XUSTIFICACIÓN EN RELACIÓN COA NORMATIVA VIXENTE

A referencia fundamental para que os centros desenvolvan o seu potencial dixital a través dun Plan é o Marco Europeo para Organizacións Educativas Dixitalmente Competentes (DigCompOrg), desenvolto polo Centro Común de Investigación (JRC, Joint  Research Centre), da Comisión Europea.

A Lei Orgánica 2/2006, do 3 de maio, de Educación, regula diferentes aspectos relacionados coa competencia dixital e a innovación educativa. Así, no artigo 121, establece que o proxecto educativo do centro recollerá, entre outros aspectos, a estratexia dixital do centro, de acordo co establecido no artigo 111 bis, no que se establece que as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas.
O artigo 132 da devandita Lei establece como competencias dos directores e directoras, entre outras, exercer a dirección pedagóxica, promover a innovación educativa e impulsar plans para a consecución dos fins do proxecto educativo do centro; e fomentar a cualificación e formación do equipo docente, así como a investigación, a experimentación e a innovación educativa no centro.
A disposición adicional quinta da Resolución do 17 de xuño de 2021, da Secretaría Xeral de Educación e Formación Profesional (DOG 30 de xuño), pola que se ditan instrucións para o desenvolvemento das ensinanzas de educación infantil, educación primaria, educación secundaria obrigatoria e bacharelato no curso académico 2021-2022, e na disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de formación profesional do sistema educativo no curso 2021-2022 sinala que os centros docentes elaborarán no curso 2021-2022 o seu Plan Dixital de acordo coas instrucións que se diten.
En liña coas orientacións establecidas no Plan de Recuperación e Resiliencia da Unión Europea e no marco do Plan de Acción de Educación Dixital (2021-2027), a Consellería de Cultura, Educación e Universidade (en diante, a consellería) persegue a transformación dixital dos centros educativos de Galicia como organizacións a fin de que sexan dixitalmente competentes nos procesos de ensino-aprendizaxe, de xestión e de relación o que require de un proceso de mellora das competencias dos membros da comunidade educativa que se deberá recoller nun Plan Dixital do Centro como organización.
A redacción deste Plan, farase conforme a Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.

CONTEXTUALIZACIÓN DO PD NO CENTRO E CONTRIBUCIÓN AO PROXECTO EDUCATIVO

O Plan Dixital é un instrumento de planificación que estará integrado no Proxecto Educativo, como recolle a LOMLOE no seu artigo 111 bis: o proxecto educativo recollerá así mesmo a estratexia dixital do centro, co fin de desenvolver a competencia dixital da comunidade educativa, promover a innovación e sacar o máximo proveito das tecnoloxías da información e comunicación e dos recursos educativos dixitais do centro.

O Plan Dixital será así o instrumento que adecúe e facilite o uso dos medios dixitais no proceso de ensino-aprendizaxe, entendido dende o obxectivo do desenvolvemento pleno e integral do alumnado. Será un instrumento que forme parte, así pois, do citado Proxecto Educativo, e tamén do Proxecto da Dirección do centro. Pola súa banda, a Programación Xeral Anual (PXA) do curso 2022-2023, e dos que lle seguen, incluirán a planificación concreta das accións a desenvolver no período escolar propio de cada curso.
A finalidade última é que o alumnado aprenda, se forme e se desenvolva como individuo da sociedade na que vive. En consecuencia, ademais da relación cos documentos citados, a concreción curricular de centro, e as programacións didácticas de cada departamento en secundaria, e de cada ciclo en Educación Infantil e Primaria, estarán en consonancia co propio plan dixital, sendo ambos complementarios e compartindo intencións e actuacións a  definir co alumnado.

PROCESO DE ELABORACIÓN

O Plan Dixital deséñase no marco de desenvolvemento dun plan de formación permanente do profesorado, a través da creación dun grupo de traballo que será o que conforme o Equipo de Dinamización do Plan Dixital (EDPD).

Este equipo, ao inicio do curso, deseñou unha planificación de traballo no que se definiron as horas de reunión, coordinación e traballo, a metodoloxía e a concreción das actuacións principais. Conforme ao calendario inicial formulado lévanse a cabo as diferentes sesións condicionadas pola mentoría asignada ao centro dende a Consellería.

Para a súa confección seguíronse os seguintes pasos:

1. Análise e detección de necesidades: enquisas para o alumnado, profesorado e equipo directivo (cuestionario SELFIE).

2. Autoavaliación da Competencia Dixital Docente a través do cuestionario CDD.

3. Obtención das conclusións principais a través dun modelo DAFO.

4. Definición de obxectivos prioritarios.

5. Redacción do Plan Dixital.

O desenvolvemento do Plan Dixital avaliarase no marco das coordinacións do EDPD. A tal fin, analizarase a través da rúbrica de valoracións das diferentes actuacións comprobando o grao de consecución dos obxectivos sinalados e establecendo as intervencións necesarias en cada caso e posibles propostas de mellora.
A avaliación do Plan Dixital do Centro definirase en tres liñas principais:

• A través da planificación anual inicial, concretaranse indicadores significativos do grao de consecución dos obxectivos para poder facer os axustes e melloras que sexan precisos. Adicaremos unha sesión entre os compoñentes do equipo para analizar as propostas e liñas de actuación para o/os seguinte/s ano/s académico/s.
• O plan avaliarase en función dos resultados obtidos, no marco dos obxectivos e prazos previstos, e das condicións de aplicación. En cada curso definiranse xuntanzas, con carácter mínimo trimestral, cos compoñentes do equipo. Ademais, nas reunións dos órganos de goberno do centro, analizaranse, de xeito colectivo, as actuación postas en marchar e tomaranse decisións conxuntas para a continua mellora e actualización do proceso.
• O informe de progreso formará parte da Memoria anual do centro. Ao final do curso ou nun período plurianual, unha vez que se consolidaron as actuacións, débese volver avaliar globalmente a competencia dixital do centro. Esta avaliación realizarase preferentemente ao final do curso escolar, cunha cadencia polo menos bienal e dará pé á revisión e actualización do Plan Dixital de Centro.

As accións establecidas no Plan Dixital para a consecución dos obxectivos fixados desenvolvéronse con normalidade, aínda que houbo algunha adaptación nas accións do terceiro trimestre. Explícanse, a continuación, o desenvolvementos das mesmas por trimestre:

• Durante o primeiro trimestre, completáronse as accións relacionadas co obxectivo 1 sobre a elaboración dun inventario do material existente na aula de informática de E.I. e E.P. e valorouse a súa viabilidade de instalación posterior. En canto ao obxectivo 2, leváronse a cabo as sesións formuladas de aumento dos tempos de traballo de mellora da competencia dixital en infantil e primaria e as sesións de titoría entre iguais correspondentes a ese trimestre. Con respecto ao obxectivo 3, informouse ás familias sobre as funcionalidades da Abalarmobil como medio de comunicación e información sobre a práctica diaria do alumnado. Finalmente, e incluído no obxectivo 4, buscáronse conferencias e charlas para tratar de mellorar a compentencia dixital do alumnado.
• No segundo trimestre, ao igual que no primeiro, realizáronse todas as accións pensadas. Dentro do obxectivo 1, completouse o cálculo do material necesario para o equipamento da aula de informática e pedíronse varios presupostos para a adquisición dos mesmos. Do mesmo xeito que no primeiro trimestre, as accións incluídas no obxectivo 2, puxéronse en práctica igualmente: aumento do tempo de traballo da competencia dixital do alumnado e as sesións de titoría entre iguais. Referente ao obxectivo 4, xa se levaron a cabo actuacións de conferencias e obradoiros e, ante a posibilidade de conseguir novas conferencias, seguíronse planificando para o terceiro trimestre.
• Para rematar, no terceiro trimestre, e falando do obxectivo 1, ante a información chegada ao centro da posibilidade de subministración de dispositivos para dotar a aula de informática de E.I. e E.P. decidiuse esperar para equipala. Polo tanto, non se levaron a cabo as accións de adquisición e instalación do material. De non chegar os equipos a principios do curso que vén, o centro procederá á súa adquisición e instalación durante o primeiro trimestre. Atendendo ao obxectivo 2, continuáronse coas sesións de titoría entre iguais e aumentando os tempos de traballo da competencia dixital do alumando, resultando moi positivas e valoradas, tanto polo profesorado como polo alumnado. Incluído no obxectivo 3, incluíuse na páxina web do centro un apartado específico sobre o Espazo Abalar, onde se inseriu material de apoio para as familias e docentes, no que se poden consultar guías de uso de diferentes funcionalidades do aplicativo e un vídeo para realizar o pago dos servizos complementarios a través deste espazo. Finalmente, en relación ao obxectivo 4, continuouse a levar á práctica as diferentes conferecias, obradoiros e charlas planificadas e, ademais de establecer un apartado específico na web sobre as accións do Plan Dixital, elaboráronse dúas guías informativas, subidas a esta sección da web, sobre ciberseguridade e licenzas e atribucións de autoría.

Atendendo ás accións desenvolvidas durante este curso académico, e tendo en conta a súa aceptación e aproveitamento por parte dos membros da comunidade educativa, proponse, de cara ao vindeiro curso escolar, completar a dotación da aula de informática de Educación Infantil e Primaria co material necesario para seguir aumentando os tempos de traballo do alumnado. Igualmente, seguiranse con actividades relacionadas coa formación en competencia dixital do alumnado, tratarase de aumentar o emprego da ferrramenta Abalarmobil para a comunicación entre as familias e o equipo docente e o emprego do pago telemético dos servizos complementarios a través do Espazo Abalar.

Por último, tratarase de promover a formación en competencias dixitais no equipo docente, intentando que o maior número posible acade, como mínimo, a competencia B1.

O documento, unha vez revisado, valorado e aprobado polos órganos competentes, publicarase na páxina web do centro.

A persoa coordinadora do PD estará autorizado na aplicación Educalidade para realizar un seguimento das accións realizadas e proceder a facer unha avaliación continua e final do desenvolvemento do plan, baixo a supervisión da dirección do centro.

https://www.edu.xunta.gal/centros/cpipecalama/