CEIP Juan Rey

Un curso máis, o equipo de Sogama, dirixiuse ao centro para achegar aos nosos nenos e nenas ao uso do contedor marrón, xa que dentro de pouco aparecerá nas nosas rúas.

Nesta charla, refrescamos a información que nos presentaron o curso pasado e aclaramos dúbidas que nos xurdiron.

Recordamos a importancia de manter comportamentos ecolóxicos e de coidado e protección do medioambiente.

E saber onde botar cada tipo de lixo que producimos é un primeiro paso.

 Ao finalizar, na hora TIC, os máis maiores seguiron afondando no tema mentres desenvolvían habilidades nas novas tecnoloxías.

EU FUN SEMPRE UN ARGALLANTE

Revista anual

ALIMENTACIÓN SAUDABLE

Neste curso quixemos centrar a nosa atención na promoción de hábitos de alimentación saudables, entre outros obxectivos. Por iso comezamos a nosa labor cunhas charlas dunha nutricionista, coa que organizamos uns talleres deliciosos.

As xornadas foron dirixidas aos nen@s de primaria, adaptándoas aos diferentes niveis.

Cos máis pequeniñ@s (de 1º a 3º) fixemos un breve achegamento aos grupos de alimentos, pirámide de alimentación, inxestas recomendables ao día...

... para rematar degustando un delicioso e saudable aperitivo a base de iogur/xelatina, froitas e froitos secos.

Cos maiores (de 4º a 6º) fíxose unha exposición máis completa, proxectando e falando dos conceptos esenciais da alimentación saudable e equilibrada.

Pero tivéronno un pouco máis difícil que o primeiro grupo, pois os nenos e nenas desta segunda xornada tiveron que demostrar os seus coñecementos cun rosco.

Unha vez superada a proba puideron desfrutar duns saborosos bocadillos.

Días despois, fomos comprobando como as xornadas calaran fondo neles e nelas. Estas foron as súas merendas...

FOI UN ÉXITO!

É certo que cando desfrutamos facendo algo o tempo pasa moi rápido, o sangue flúe máis rápido e o sorriso asoma ás nosas caras. Hoxe quedou demostrado que a creatividade parte do sentimento e da emoción.

Grazas a tod@s por participar!

P.D.: O taller continuará para darlle luz aos días de choiva.

UN PATIO SOSTIBLE

Desde o equipo de Edusostibilidade, quixemos empregar o noso esforzo para incidir no patio, mediante a creación de xogos populares feitos con material de refugallo coas nosas propias mans.

Comezamos elaborándoo coa axuda dos nosos mestres e mestras e pintándoos de bonitas cores.

Practicamos como lanzar os aros.

E, finalmente, quedaron a disposición dos nenos e nenas de infantil para que desfruten del. E foron un éxito!

Continuaremos creando máis!

No primeiro trimestre tivemos a sorte de poder contar co equipo de Sotavento, que nos trouxo e nos achegou un ano máis ás enerxías renovables e á importancia do seu fomento para o medioambiente.

Quixemos que os nosos alumnos e alumnas vivenciasen a forza da natureza e que se concienciasen de que con pequenas accións podemos cambiar a difícil situación que estamos atravesando co cambio climático.

Foron dúas xornadas nas que os nenos e nenas aprenderon e se divertiron moito.

Descubriron como coa luz solar podemos producir enerxía.

Mollando as mans fixeron xirar unhas aspas para percatarse da forza que ten a auga.

Degustaron un chocolate quentiño que o propio sol nos axudou a atemperar.

Teorizaron sobre o mal uso da enerxía nuclear e o desaproveitamento das enerxías renovables.