Curso 22/23

O  alumnado de Educación Primaria asistiu recentemente a unha competición intercentros de baloncesto e balonmán, na que participou alumnado doutros centros da contorna na localidade de Silleda. O alumnado de 3º e 4º de Educación Primaria acudiu a esta cita o 16 de marzo.

Esta actividade forma parte do Plan Proxecta -“Proxectos de vida activa e deportiva” denominada “Rodeiro respira actividade e deporte”. 

Aquí mostramos unha imaxe dunha das xornadas:

O alumnado do noso centro recibiu as reaccións de científicas homenaxedas na táboa periódica das científicas elaborada para a conmemoración do 11-F. 

O alumnado participante recibiu como agasallo unha mensaxe de agarimo e agradecemento dalgunhas científicas galegas homenaxadas. 

Agradecemos ao docente José Luis Darriba as xestións realizadas para facerlle chegar o noso traballo e recibir a súa reacción. 

Velaquí a mensaxe de agarimo da prestixiosa paleontóloga María Martinón:

Os departamentos de Matemáticas, Física-Química & Bioloxía e Xeoloxía e Tecnoloxía, organizaron con motivo do Día Internacional da Muller e da Nena na Ciencia unha actividade, pretende visibilizar o traballo dun pequeno grupo de científicas de diferentes ramas e momentos da historia. Deste xeito, preténdese crear roles femininos e favorecer a iguladade de xénero no ámbito científico-tecnolóxico. 

Partindo da idea de Teresa Valdés Solís, que elaborou no ano 2019 unha especial táboa periódica  composta por nomes de científicas, o noso alumnado de Educación Secundaria púxose mans á obra. 

As profesoras de ciencias organizaron a selección das científicas en diferentes disciplinas, priorizando no posible ás españolas e galegas, lamentablemente moi pouco coñecidas. Posteriormente, o alumnado realizou a busca de información sobre os feitos científicos relevantes de ata dúas científicas diferentes e elaborou un breve resumo. 

Con non pouco traballo, realizouse a montaxe final da nosa táboa de mulleres científicas, da que podedes ver aquí unha mostra: 

O  alumnado de Educación Primaria asistiu recentemente a unha competición intercentros de fútbol sala, na que participou alumnado doutros centros da contorna. O alumnado de 3º e 4º de Educación Primaria acudiu a esta cita o 24 de xaneiro, mentres que o alumnado de 5º e 6º de Educación Primaria asistiu o pasado 15 de febreiro. 

Esta actividade forma parte do Plan Proxecta -“Proxectos de vida activa e deportiva” denominada “Rodeiro respira actividade e deporte”. 

Aquí mostramos unhas imaxes das xornadas:

A igrexa de Carboentes (Rodeiro), templo de fasquía románica aínda que con remodelacións posteriores, é unha das máis interesantes do románico pontevedrés debido á calidade dos capiteis do presbiterio. 

Nun deles podemos observar a representación do voo de Alexandro Magno, que atou o seu trono a uns grifos, seres míticos representados nos capiteis tal como aparecían descritos nos manuais medievais: animais híbridos con corpo de león e ás e cabeza de aguia. Noutro aparece a historia bíblica de Daniel, cristián exemplar salvado por Deus das fauces dos leóns.      

Aquí tedes algunha reprodución dalgún dos motivos destes canzorros dos capiteis de Carboentes, realizados polo alumnado de 1º da ESO na materia de EPVA (plástica). A técnica empregada para a elaboración das mesmas é a do moldeado con cartón pedra, usando papel de periódico e cola branca para a configuración dos diferentes volumes das figuras. 

Esta actividade forma parte o Plan Proxecta “Paisaxe e Sustentabilidade”.