Na programación da miña actividade docente incluíase un taller audiovisual que consistía en que, a partir dun conto coñecido polo alum­nado, faciamos unha montaxe que estribaba en debuxar as personaxes, po­ñerlles voz e montar as escenas. Unha vez rematado, viámolo e faciamos de críticos, para ver os erros e intentar corrixilos. Isto faciámolo en cada aula, cun grupo de alumnos distintos e contos diferentes, pero sempre co mesmo sistema de traballo.

Unha das críticas do alumnado, realizada de modo independente e coincidente por cada grupo de alumnos, foi que as personaxes, aínda que tiñan voz, non tiñan movemento. A partir desta crítica ocorréuseme realizar un taller de animación co grupo de cinco anos. Tiven que documentarme e investigar como facer isto con nenos de tan curta idade.

Dos once contos sobre os que traballaramos nas diferentes aulas, elixín o que a min me pareceu máis sinxelo para intentalo por primeira vez. Era o que traballara cos alumnos de tres anos, que ten por título Que chega o lobo!, cuxo autor e ilustrador é Èmile Jadoul, da Colección Vagalume da Editorial Edelvives.

Este conto caracterízase porque o seu texto non ofrece dificultade e é de doada comprensión e memorización, ten ilustracións orixinais e sinxelas, e unha estrutura encadeada cun final sorprendente para o alumnado.

Brilla polo seu simbolismo e transmite valores de tolerancia, pois reúne a diversos animais dos que adoitamos sospeitar que non é fácil convivir con eles.

1. Os obxectivos que se querían acadar ao final da experiencia eran:

• Achegar o alumnado ao mundo da animación.
• Desenvolver a imaxinación e a creatividade.
• Manexar con destreza os instrumentos tecnolóxicos: cámara de fotos, trípode, ordenador…
• Explorar as posibilidades da súa voz.
• Conseguir a animación das imaxes en fase de produción coa técnica stopmotion.

2. Os contidos e recursos cos que traballamos:

• Uso da cámara de fotos, trípode…
• Imaxes e sons, montaxe.
• Guión, diálogos, storyboard ou deseño de escenas.
• Técnica stopmotion.
• Produción de animacións.

Despois da investigación, presentei as tarefas que tiña que realizar o alumnado en cada aula de 5 anos: elaborar o guión da curta, deseñar as escenas, debuxar as personaxes, montar os escenarios, sesións fotográficas, gra­vación de voces e sons, primeira montaxe, produción, títulos de crédito...

E establecín as sesións necesarias para levalo a cabo:

• 4 sesións de ilustración (1 por aula e personaxe)
• 4 de fotografías (1 por aula e personaxe)
• 1 sesión de gravación de voces e música
• 1 de montaxe en pequeno grupo
• 2 sesións de crítica e proposta de melloras
• E outra, por pedimento do alumnado, moi crítico sempre, para elaborar o logo da produtora e os títulos de crédito.

A aula de informática onde se desenvolveu o taller de animación está provista de cámara de fotos, co seu trípode, e ordenador co seu correspondente software.

3. As actividades levadas a cabo foron así:

• Elaboración do guión, establecendo os diálogos das personaxes.
• Storyboard ou deseño das esce­nas, con debuxos sinxelos, onde marcamos os tipos de planos que se ían realizar.

• Deseño e debuxo das personaxes, con elección e aplicación de co­res, e dos protagonistas.

• Montaxe dos escenarios, coas súas ambientacións de exteriores e interiores.

• Sesións fotográficas, para a toma das escenas e a súa posterior montaxe segundo a técnica de stopmotion.

• Primeira montaxe de cada escena, visión e crítica, que nos levou a variar os escenarios e fotografar de novo, pois ao alumnado non lle gustaba a cor.
• Produción final, pola miña banda e con grupos de catro alumnos.
• Elaboración de títulos de crédito…
• … e do logo da produtora.

4. O resultado final pódese ver completamente no meu blog persoal, na seguinte ligazón: 

5. Valoración da experiencia

A experiencia foi moi positiva como traballo cooperativo das catro aulas de 5 anos do centro.

Con estas actividades acadamos a posibilidade de interactuar cos alumnos, crear, manexar a súa expresividade verbal e emocional.

O alumnado de infantil ten moita capacidade de aprender e de facer máis cousas das que nos pensamos; ademais coñece o uso das ferramentas utilizadas. Neste curso seguimos coa experiencia.

Espero que esta preciosa aventura, compensada sempre ao contem­plar as caras de satisfacción dos nenos que motivan o meu traballo cada día, poida continuar no futuro.