Moodle 1.9 - Documentación para o administrador

Dispoñibilidade:

Esta opción permite "agochar" os cursos aos estudantes. Non aparecerá en ningunha listaxe de cursos, excepto para administradores e creadores. Mesmo se os estudantes tratan de acceder directamente a un curso a través da URL negaráselles o acceso.

Chave de inscrición: O contrasinal de acceso serve para restrinxir o acceso a persoas alleas a ese curso. Se deixamos en branco este cadro, calquera que teña nome e contrasinal na plataforma poderá entrar a este curso. Se poñemos unha palabra neste campo, o alumnado necesitará coñecela para acceder, SÓ A PRIMEIRA VEZ que acceda e xa quedará inscrito.

A idea é pois proporcionar un contrasinal de acceso ao alumnado para que se inscriban. Se este contrasinal perde a súa "efectividade" e comezan a entrar persoas non autorizadas, poderemos en calquera momento cambiar ese contrasinal e destituír ao alumnado que de forma ilexítima se matriculou, sen que afecte en nada ao resto do alumnado.

Cando se fixe unha chave de acceso, na lista de cursos aparecerá a icona:

No caso de que o profesorado dea de alta aos estudantes, non lles pedirá a chave.

Podemos ter a posibilidade de permitir convidados/as no curso creado.

Os convidados/as poderán entrar a partir da páxina de acceso, no botón "Entrar como convidado/a".

Os convidados/as NUNCA teñen autorización para escribir nos cursos nos que entren e só poderán acceder aos materiais pero non participar nas actividades.

Isto pode ser útil cando queremos que algún amigo/a vexa o noso traballo ou cando promovemos un curso e queremos que o alumnado poida entrar antes de subscribirse.

Existen dous tipos de acceso como convidado/a: con ou sen contrasinal. Os convidados/as, a diferenza do alumnado, terán que colocar o contrasinal de acceso cada vez que ingresen, o cal daranos máis control sobre os convidados/as. Se o curso non ten contrasinal de acceso, calquera convidado/a poderá entrar cando o desexe.