobre todo para aquela xente que non dispón de conexión a Internet, porque algunhas actividades veñen con vídeo explicativo. Estes son todos os medios cos que contamos e procuramos que a maior parte da información fose por escrito para crear as menores dificultades para vós. Aínda así, ás veces faise imposible. Desculpade este aspecto.
Unha aperta enorme a todos/as. Agardamos volver a vervos pronto.
Os vosos mestres de Ed. Física.
JAVI E CRISTIAN
| Adxunto | Tamaño |
|---|---|
| A Zumbar!.pdf | 518.86 KB |
| Actuamos!.pdf | 671.09 KB |
| CAFIBA.pdf | 927.86 KB |
| Escaleiras e serpes.pdf | 1.23 MB |
| Labirinto motor.pdf | 548.7 KB |
| Somos lanzadores.pdf | 721.52 KB |
