Dende a EEI Do Con, poténciase a transformación dixital da escola para conseguir que sexa dixitalmente competente no proceso de ensino aprendizaxe, de xestión e de relación, o que require dun proceso de mellora das competencias dos membros da comunidade educativa, seguindo tamén as directrices do Plan de Nova Arquitectura Pedagóxica, facendo unha clara aposta por espazos ao servizo dos proxectos educativos, sobre todo vinculados á transformación dixital e que sexan xeradores de igualdade e de inclusión.
Un dos documentos máis afectado pola transformación dixital é o Plan de Lectura, estreitamente vinculado coa biblioteca de centro, espazo favorecedor de aprendizaxes vinculados coa alfabetización múltiple e as competencias ALFI e AMI. Fai xa dous cursos académicos que o centro está nun proceso de renovación pedagóxica estreitamente vinculado coa educación dixital da comunidade educativa. Ao alumnado de infantil hai que ofrecerlle medios motivadores e compensadores de desigualdades, sempre dende unha perspectiva globalizada, eixe fundamental da etapa. Para iso empregamos ferramentas coma: tablets con diferentes APPS (Chatterkids, Sonigrama, Respira....), códigos QR, impresión 3D (doodle3D), edición de vídeo, croma, scratch (http://sketch.metademolab.com), robótica (escornabot, mbot, ozobot...). O centro participa en diferentes programas dos Contratos Programa, así coma o Plan Proxecta, en Voz Natura, estamos pendentes de entrar en PLAMBE e Polos Creativos.
A redacción da Programación Xeral Anual farase nos primeiros días de setembro, o Plan Dixital obríganos a reflexionar sobre aspectos coma: metodoloxía, organización de espazos, atención a diversidade, funcionamento da biblioteca escolar... En relación co Plan de Comunicación Externa e Interna o cambio é salientable, soamente se usarán medios corporativos, tanto para a relación coas familias coma entre profesorado, empregando medios coma: páxina web, aula virtual, abalar...
O Equipo de Dinamización do Plan Dixital da nosa escola está composto por Ana Soto Álvarez (directora e Coordinadora do Plan Dixital) e o resto do profesorado. Ao inicio de curso realizouse un PFPP relacionado co Plan Dixital e, tendo en conta o asesoramento do equipo ADIX Pontevedra 2 e da asesora de xona do CFR de Vigo, seguimos unha serie de pasos: coñecer en que consiste o Plan Dixital, elaborar o cuestionario SELFIE e cubrir a enquisa polas mestras da escola que levan máis cursos, cubrir o test CDD por parte de todo o profesorado para coñecer o nivel de competencia dixital, analizar os resultados obtivos no SELFIE e no test CDD para elaborar o DAFO e elaborar o documento do Plan Dixital tendo en conta os resultados acadados, establecendo os obxectivos do Plan de Acción.
Situación de partida:
En xeral, na escola contamos con conectividade tanto por rede como por wifi pero moi lentas. Dende a UAC infórmannos que temos Fibra 1Gb simétrica. Temos dúas liñas telefónicas, ademais dunha liña RTD alarma e unha liña móbil. Tamén contamos con tomas de rede en cada unha das aulas e despachos, ademais de catro puntos de acceso edu.xunta.es.
Todas as aulas contan con acceso a internet (cable e wifi aínda que non sempre funciona correctamente) e, en algunhas das aulas, altavoz inalámbrico. Na escola temos dous portátiles bastante desactualizados, varios escornabot, mesas de luz, retroproxector e na aula de Inglés cunha PDI móbil. Na biblioteca hai unha PDI fixa, 2 ordenadores para consulta do alumnado de acceso a internet por wifi (que non sempre conectan ben), unha impresora 3D, un altavoz inalámbrico, croma e un portátil desactualizado para o profesorado con acceso ao programa Meiga. Na sala de mestres contamos cun ordenador e un portátil con acceso a internet, unha fotocopiadora e material audiovisual (micrófonos, trípodes, iluminación). En dirección cóntase cun ordenador con acceso a internet, unha fotocopiadora e dous teléfonos inalámbricos bastante deteriorados. Cómpre sinalar que a maioría deste equipamento foi adquirido polo propio centro con dotación da Consellería e da ANPA, salvo algún ordenador de mesa e portátil (dotado pola Consellería).
Na nosa escola empregamos os seguintes servizos corporativos para a xestión docente: páxina web da escola, Aula Virtual, Abalarmóbil, espazoAbalar e a rede social Instagram. Non contamos con ningún servizo de xestión de mantemento do equipamento da escola, salvo a xestión das fotocopiadoras realizado por NEA_. Faise un mantemento de forma básica pola coordinadora TIC e en caso de dúbidas ou dificultades asesorada pola UAC e o asesor ABALAR da zona.
Na nosa escola contamos cun Plan de Continxencia que se pode atopar na páxina web da nosa escola e un Plan de Acollida en dirección onde se recollen unha serie de normas e acceso do equipamento dispoñible na escola.
