1. Datos básicos do centro
O IES David Buján (ies.david.bujan@edu.xunta.gal) atópase no lugar de Sigrás, en Camiño dos Cacharros n.º 1, no concello de Cambre. O Centro leva funcionando dende o curso 1990-1991 e oferta estudos de ESO e bacharelato. É un centro de liña dous en ESO (aínda que nos últimos cursos houbo a necesidade de facer tres grupos nalgúns niveis) e liña tres en bacharelato. Ofértanse seccións bilingües en Matemáticas (en 1º e 2º de ESO), Bioloxía (1º, 3º e 4º de ESO), Física e Química (3º e 4º de ESO), Educación en Valores Cívicos e Éticos (3º ESO) e Tecnoloxías Intelixentes (1º Bac). No No momento de elaborar este proxecto están matriculados no centro 417 alumnos e contamos con 45 profesores.
O centro conta cunha páxina web actualizada onde se publica a información administrativa e educativa máis relevante: https://www.edu.xunta.gal/centros/iesdavidbujan/
2. Contextualización do Plan Dixital no centro. Contribución ao Proxecto Educativo do Centro
Características socioeconómicas e culturais do contexto do centro.
O IES David Buján está situado nun entorno rural, en concreto nunha área con zonas residenciais e fincas agrícolas e gandeiras e a unha distancia de 20 km da cidade da Coruña. A comunidade escolar conserva as raíces e dinámicas do entorno rural: familias vencelladas ao campo, profesións tradicionais, fortes lazos familiares e de veciñanza, relación estreita co centro escolar, etc. Os estudantes proceden maioritariamente de zonas limítrofes; Carral (centro adscrito), Culleredo, Oleiros e Mabegondo, sobre todo no Bacharelato. O nivel socioeconómico é medio e medio-baixo, polo que son familias usuarias de fondo solidario de libros e das axudas de materiais educativos da Xunta. Hai un grupo reducido de alumnado con dificultades: inmigrantes, necesidades especiais de aprendizaxe, risco de exclusión social, dificultades derivadas da identidade de xénero, minusvalías, etnia xitana, etc.
En relación ao equipamento informático, segundo unha enquisa realizada recentemente, a maioría do alumnado conta polo menos cun ordenador por unidade familiar e unha conexión a internet aceptable, aínda que se detectaron algunhas necesidades e alumnos/as en risco de fenda dixital, polo que se están a emprestar kits de ordanadores ultraportátiles con conexión a internet.
Incardinación e contribución do PD ao Proxecto Educativo. Relación con outros Plans e proxectos do centro.
O noso centro leva desde o curso 2011-2012 no programa ABALAR e acabamos de incorporarnos ao programa EDIXGAL. Participamos en diversos programas de innovación educativa nos que o uso das TIC é fundamental para o seu desenvolvemento, como son os Clubs de Ciencia, o STEMBAC e os Contratos-Programa CP-Innova (EDU-innova, EDU-excelencia e EDU-calidade).
No curso 20-21 o proxecto de innovación educativa en dinamización lingüística do EDNL do IES David Buján, "Ler é só o principio", obtivo a consideración de excelente pola Consellería de Educación e foi premiado cunha dotación económica que permitiu adquirir 27 equipos ultraportátiles para desenvolver as actividades do proxecto.
Tamén levamos moitos anos participando en programas europeos (Comenius e Erasmus), moitos deles relacionados co ámbito das novas tecnoloxías. En concreto, durante os cursos 2017-2019 desenvolveuse o proxecto “In the Cloud” baseado nas posibilidades que ofrece a conectividade e o “Internet das cousas” e durante os cursos 2020-2022 participouse nun proxecto coordinado pola Universidade da Coruña para desenvolver o currículo dunha materia de Intelixencia Artificial en centros de secundaria: “Developing an Artificial Intelligence curriculum adapted to European High Schools”.
Contribución do PD á Programación Xeral Anual do curso 23-24.
Os obxectivos que se detallan no plan de acción deste Plan Dixital deberán ser tidos en consideración á hora de elaborar a Programación Xeral Anual do curso 23/23.
3. Breve xustificación do Plan Dixital
A elaboración deste Plan Dixital de centro axústase ao disposto na seguinte normativa:
- Art. 111 bis, Art. 121 e Art. 132 da LO 2/2006, de 3 de maio, de Educación.
- Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022
- Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022
- Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022
4. Proceso de elaboración
Descrición da organización e do proceso de elaboración do PD dentro do Equipo de Dinamización do Plan Dixital:
- Designación da persoa coordinadora e constitución do equipo de dinamización (6 de setembro de 2022).
- Cumprimentación dos cuestionarios Selfie (dende o 29 de novembro ata o 17 de decembro para o profesorado, equipo directivo e alumnado de bacharelato; dende o 9 de decembro ata o 17 de decembro para o alumnado ESO).
- Cumprimentación do Test CDD en Fprofe (dende o 8 ata o 28 de febreiro de 2022).
- Actividade de formación DAFO para todos os membros do equipo de dinamización (17 de marzo de 2022).
- Elaboración do DAFO (entre o 23 de marzo e o 7 de abril de 2022)
- Actividade de formación Plan de Acción para todos os membros do equipo de dinamización (20 de abril de 2022).
- Elaboración do Plan de Acción (entre o 20 de abril e o 11 de maio de 2022).
- Elaboración do resto de apartados do Plan Dixital para obter a versión 1.0 do PD do IES David Buján (entre o 31 de maio e o 12 de xuño de 2022).