Equipo de dinamización, Actividades complementarias

E aí vai a outro final de curso... Como pasa o tempo! Parece que foi onte cando chegaba ao IES Julio Prieto Nespereira e xa teño que marchar de novo. 

A verdade é que este ano foi especial para min porque foi unha experiencia marabillosa poder impartir aulas no meu insti, no centro no que eu estudei o Bacharelato e o COU (que tempos!!). Ver de novo a profes dos que fun alumna e agora telos de compañeiros ... ter por alumnos e alumnas á rapazada do meu barrio... o certo é que unha experiencia preciosa. 

Cando eu era alumna, nunca pensei que chegaría a dar clases no meu propio instituto, pero a vida dá moitas voltas. Espero e desexo que algúns dos nenos/as que tiven este curso teñan a mesma oportunidade no futuro e que nos volvamos atopar no Julio Prieto Nespereira, a próxima vez, de colegas de profesión ( e se poder ser como colegas do Departamento de Galego, moito mellor :-)). 

Un abrazo enorme para toda a xente do mellor instituto de Ourense, grazas por todo o cariño e ...

BO VERÁN!!!

En épocas remotas, os galegos celebraban a chegada da primavera e o remate do cru inverno e propiciaban deste xeito a obtención de boas colleitas. Nos tempos actuais, as festas dos maios son a última manifestación folclórica que festexa en Galicia o final do inverno. Constrúense figuras con elementos naturais, como musgo, flores silvestres, ovos, paus e arredor delas cántanse, con acompañamento de paus, coplas e cancións irónicas e críticas con feitos ou personaxes de actualidade.

O próximo día 5 de maio, celébrase na nosa cidade a tradicional Festa dos Maios, declarada no Consello da Xunta de Galicia do 4 de outubro de 2001 Festa de Galicia de Interese Turístico na provincia de Ourense. Co gallo desta celebración, dende o Concello de Ourense, convócase todos os anos un Concurso de Maios e Coplas no que participan todo tipo de grupos e colectivos sociais e culturais. (www.turismo.gal)

Coplas dos Maios 2019

Xa chega o 21 de marzo, o día ideal para...

                    lapidarte a bicos

porque

                    Contigo
                    os mapas fanse
                    cidades...

Podes ver as poesías, debuxos e caligramas do alumnado de 1º ESO neste enlace.

O cadro máis representativo de Castelao, A derradeira leición do mestre, o Guernica galego, está xa en Ourense. A obra permanecerá na antiga biblioteca do Pazo Provincial da Deputación de Ourense ata o 7 de abril, data na que regresará ao Centro Galicia de Bos Aires.

A obra foi pintada por Castelao en Bos Aires no ano 1945 coma homenaxe ao seu amigo Alexandre Bóveda, un intelectual galego que foi fusilado en Poio o  17 de agosto de 1936, aos 33 anos de idade. 

Na fotografía que aparece a continuación,  Brais Lorenzo captou á perfección a emoción de Amalia, filla de Alexandre Bóveda, que asistiu á inauguración da exposición.

   Fonte: Faro de Vigo , foto de Brais Lorenzo

É tempo de Entroido, de troula e de disfraces! En Galicia, o Entroido ten diferentes manifestacións segundo os lugares e as parroquias. Durante estes días de troula, desfilan figuras tradicionais como son boteiros, volantes, mázcaras, felos... Entre todas elas, destacan as máscaras do que se coñece como “triángulo máxico” do Entroido ourensán: as pantallas de Xinzo de Limia, os cigarróns de Verín e os peliqueiros de Laza. Mais non son as únicas, xa que tamén na cidade de Ourense temos as nosas propias máscaras. Cómpre lembrar que nos últimos anos se recuperaron figuras como a da pita das Eiroás, no barrio do Vinteún, ou frei Canedo, no barrio da Ponte.

No noso centro, como non podía ser menos, alumnado e profesorado tamén participaron desta festa típica. Unha xornada chea de diversión que nos deixou curiosas fotografías e premios para os mellores disfraces. Podes ver as fotos neste enlace.