IES Alfoz - Valadouro

Acceso ao centro durante o curso 2020-21

Seguindo o protocolo, só se permitirá a entrada ao alumnado e ao persoal do centro.

Para calquera consulta poden chamar ao 982 870051 de 8.30 a 14.30 h.

Inicio das clases

Voltaremos ás clases o vindeiro venres 8 de xaneiro de 2021.

Documental "Grandes historias das heroínas do rural"

As ANPAs do CEiP Castro de Ouro e do IES Alfoz-Valadouro realizaron o documental "Grandes historias das heroínas do rural" para homenaxear a todas as mulleres de Alfoz e O Valadouro que adican a súa vida ao rural.

Horario espello e Addenda das NOF

Por mor da situación actual, aprobouse, por Claustro e Consello Escolar, unha addenda ás NOF do centro e o horario espello que se levaría a cabo se algún/s aula/s tivesen que confinarse. Podedes consultar os dous documentos:

Horario espello

Addenda das NOF

25N - Día Internacional contra a violencia de xénero

Conmemoramos este día con carteis, dous lemas "Que o silencio non sexa cómplice" e "Entre tod@s imos silenciar o ruido machista" e un vídeo gravado no curso pasado.

Adxudicación de máscaras para o alumnado

A Consellería de Cultura, Educación e Universidade realizará unha achega complementaria para a adquisición de máscaras para o alumnado matriculado nos niveis de ensino obrigatorio e educación especial.

As máscaras distribuiranse entre o alumnado pertencente a familias cunha renda per cápita igual ou inferior a 6.000 €, que foi o límite de referencia no curso 2020/21 para ter dereito á axuda para adquirir material escolar. Polo tanto:

- Non terá que presentar solicitude o alumnado beneficiario da axuda de material escolar no curso 2020-2021 porque se lles adxudicarán directamente.

- Terá que presentar solicitude o alumnado que non foi beneficiario da axuda de material escolar no curso 2020-2021 que cumpra algunha das seguintes condicións:

Que pertenza a unha familia cunha renda per cápita igual ou inferior a 6.000 €.
Alumnado matriculado en educación especial.
Alumnado suxeito a tutela ou garda da Xunta de Galicia.
Alumnado cun grao de discapacidade igual ou superior ao 65%.

Para realizar esa solicitude terán que cubrir o anexo I e II, que poden descargar dende aquí, e presentala no noso centro dende o 16 ata o 27 de novembro de 2020.

Podedes consultar a orde do 6 de novembro de 2020 (DOG).

Xubilación de Pepe Peinó

O pasado 27 de outubro xubilouse José Vázquez Peinó, Pepe, o profesor de historia e lingua galega en primeiro e segundo de ESO.

Pepe chegou ao noso centro no curso 97/98, polo tanto leva máis de vinte anos adicándose en corpo e alma a ensinar a todos os rapaces que pasaron polo instituto. É un referente para todos nós. No terreo profesional, fixo infinidade de actividades cos alumnos e todos os seus compañeiros: obras de teatro, xornais, radio e películas, e foi sempre un profesor riguroso, traballador e cunha especial serenidade en todos os aspectos. Na parte persoal, podemos destacar a súa positividade, alegría e xenerosidade con todos. Todos vemos a Pepe como unha persoa moi especial e a que lle debemos moitos momentos vividos.

As obras de teatro que fixo Pepe no instituto foron: 'A verdadeira historia de Parvo de Cela', 'Alí vén teu pai', ' Revolución no ximnasio', 'A máquina do tempo', ' A apidemia' e ' Bruxas, vampiros, trasgos e fantasmas'. Fixo as películas tituladas: 'Lume na alma', ' Malos tempos' (2007, primeira película, gañou o primeiro premio no certame OUF Escolar de Ourense), ' Volveremos',' Adeus' e 'Pasado e futuro'. Dirixiu o Xornalouro que foi a revista escolar do centro durante moitos anos e tamén a radio escolar Parolando. El agora seguro que seguirá coas obras de teatro e curtametraxes e coa publicación dos seus libros; seguirá tendo moitísimos admiradores da súa obra como ate agora.

Pepe, desexámosche que aproveites o tempo que agora tes para disfrutar da familia, das túas afeccións e, por suposto, para ser moi feliz!

Esperamos verte moitas veces polo noso centro; sempre terás as portas abertas no que foi o teu lugar de traballo. Grazas por todo e mil bicos para ti.