Contextualización do Plan Dixital no centro.
O ámbito de influencia do centro ten un carácter eminentemente rural e con baixa densidade de poboación. A actividade predominante no concello é a agrícola e gandeira, sendo alumnado procedente de familias de nivel socioeconómico medio-baixo. O propio centro está incluído no grupo ISEC, Índice Socioeconómico e Cultural, no nivel medio baixo. Dito índice ten en conta variables como a situación laboral e profesional das familias e os recursos culturais e materiais no fogar.
A situación da pandemia vivida nos cursos pasados obrigounos a recoller datos de conectividade na contorna do alumnado e de infraestrutura dixital no ámbito familiar. Detectamos un total de 54 familias (30%) do total que indicaron ter:
- Problemas de conectividade derivados de: zona sen cobertura ADSL ou fibra e mesmo zonas de sombra con cobertura de móbil nula ou escasa.
- Carecer de equipamento de conexión a internet nos fogares ou unicamente conexión por medio de uso de datos de telefonía móbil moi limitados
Podemos constatar a fenda dixital existente na contorna do noso centro relacionada principalmente coa falta de coñecementos de informática e habilidades necesarias para participar na sociedade da información acentuado pola falta de infraestrutura que afecta a boa parte da zona rural do Concello de Touro.
Incardinación e contribución ao proxecto educativo.
O noso centro ten unha tradición irregular pero longa de emprego das TIC. Dispoñemos de conexión á internet e aula de informática desde o ano 1999. No ano 2006 creouse a páxina web do centro,e, vinculada a ela, a aula virtual.
Desde o curso 10/11 participamos no proxecto Abalar. No curso 15/16 comezamos a empregar a aplicación abalarmobil. Desde o curso 18/19 contamos coa plataforma dixital educativa Snappet. No ano 2020 solicitouse Edixgal, manténdose en 5º e 6º de primaria.
Outros proxectos: PLAMBE, programa Meiga, blogs de biblioteca e dinamización lingüística, participación no programa navega con rumbo, radio na biblio, etc.
Breve xustificación do Plan Dixital de Centro.
A realización do Plan Dixital do Centro é o instrumento de transformación que ten que elaborar o centro educativo para abordar o cambio que propón o Marco Europeo para Organizacións Educativas Dixitalmente Competentes (DigCompOrg). Deste xeito, o Plan recollerá as principais ideas, marcará as prioridades e establecerá os niveis de planificación que determinarán a misión, visión, valores e estratexia da organización escolar co obxectivo de avanzar na dixitalización da organización escolar.
Na Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022, indícase que:
A Lei Orgánica 2/2006, do 3 de maio, de Educación, regula diferentes aspectos relacionados coa competencia dixital e a innovación educativa, así no artigo 121 establece que o proxecto educativo do centro recollerá, entre outros aspectos, a estratexia dixital do centro, de acordo co establecido no artigo 111 bis, no que se establece que as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e na aulas.
O artigo 132 da devandita Lei establece como competencias dos directores e directoras, entre outras, exercer a dirección pedagóxica, promover a innovación educativa e impulsar plans para a consecución dos fins do proxecto educativo do centro; e fomentar a cualificación e formación do equipo docente, así como a investigación, a experimentación e a innovación educativa no centro.
A disposición adicional quinta da Resolución do 17 de xuño de 2021, da Secretaría Xeral de Educación e Formación Profesional (DOG 30 de xuño), pola que se ditan instrucións para o desenvolvemento das ensinanzas de educación infantil, educación primaria, educación secundaria obrigatoria e bacharelato no curso académico 2021-2022, e na disposición adicional terceira da Resolución do 18 de xuño de 2021,
da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de formación profesional do sistema educativo no curso 2021-2022 sinala que os centros docentes elaborarán no curso 2021-2022 o seu Plan Dixital de acordo coas instrucións que se diten.
En liña coas orientacións establecidas no Plan de Recuperación e Resiliencia da Unión Europea e no marco do Plan de Acción de Educación Dixital (2021-2027), a Consellería de Cultura, Educación e Universidade persegue a transformación dixital dos centros educativos de Galicia como organizacións a fin de que sexan dixitalmente competentes nos procesos de ensino-aprendizaxe, de xestión e de relación o que require de un proceso de mellora das competencias dos membros da comunidade educativa que se deberá recoller nun Plan Dixital do Centro como organización.
O Regulamento polo que se establece o Mecanismo de Recuperación e Resiliencia do Consello Europeo do 11 de febreiro de 2021 establece como un dos seus principais eixes a transformación dixital na procura da excelencia, a universalidade e a equidade na educación; que elimina as brechas sociais e territoriais, que incentiva a formación continua e cre no talento, promocionando o emprendemento e a innovación, o reforzo das súas capacidades de investigación e a atracción e fomento da excelencia.
No Plan de Nova Arquitectura Pedagóxica que impulsa a Consellería de Cultura, Educación e Universidade, faise unha clara aposta por espazos ao servizo dos proxectos educativos, sobre todo vinculados á transformación dixital e que sexan xeradores de igualdade e de inclusión. Así como, na Estratexia Galicia Dixital 2030 e na Estratexia Educación Dixital 2030 de Galicia, cara a consecución dunha cidadanía dixital plena.
Nesta mesma resolución establécese:
Esta resolución ten por obxecto establecer as medidas de actuación relativas ao deseño, elaboración e implementación do Plan Dixital para o curso 2021-2022, nos centros docentes sostidos con fondos públicos correspondentes ao ámbito de xestión da Comunidade Autónoma de Galicia.
