Informamos que no presente curso 2020/2021 o horario de atención ó público do equipo directivo será o que se detalla na táboa a continuación. Lémbrase que para calquera trámite deberase solicitar cita previa, (ademais de manter as medidas sanitarias vixentes en cada momento).

Infórmase que no taboleiro interior do centro atópanse publicadas as listaxes definitivas de alumnado admitido neste centro para o vindeiro curso 2020/2021. Seguindo a Lei de Protección de Datos, estas listaxes non poderán ser publicadas na web do centro. Non obstante, sinalar que todo o alumnado que solicitou praza nos diferentes niveis de infantil, están admitidos/as e deberán formalizar a matrícula  do 1 ao 10 de xullo de 2020, preferiblemente con cita previa. 

No momento de formalización de matrícula, o centro proporcionará este documento ademais doutras informacións e autorizacións referentes á imaxe, transporte ou comedor. As familias deberán achegar a seguinte documentación no momento de formalización de matrícula:

- Certificado médico de non padecer ningunha enfermidade infecto contaxiosa

- Copia da tarxeta sanitaria do/a alumno/a.

- Copia do boletín de vacinas (de ser o caso).

- 2 fotos tamaño carné.

Para calquera outra información e/ou aclaración deste procedemento, pódense poñer en contacto co centro nos teléfonos 886 151 171 / 886 151 172 en horario de 9:00 h a 14: 00 h.

Infórmase que no taboleiro interior do centro atópanse publicadas as listaxes provisionais de alumnado admitido neste centro para o vindeiro curso 2021/2022. Seguindo a Lei de Protección de Datos, estas listaxes non poderán ser publicadas na web do centro. Non obstante, sinalar que todo o alumnado que solicitou praza nos diferentes niveis de infantil, están admitidos/as  . Tamén poderán consultar esta listaxe accedendo á sede electrónica a través dos diferentes medios de identificación válidos para a mesma (certificado dixital, DNI electrónico ou similar) No vindeiro mes de maio, procederase á publicación das listaxes definitivas. Tras esta informarase do prazo de formalización de matrícula (finais do mes de xuño).

Participación no fondo solidario de libros de texto e convocatoria de axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial en centros docentes sostidos con fondos públicos para o curso escolar 2020/21.

Todo o alumnado que o vindeiro curso 2020-2021 estea matriculado en Primaria poderá solicitar a axuda para adquirir material escolar. A renda per cápita da unidade familiar ten que ser igual ou inferior a 6.000 €. A axuda será de 50 €.

O alumnado que o vindeiro curso esté matriculado en 3º e 4º de Primaria debe solicitar o fondo de libros. O alumnado que realizase reserva de prazo noutro centro deberá presentalo neste último (alumnado de 6º)

O alumnado que reciba os libros de texto comprométese a conservalos en bo estado e devolvelos ao fondo solidario ao finalizar o curso 2020/2021. Os libros asignaranse por orden inverso á renda per cápita da unidade familiar. En caso de cambio de centro o alumnado deberá devolver o lote de libros recibido.

Anexo I 

* Debe ser cuberto e entregado no centro no caso de realizarse de modo presencial (ver modos de presentación). Data límite: 19 de xuño de 2020 (inclusive). 

* Este anexo é válido para a solicitude de axuda para a adquisición de material escolar e de fondo de libros.

* A solicitude será única para todos os/as fillos/as que estean no mesmo centro docente. Indicarase o curso no que estarán matriculados os nenos/as no vindeiro curso.

* Os datos da situación familiar teñen como referencia o 31 de decembro de 2018 (no caso de non autorizar a consulta de datos).

* A renda familiar é a do ano 2018. Sumaranse as cantidades que aparecen nos recadros 435 e 460 e dividirase polo número de membros da unidade familiar.

* Debe entregarse no centro a copia do libro de familia onde figuren todos os membros da unidade familiar.

* De ser o caso, tamén se achegará documentación relativa a separación e/ou divorcio (convenio regulador no relativo a/o menor), discapacidade, situación de violencia de xénero, situación de acollemento  ou certificado do centro de menores en situación de garda tutela ou garda da Xunta de Galicia.

* Os libros entregaranse en setembro de 2020.

* Estas axudas serán compatibles con calquera outra axuda.

Toda a información premendo en D.O.G. de martes, 19 de maio de 2020.

MODOS DE PRESENTACIÓN

Debido á situación sanitaria actual, para a tramitación da solicitude de modo presencial será necesario ter concertada cita previa vía telefónica. Para a recollida da solicitude NON será necesaria

Poderase realizar a solicitude accedendo á aplicación Fondolibros, e unha vez que teñan cubertos todos os datos deberán gardala, obtendo así o número de solicitude, e posteriormente poderán optar polas seguintes formas de presentación:

1) Presentación no centro: Neste caso imprimirán a solicitude e o anexo II e presentaranos no centro (debidamente asinados), xunto coa documentación.

2) Presentación na Sede Electrónica da Xunta de Galicia. Tras el, o centro recibirá aviso das solicitudes achegadas por esta vía.

Para calquera outra información poden chamar ao teléfono do Centro: 886 151 171 en horario de 9:00 a 13:30 horas.

No día de hoxe ben de publicarse a Resolución do 5 de maio de 2020, da Secretaría Xeral Técnica da Consellería de Presidencia, Adminstracións Públicas e Xustiza pola que se dá publicidade a diversos acordos do Centro de Coordinación Operativa da situación de emerxencia sanitaria no territorio da Comunidade Autónoma de Galicia (Cecop) (para ver o texto máis información detallada prema aquí). Nesta Resolución anúnciase o acordo sobre o restablecemento do procedemento de admisión do alumnado do 2º ciclo de Educación Infantil e Educación Primaria entre outros, quedando os novos prazos do seguinte xeito:

• prazo na reapertura de entrega de solicitudes de admisión: do 11 de maio de 2020 ao 18 de maio de 2020
• recollida e entrega de documentación e solicitudes: realizarase dentro do horario normal do centro, no noso caso de 9:00h a 14:00h
• publicación das listaxes provisionais: antes do 9 de xuño de 2020
• publicación das listaxes definitivas: ata o 26 de xuño de 2020
• prazo de formalización da matrícula : do 1 ao 10 de xullo de 2020.

Hoxe, día 28 de abril, saiu publicada a Instrución do día 27 de abril de 2020  da Dirección Xeral de Educación, Formación Profesional e Innovación Educativa para o desenvolvemento do terceiro trimestre do curso académico 2019/2020 nos centros docentes da Comunidade Autónoma de Galicia. (ligazón ao texto da Instrución aquí).

Dende o centro queremos destacar certos aspectos da mesma. O calendario, tarefas do alumnado, labor do profesorado, avaliación e adaptación do currículo son puntos concretos desta instrución que detallamos a continuación no documento adxunto. 

Lembramos que podedes contactar co centro para calquera aclaración.

Dende o centro queremos informar da iniciativa do Concello de Cambados en relación á impresión de material que comezou a organizar na pasada semana xa que algunhas familias non dispoñen de medios para imprimir propostas que se están a facer dende o centro para continuar e reforzar aprendizaxes, aínda que tamén debemos indicar que moitas delas son interactivas e outras pódense faer simplemente copiando, empregando libretas, realizando traballos manuais, etc.

Na xornada de onte, a todas as familias do alumnado de Primaria que dispoñen da aplicación Abalar Móbil chegoulles un aviso desta iniciativa. Cómpre sinalar a importancia de ser responsables co uso e coa solicitude da mesma xa que se trata dun ben común de toda a Comunidade. Por iso pedimos mesura e solicitala sempre e unicamente que sexa preciso.

Para poder acceder a este servizo, as familias interesadas deberán contestar a través da aplicación Abalar Móbil da solicitude da mesma. A comezos da próxima semana (a partir do luns 13 de abril de 2020), porémonos en contacto individualmente con cada un dos responsables para información e/ou achegar a información que sexa precisa sobre esta iniciativa.

 Información sobre o COVID-19 (Coronavirus)

Dende o CEIP Plurilingüe de Castrelo informamos que no centro estase a facer un seguemento de todas as recomendacións e directrices da Consellería de Educación e do resto de organismos oficiais en relación co COVID-19 (coronavirus).

En relación a esto, indicamos que a vida do centro estase a levar con total normalidade a pesar de que se tomarán as medidas hixiénicas propias que sinalan as autoridades sanitarias.

Pedimos a colaboración dende as familias para inculcar hábitos saudables e traballar nas medidas de prevención, así como se se detecta febre ou algún dos síntomas no alumnado ou na familia, nolo poñan en coñecemento e non os traian ó centro.

Para mais información, pregamos consulten a seguinte ligazón:

 http://www.edu.xunta.gal/portal/familiasealumnado/informacion-coronavirus

 Así mesmo, estase a traballar o tema nas aulas co obxectivo de concienciar ao noso alumnado sobre a importancia de adoptar unhas correctas medidas de hixiene persoal na prevención de enfermidades.  Na seguinte ligazón, pódese ver un resumo das medidas a adoptar elaborado polo alumnado de sexto de primaria.

https://ceipdecastrelo.wordpress.com/2020/03/10/en-modo-prevencion/

Derivada da situación de pandemia e de diferentes contextos de ensino que se pudieran dar para o noso alumnado, a Normativa de Organización e Funcionamento do Centro axeitouse a esta nova situación e posibles escenarios en canto deberes e dereitos de todos os membros da comunidade educativa.

Dada a importancia que este documento ten para o funcionamento do centro, convidámolos a que o consulten, ben na Secretaría do Colexio, ben no arquivo adxunto.

O Calendario Escolar para o curso 2019-2020 pódese consultar no seguinte enderezo web:

http://www.edu.xunta.gal/portal/calendarioescolar

Ademais dos sinalados no calendario escolar, serán días non lectivos o 20 de marzo de 2020 e o 4 de maio de 2020, aprobados ambos pola Xefatura Territorial de Pontevedra.