Skip to Content

Ecoparque Marín

Ven, 31/05/2024 - 10:41 — admin2

O pasado luns día 27 de maio o alumnado de 4º de Ed. Primaria pasou a mañá no Ecoparque de Marín. Un parque multiaventura no que poder achegarse un pouco ao deporte da escalada. Alí tras recibir unha pequena clase para o uso dos diferentes elementos que levaba o arnés puideron facer dous percorridos diferentes.

Porto Pesqueiro Vigo

Ven, 31/05/2024 - 10:39 — admin2

O martes 28 de maio o alumnado de 4º Ed. Primaria desfrutou da saída didáctica ao Porto Pesqueiro de Vigo, na cal, da man dunha guía, coñeceu como é a xornada laboral dende ben cedo no porto da nosa cidade. Puido ver os diferentes barcos pesqueiros e coñecer as diferentes técnicas de pesca para os que está deseñado cada un, o labor que fan os dous cetreiros coas súas aguias para manter afastadas ás gaivotas do peixe, os viveiros onde manteñen o marisco antes de saír a subasta e a lonxa na que posteriormente será vendida e cargada nos diferentes vehículos.

Lectura na Bouza

Mar, 28/05/2024 - 12:59 — admin2
Este luns os nenos e nenas de 1º fomos ao parque da Bouza para compartir unha pequena hora de lectura cos rapaces do Cristo da Victoria que o vindeiro curso, pasarán a Primaria. Cada ún deles escolleu un conto para lerlle ao compañeiro que elixiu. Fixéronno moi, moi ben porque xa son grandes lectores! Os máis pequenos disfrutaron do momento nun ambiente fermoso. Despois do conto tocó merenda e xogo!.  Foi unha mañá marabillosa de contos e sol...

Visita de Luís Vallecillo

Mér, 22/05/2024 - 12:46 — admin2

Hoxe, o alumnado de 1º a 4º, tiveron a sorte de contar con Luis Vallecillo, un artista multidisciplinar madrileño de nacemento e galego de adopción. Fantástico músico, cantautor, dramaturgo e titiriteiro.. Con el cantamos e aplaudimos ao ritmo de cancións que nos lembraban a autores como Manuel María ou Rosalía de Castro. Pasámolo moi ben!

Libros de texto e material 2024-25

Mar, 21/05/2024 - 11:49 — admin2

FONDO SOLIDARIO DE LIBROS

AXUDAS PARA MATERIAL E LIBROS DE TEXTO

CURSO 2024-25

Ligazón ao portal educativo

Publicada a orde do 7 de maio de 2024 que regula a participación no fondo solidario de libros de texto e a convocatoria de axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial.

Participación no fondo solidario de libros

-Alumnado de 3º, 4º, 5º e 6º.

Axudas para adquirir libros de texto

-Alumnado de 1º e 2º.

Axudas para adquirir material escolar

-Alumnado de 1º a 6º.

Presentación de solicitudes

-Do 21 de maio ao 21 de xuño (incluído) de 2024.

Solicitudes

-Presentaranse preferentemente por vía electrónica no formulario normalizado (anexo I) dispoñible na aplicación informática Fondolibros (https://www.edu.xunta.es/fondolibros), a través da sede electrónica da Xunta de Galicia (https://sede.xunta.gal).
-Opcionalmente, poderanse presentar presencialmente nos centros docentes ou calquera dos rexistros establecidos na normativa reguladora do procedemento administrativo común.

Documentación a presentar

-Anexo I e Anexo II.

-Fotocopia do libro de familia ou documento equivalente e outra documentación complementaria de ser o caso (segundo figura na Orde).

Documentos anexos

 

Festival Día das Letras Galegas 2024

Xov, 16/05/2024 - 14:10 — admin

Na véspera do Día das Letras Galegas celebramos o noso festival, presentado maxistralmente por nenas e nenos de 6ºA, onde o alumnado e nais e pais amosaron o seu talento en forma de cancións, bailes, teatro, ioga, poesía e actuacións musicais diversas. O público desfrutou e aplaudiu a rabiar. Deixámosvos unha pinga dese talento no álbum da galería fotográfica dos grupos que actuaron e do alumnado que fixo os honores coa presentación.

Feliz Día das Letras Galegas a todas as familias do noso colexio!

Obradoiro de xogos de mesa

Mér, 15/05/2024 - 13:43 — admin2

O luns e o mércores desta semana, os nenos e nenas de terceiro, cuarto. quinto e sexto puidemos compartir parte da nosa mañá con Custom Meeple e cos seus marabillosos xogos de mesa.

A través deles traballamos a competencia matemática, lingüística, social e o control inhibitorio. Pasámolo xenial e disfrutamos moitísimo.

 

O IES fálanos de Villalta

Mér, 15/05/2024 - 13:43 — admin2

Hoxe o alumnado de sexto tivo a sorte de poder asistir a unha charla expositiva por parte das alumnas Nora e Julia de bacharelato do IES Alvaro Cunqueiro sobre Luísa Villalta.

Moitas grazas por compartir a vosa labor.

Luísa Villalta

6ºA coas mans na masa

Lun, 13/05/2024 - 09:33 — admin2

A semana pasada, o alumnado de sexto A volveu ,coma todos os trimestres, á cociña para practicar matemáticas e facer unha desgustación das súas elaboracións.

O obxectivo era facer cálculos matemáticos que lles permitirían conseguir cada ingrediente e ter así os precisos para facer a receita ao completo.
Pasámolo "exquisito"!

Visita de Jorge Campos

Ven, 10/05/2024 - 10:54 — admin2

O capitán lentella foi o libro escollido polas aulas de 2º para as lecturas de aula. O autor e ilustrador deste magnífico libro, Jorge Campos, tivo a ben visitarnos e sacar a luz todas as súas ideas e desvelar algúns dos segredos ocultos desta banda deseñada. Ademais, deixounos a primicia dunha segunda entrega deste superheroe.

Jorge Campos
Distribuir contido


cep.celso.emilio.ferreiro@edu.xunta.gal

Tfno: 986 29 80 58 - Fax: 986 24 42 49

Rúa O Porriño s/n - 36209, Vigo - Pontevedra
by Dr. Radut