Radio
DÍA DOS DEREITOS DOS NENOS (20/11/2018)
Hoxe 20 de novembro, conmemórase o Día dos dereitos dos nenos e das nenas, para saber máis sobre este día e sobre os propios dereitos escoitade o programa gravado polos nenos e nenas de 6º de Primaria.
XORNADA MICOLÓXICA (13/11/2018)
A Agrupación Pingadouro organiza como cada ano unhas xornadas micolóxicas en Sober nas que se inclúe unha xornada didáctica cos nenos e nenas de primaria.
Coas cestas preparadas e acompañados por Ramón Losada (micólogo da Asociación Micolóxida de Madrid), saímos polos arredores do colexio para buscar setas e cogomelos entre as herbas, as pedras, as árbores...
Xa coas cestas cheas voltamos ao colexio onde, coa axuda de Ramón e consultando libros sobre setas, diferenzamos as especies tóxicas (mantel vermello) das non tóxicas (mantel branco) e puxémoslles etiquetas cos seus nomes.
Despois o micólogo fixo unha explicación sobre elas, as súas propiedades, os seus perigos, as súas partes, como diferenzalas... e respostou a todas as dúbidas dos nosos alumnos ademais de pasar polos estudos de Radiuvín para ser entrevistado por Aitana, Mara e Uxía.
A GALIÑA PAULINA contada polos nenos e nenas de Infantil (9/11/2018)
Hoxe tivemos na sección de Lecturradio a algúns nenos e nenas de Educación Infantil para contarnos a historia de A galiña Paulina; un conto popular español recollido nesta edición por Fernando Alonso para a colección Superlibros de Santillana.
Con esta fábula, descubriredes a importancia de traballar e esforzarse para lograr as cousas que queremos como a galiña que tivo que traballar moito desde que encontrou un gran de trigo ata que conseguiu a fariña para facer un rico biscoito...e que credes? Contaría con axuda?
Escoitade atentos...
DÍA DA BIBLIOTECA: Comezan as emisións de Radiuvín (26/10/2018)
Chega o Día da Biblioteca e todo o relacionado con ela empeza a espertar do seu descanso estival; inlcuída Radiuvín, a nosa radio.
Para comezar, que mellor que lembrar todo o que fixemos o ano pasado co vídeo recopilatorio que nos mandan desde Rede Espora?
Neste vídeo poderedes ver os primeiros pasos dos colexios que entramos o ano pasado no Proxecto Radio na biblio.
E como non podería ser doutro xeito, comezamos a emisión cun programa relacionado coa nosa biblioteca; un programa no que os alumnos de 3º e 4º de Primaria nos informan sobre todo o acontecido o día da biblioteca e os alumnos de 5º e 6º nos contan o que máis lles gusta da biblioteca do cole para que non dubidedes en ir a ela.
RADIUVÍN na Revista Galega do Ensino
A EDUGA (www.edu.xunta.es/eduga) é a Revista Galega do Ensino publicada pola Consellería de Cultura, Educación, e Ordenación Universitaria. Nela recóllense entre outras seccións, experiencias innovadoras, boas prácticas e artigos de investigacións.
No seu último volume publicado, o número 75 (xaneiro - xuño 2018), poderedes ler un artigo que fala sobre a nosa biblioteca e a incorporación do Proxecto Piloto Radio na biblio que estamos levando a cabo.
Desde a biblioteca queremos darlle ás grazas a esta publicación educativa e á Asesoría de Bibliotecas Escolares por ter escollido a nosa experiencia para darlle visibilidade a este proxecto; pois supón un recoñecemento ao traballo feito na nosa biblioteca
MERENDAS CON CONTOS: o programa de animación á lectura da Biblioteca Pública Municipal
Hoxe tivemos no noso estudio de radio a Julia Fernández Garza, bibliotecaria da Biblioteca Pública Municipal de Sober, e a
Rocío Fernández, técnica informática do noso Concello e nai da nosa compañeira Antía.
Entre as dúas e Dunia, que agora está de baixa por maternidade, levan a cabo as actividades do programa de animación á lectura
Merendas con contos que se desenvolve todos os venres do curso escolar e no que participamos moitos alumnos e alumnas deste
colexio.
Para saber todo o que falamos sobre este programa de animación á lectura e moitas cousas máis, só tedes que escoitar a
entrevista no seguinte enlace:
MOITAS GRAZAS POR ESTE PROGRAMA
E POLA VOSA DISPOSICIÓN A
COLABORAR SEMPRE CO COLEXIO!!
CONCERTO DIDÁCTICO CON SUSO VAAMONDE E DOCE INSTRUMENTOS POPULARES (6/6/2018)
Hoxe asistimos ao concerto didáctico organizado pola Escola de Música de Sober coa Banda Municipal, o coro Berea e a presenza de Suso Vaamonde que é Profesor Superior de Gaita, licenciado en Diloloxía Clásica e mestre de instrumentos populares en varias escolas e Asociacións.
Neste concerto puidemos aprender moitas cousas sobre instrumentos tradicionais coñecidos coma a pandeireta, o acordeón ou a gaita; e outros menos coñecidos como a trompa ou birimbao, a zanfona, as tarrañolas, o asubío...
Foi un concerto moi divertido no que non paramos de apreder, dar palmas e cantar como na imaxe da fotografía na que os nenos e nenas do cole, subiron ao escenario a cantar "Se chove" coa Banda, a coral e Suso Vaamonde tocando o asubío.
Ao rematar Laura Rodríguez, que é a directora da Escola de Música, e Suso Vaamonde; achegáronse aos nosos estudios de radio para que Laura e Uxía lles fixeran a interesantísima entrevista que podedes ouvir no seguinte enlace.
MOITAS GRAZAS POR VIR A RADIUVÍN!!
O día rematou cun xantar de convivencia co alumnado e os profesores do colexio Rosalía de Castro de Bóveda. MOITAS GRAZAS POR VIR AO NOSO COLE!!!
DESPEDIDA VICTORIA, A NOSA AUXILIAR DE CONVERSA (1/6/2018)
A nosa auxiliar de conversa durante este curso, Victoria Capuano, remata hoxe a súa estancia no centro despedíndose de todos nós. A través de Radiuvín ela fixo un resumo do seu paso polo centro e contoulle a Francesca moitas cousas que todos poderedes entender porque Uxía fixo de traductora.
Para que leve un recordo do centro, cada alumno/a fixo un debuxo e un pequeno texto en inglés. Con estas aportacións, encadernamos un fermoso libro cheo de moito cariño.
Nesto xesto de cariño, non podía faltar a nosa mascota Lectuvín que levará de recordo para USA nunha camiseta da biblioteca, xa que Tori pasou bastante tempo nela axudando ao alumnado e xogando cos escornabots.
THANK YOU VERY MUCH, TORI!!
WE HOPE TO SEE YOU SOON AND YOU COME BACK NEXT YEAR!!
HIXIENE E SAÚDE BUCODENTAL (23/5/2018)
A hixiene e a saúde bucodental é algo imprescindible para o noso alumnado; por iso, nos pareceu unha boa idea a que nos propuxo a madriña de Lucía: vir a falarlles aos nenos sobre o seu traballo na Clínica Dental Marga e a importancia do cepillado para conciencialos sobre este tema.
Co alumnado de infantil, Sonia Díaz e Marga González fixeron fincapé na importancia do cepillado e déronlles técnicas apropiadas a súa idade que seguro que xa non se lles olvidan pero, por se algún se despista, poden escoitar de novo a canción que lles ensinaron.
Ao alumnado de primaria déronlle unha expliación máis completa e despois foron enxuaguando a boca cun enxuague que tingue de azul as partes onde hai suciedade para que visen se a súa dentadura estaba limpa ou non. A continuación lavaron os dentes poñendo en práctica o aprendido con especial coidado nas zonas máis azuis.
Para rematar a actividade, Marga e Sonia repartíronlles uns agasallos e fixeron un sorteo duns lotes de produtos de hixiene dental.
Tamén entregamos uns chaveiros con forma de moa impresos na 3D así cada vez que os nosos alumnos/as os vexan recordarán o que falamos hoxe.
Antes de marchar, as nosas invitadas pasaron por Radiuvín para deixar constancia de todos os consellos que nos deron e falarnos da súa experiencia.
MOITAS GRAZAS POLA VOSA COLABORACIÓN!!
I ESCALEIRA LITERARIA (12/5/2018)
O sabado día 12 de maio, celebrouse no Centro Sociocultural de Sober a I Escaleira Literaria, un acto poético musical dedicado a María Victoria Moreno, autora homenaxeada este ano polo Día das Letras Galegas.
O acto comezou coa lectura e relatos de poemas con acompañamento instrumental. Participaron Carlos Rafael, Leticia Sáez, Moncha Prieto, Paco Ledo, Rosa García, Ramón Sandoval, Sara González, Xosé Lois García e a nosa directora Montse Rodríguez.
Tamén participaron o grupo musical O Trícole, a Escola Municipal de Teatro e Sara González que interpretou un poema con danza. Rematou o acto o alcalde Luis F. Guitián.
Para falarnos deste acto, tivemos nos estudios de Radiuvín a Moncha Prieto, Eva Ferreira e Neus Canadell.
Moitas grazas por concedernos esta entrevista!!
- « primeira
- ‹ anterior
- …
- 4
- 5
- 6
- 7
- 8
- 9
- 10
- 11
- 12
- seguinte ›
- última »
