Skip to Content
A finalidade do C.E.I.P. Os Muíños é conseguir cidadáns responsables, autónomos, respectuosos e felices que participen de forma activa nunha sociedade inclusiva, partindo das súas capacidades, desenvolvendo o seu talento e equilibrando a súa autoestima, mediante unha metodoloxía motivadora e innovadora adaptable á diversidade do alumnado.

O venres 11 de xuño, o alumnado de 5º EP percorreu un tramo do Camiño de Santiago desde Os Muíños ata Muxía. Esta actividade, incluida na programación deste curso, formaba parte do Proxecto Anual “Facemos camiños”.

Comezando no colexio, descendemos cara a praia de Area Maior. Guiándonos polas frechas do camiño subimos ata Moraime, onde paramos para descansar, contemplar a igrexa de San Xiao coñecendo algo da súa historia e, finalmente, selar a credencial. Continuamos o ascenso ata San Roque, onde merendamos e falamos da construción da capela, da vida do peregrino San Roque e do rito do cambio da tella. Logo dirixímonos a Chorente para descender ata a praia de Espiñeirido, desde onde nos encamiñamos ata A Cruz para percorrer o paseo marítimo e finalizar na Oficina de Turismo, onde volvimos a selar a credencial e obtivemos o “Diploma do pequeno/a peregrino/a”.

O noso agradecemento a Protección Civil de Muxía, ao persoal da Oficina de Turismo e a Autocares Caamaño.

 

Aquí deixamos unha mostra da nosa peregrinación.


Todos os anos, no mes de xuño, convidamos ás familias do alumnado que se incorporará a Infantil a que acompañen aos seus fillos e fillas para pasar con eles un ratiño na escola. Deste xeito os futuros alumnos xa entran en contacto cos seus compañeiros e compañeiras coñecendo a aula que compartirán e pasando todos xuntos o tempo de lecer do recreo.

 

Como este ano, a causa da pandemia, non foi posible organizar esa acollida presencial, a mestra de Infantil Jessica Vázquez elaborou un vídeo co alumnado de 4º EI para dar a benvida virtual a eses pequenos e pequenas que proximamente estarán con nós. Agardamos que sexa do agrado de todos. Premede neste enlace para visualizalo.

 

 


Como ben sabedes, pola situación actual da pandemia, non poidemos facer unha xornada de acollida para o alumnado do CEIP Virxe da Barca que o vindeiro curso estará matriculado en 3º EP no noso centro. É unha mágoa non poder presentarlles ós seus compañeiros e compañeiras e, xunto con eles, facer unha visita guiada polas nosas instalacións para rematar no patio e poder disfrutar dun momento de xogo.


Sen embargo non queríamos deixar que rematase este curso sen poñernos en contacto con eles para darnos a coñecer e para que saiban que os estamos agardando. Por iso preparamos esta “acollida virtual”. A mestra Mari Rey (secretaria do centro), xunto co alumnado de 2º EP elaborou este vídeo para que os rapaces e rapazas de Virxe da Barca saiban con quen van compartir o próximo curso e coñezan o noso cole por dentro. Preme aquí para visualizalo.

 

 


Lembramos que o horario do alumnado a partir do martes 1 de xuño é de 9.30 h a 14.30 h, agás os martes que

sairán ás 14.15 h. O servizo de comedor funcionará de 14.30 h a 15.30 h. (Os martes será de 14.15 h a 15.15 h.)


Os venres 21 e 28 de maio celebramos no centro unhas charlas de sensibilización para romper os estereotipos sobre as persoas xordas e fomentar a súa inclusión na sociedade.

 

Para esta actividade, que foi proposta pola ANPA, o colexio contactou coa FAXPG (Federación de Asociacións de Persoas Xordas de Galicia). Deste xeito, achegáronse ó centro unha profesora de lingua de signos e unha intérprete que durante unha sesión acompañaron a cada grupo para falar sobre moitos aspectos relacionados coa xordeira.


Estimadas familias:

 

Informamos de que xa está aberto o prazo de solicitude de participación no fondo solidario de libros de texto (3º e 4º EP), de axudas para adquirir  libros de texto(1º e 2º EP) e material escolar (EP e EE) para o curso 2021-2022. Para ser beneficiario desta axuda é preciso cumprir os seguintes requisitos:

 

- ter devolto os libros de texto adquiridos coas axudas do curso 20-21 (agás o alumnado de 1º e 2º EP)

- ter unha renta per cápita familiar igual ou inferior a 10.000 € (para libros de texto) ou igual ou inferior a 6.000 € (para material escolar). A renda será a do exercicio 2019.

 

Documentación a achegar:

-Solicitude cuberta preferiblemente por vía electrónica no formulario normalizado dispoñible nos seguintes enderezos: https://www.edu.xunta.es/fondolibros/ ou  https://sede.xunta.gal  

 

No caso de tramitalo a través do centro educativo:

-Solicitude (anexo I) que poderán descargar neste enlace, ou recibila a través do alumnado se a solicitan por medio da axenda.

-Entrega da solicitude cuberta. Preferiblemente escaneada e enviada ó correo electrónico do centro (ceip.osmuinhos@edu.xunta.gal). En caso de entregar presencialmente, deberán pedir cita previa chamando ó teléfono 881 880 787.

-Copia do libro de familia en que figuren todos os membros da unidade familiar (Se non houbo variacións con respecto ó ano anterior, non é preciso aportar a copia porque xa se dispón dela no centro)

-No caso de non ter libro de familia ou se a situación familiar a 31 de decembro de 2019 non coincide coa actual poderá presentarse sentenza xudicial de separación ou divorcio, ou de ser o caso convenio regulador onde figure a custodia; certificado ou volante de convivencia ou informe dos servizos sociais.

-Certificado acreditativo do grao de discapacidade, se fose o caso, recoñecido por un órgano que non pertenza á Xunta de Galicia.

 

O prazo para a entrega da documentación será ata o22 de xuño de 2021.


O alumnado de 5º e 6º de Primaria continúa no Proxecto E-dixgal quedando exento das axudas para a adquisición de libros de texto xa que disporá de libros gratuitos en formato dixital.


O venres 14 de maio, o alumnado de 5º e 6º EP disfrutou dun encontro virtual co escritor Héctor Cajaraville. 

Desta volta, o club de lectura escolleu a novela “Kusuma” da autoría de Héctor Cajaraville. O escritor deu resposta ás cuestións propostas polo alumnado do club e comprometeuse a asinar os seus exemplares.

 

Esta actividade, que está incluida na programación da biblioteca, foi organizada polas mestras coordinadoras do club de lectura, Mª José Abelleira e Susana Seoane.


Unha das actividades propostas pola ANPA neste curso foi un “Obradoiro de corresponsabilidade” para fomentar a igualdade e vencer os estereotipos de xénero creados pola propia sociedade.

Nesta iniciativa, levada á práctica por Manel e Sofía, demostrouse que as tarefas do fogar pódeas realizar indistintamente papá ou mamá e o traballo compartido é máis levadeiro e divertido.

Durante catro tardes, todo o alumnado de Infantil e Primaria pasará por este obradoiro no que poderán varrer, fregar, facer a cama, poñer a mesa, tender a roupa, pasarlle o ferro e dobrala.

Ao remate, o alumnado cubrirá un cuestionario e recibirá como agasallo un exemplar de “Os Bolechas pola igualdade”.

 

O noso agradecemento á ANPA “O Facho” por esta iniciativa.


Informamos que o vindeiro martes 18 de maio non haberá clase por ser o día non lectivo escollido

polo Consello Escolar e autorizado pola Xefatura Territorial de Educación.


O luns 12 de abril, o alumnado de 5º e 6º EP participou nun encontro virtual coa escritora María Canosa. Esta actividade forma parte da programación anual da biblioteca e estivo organizada polas coordinadoras do club de lectura destes niveis, Mª José Abelleira Pequeño e Susana Seoane Dovigo.

 

Este curso o título seleccionado para o club de lectura foi “Muriel”, de María Canosa, de aí que a autora fixera oco na súa axenda para atender ó noso alumnado e contestar as preguntas que tiñan preparadas. Ademais María propuxo que lle leváramos todos os exemplares do alumnado para poder asinalos.

 

 

 

 

 


O pasado 7 de abril todo o alumnado do centro poido participar nunha charla sobre sensibilización ambiental para fomentar o uso do punto limpo municipal e a separación axeitada de residuos nos distintos colectores.

 

Esta actividade, que se celebrou ó aire libre, estivo organizada polo concello de Muxía e contou coa colaboración de dúas monitoras que, ademais de proporcionar información axeitada á idade do alumnado, repartiron folletos para que este asesoramento poida chegar ás familias.

            

 

            


O xoves 25 de marzo, o alumnado de 4ºEP mantivo unha charla virtual coa eurodiputada Ana Miranda.

Esta iniciativa, coordinada pola titora Susana Seoane, partiu da necesidade de comprender a organización política e territorial do país, tema que neste momento estaban a tratar en Sociais.

Partindo dun plan de traballo previamente deseñado na aula, Ana Miranda contestou a tres baterías de preguntas.

A primeira con cuestións xerais relativas á UE e ó Parlamento Europeo, como “Desde que ano poden votar as mulleres en Europa?, Por que a sede do Parlamento Europeo está repartida en tres cidades?, Por que o Parlamento ten forma de círculo?”

A segunda centrouse no proceso de vacinación contra a COVID en Europa. A terceira foi máis persoal e focalizada no propio traballo de Ana Miranda: “Desde cando traballas no Parlamento Europeo?, Que é o primeiro que fas cando chegas ó Parlamento?, Que é o que máis e o que menos che gusta do teu traballo?”

 

Agradecemos a atención prestada por Ana Miranda ao facernos un oco na súa apertada axenda. A súas aportacións fixeron posible ter unha visión máis próxima dun órgano tan complexo.

 

 

 

 


Informamos que desde o día 1 ata o 22 de marzo, está aberto o prazo de admisión do alumnado para o curso 2021-2022. 

 

Poderán descargar a solicitude desde esta mesma web premendo enriba do enlace que aparece no bloque da dereita (Admisión curso 2021-2022) ou tamén poden recollela na secretaría do centro nos seguintes horarios e sempre con  cita previa (881 880 787):

-Luns e xoves: de 15.40 a 16.30 h.

-Martes: de 10.55 a 11.50 h.

-Mércores: de 10.05 a 10.55 h.


En todo momento deberán cumprirse as normas de seguridade, autoprotección e distanciamento social. Preferentemente asistirá unha soa persoa (sen acompañantes).


Os días 27 e 29 de xaneiro, o alumnado participou nunhas charlas virtuais con Alba Burundarena, psicóloga da AECC. Esta actividade complementaria estaba proposta desde a ANPA  e figuraba dentro da Programación Xeral Anual para este curso.

 

Cada sesión durou 50 minutos e os contidos, relacionados coa prevención do cancro, estaban adaptados á idade do alumnado, que poido participar activamente consultando dúbidas, contando experiencias e respondendo cuestións.

 

 


Desde o 11 de xaneiro ata o 8 de febreiro está aberto o prazo de solicitude de praza para o curso 21-22 en centros adscritos. O alumnado de 6º EP do CEIP Os Muíños que desexe reservar praza no IES Ramón Caamaño de Muxía deberá cubrir o anexo proporcionado no centro e entregalo dentro do prazo establecido.


Grazas á asignación recibida polo recoñecemento ó labor da biblioteca na iniciativa de voluntariado de lectura, o alumnado de 6º que participou neste programa poido desfrutar dun obradoiro de radio escolar.

 

A actividade desenvolveuse na biblioteca os días 4 e 11 de decembro da man de Sergio Pascual, que explicou os elementos fundamentais da radio (voz, efectos sonoros e silencio), o proceso de elaboración dun programa e a importancia do traballo en equipo. Así mesmo implicou ao alumnado nunhas dinámicas de grupo para traballar o control da voz (respiración, entonación…) e a creación de efectos sonoros.

 

 

 


Informamos que as familias que recibiron a axuda do material escolar e están incluidas na listaxe de admitidos para a distribución de máscaras, poderán recollelas no centro desde o xoves 17 ata o martes 22 de decembro tendo en conta os horarios e pautas que a continuación se especifican.

 

  • Será preciso concertar cita previa telefonicamente (881880787).

  • Se algunha familia vai recoller as máscaras de outro alumnado deberá especificalo no momento de concertar a cita.

  • No momento da recollida deberán acceder ó centro pola porta do edificio da ampliación (excepcionalmente estará aberta nese horario) e dirixirse ó mostrador de secretaría onde se lle entregarán as máscaras e asinarán a recepción das mesmas.



HORARIOS DE RECOLLIDA (PREVIA CITA)

XOVES 17/12/20

VENRES 18/12/20

LUNS 21/12/20

MARTES 22/12/20

De 12.15 a 12.45

De 15.45 a 16.05

De 10.10 a 12.45

De 15.45 a 16.05

De 10.10 a 10.50

De 15.45 a 16.05

De 11.00 a 11.45


 

Este curso solicitamos a entrada no Programa de Biblioteca Creativa, e aquí estamos dando os primeiros pasos no mundo da robótica. A coordinadora deste proxecto, a mestra Beatriz Ponte, foi a encargada de titorizar ó alumnado de 5º EP no seu primeiro contacto cos “Escornabots”

 

 


O martes 17 de novembro recibimos no centro a Adela Figueroa Panisse, catedrática de Bioloxía e Xeoloxía e escritora galega. Adela foi alumna de Ricardo Carvalho Calero cando, na súa infancia, estudaba no Colexio Fingoi de Lugo.

Esta visita foi organizada pola coordinadora do EDL, Susana Seoane.

 

O alumnado de 5º e 6º EP tivo a sorte de coñecer as vivencias persoais de Adela como alumna de Carvalho Calero, ademais de saber como era o carácter do escritor, os seus gustos e afeccións e moitos detalles da súa vida.

 

Adela tamén mantivo unha xuntanza co profesorado na biblioteca escolar para afondar sobre a figura do escritor a quen se lle adicaron as Letras Galegas este ano.

 

Foi todo un pracer escoitarte, Adela.


A Consellería de Cultura, Educación e Universidade acaba de publicar unha orde pola que se regulan os criterios e o procedemento de distribución de máscaras entre o alumnado matriculado en educación primaria, educación secundaria obrigatoria e educación especial.

Para acceder ó texto completo da orde preman aquí.

 

Serán beneficiarios:

-O alumnado que resultou beneficiario da axuda para adquirir material escolar.

-O alumnado que non fose beneficiario da axuda para adquirir material escolar pero:

  1. Pertence a familias cunha renda per cápita igual ou inferior a 6.000 €

  2. Estea matriculado en educación especial cunha discapacidade igual ou superior ao 65% (con independencia da renda da unidade familiar)

 

Presentación de solicitudes e prazo:

-Non terá que presentar solicitude o alumnado que fose beneficiario da axuda para adquirir material no curso 20/21.

-Presentarán solicitude as familias do alumnado que non presentara a solicitude para material escolar no seu momento.

-As solicitudes presentaranse presencialmente no centro (solicitando cita previa nos horarios de secretaría e dirección) utilizando o anexo I, que poden descargar desde este enlace ou recoller en secretaría.

-Tamén deberán aportar libro de familia ou volante de convivencia (excepcionalmente), anexo II, sentenza xudicial ou convenio regulador (en caso de separación ou divorcio), certificado do grao de discapacidade e documentación xustificativa de violencia de xénero (se é o caso). Toda a documentación reflectirá a situación familiar, persoal e económica a 31 de decembro de 2018.

 

-O prazo de presentación de solicitudes remata o 27 de novembro de 2020.

 


Premendo no seguinte enlace poden acceder ó horario de atención ó público en dirección e secretaría durante o curso 20-21. Non esquezan que deben pedir cita previa no teléfono do centro (881 880 787).

Horario dirección/secretaría


Neste documento están resumidas as normas de organización e funcionamento do centro para o curso 20-21. Foi elaborado segundo os protocolos establecidos e presentado no consello escolar o 3/09/2020.

Pódese acceder a el no seguinte enlace: "Plan de acollida para o curso 2020-2021" 


Hoxe sae publicada no Portal da consellería a resolución da convocatoria da Dirección Xeral de Centros e Recursos Humanos sobre Bibliotecas Escolares Solidarias (Primaria), correspondente ao curso 2019/2020. Esta iniciativa realízase en colaboración coa Dirección Xeral de Xuventude, Participación e Voluntariado.

O noso centro, xunto con outros nove, foi seleccionado pola Comisión de Valoración logo de avaliar as 88 memorias de actividades recibidas por parte de centros adheridos á iniciativa “Voluntariado de lectura- A”, en función do interese e calidade das actividades realizadas.

 

 

Código
Centro
Concello
Provincia
15021792
CEIP Salgado Torres
Coruña, A
A Coruña
15009081
CEIP de San Ramón
Moeche
A Coruña
15024239
CEIP dos Muíños
Muxía
A Coruña
27004428
CEIP de Foz nº 1
Foz
Lugo
27016662
CEIP Plurilingüe de Monforte de Lemos
Monforte de Lemos
Lugo
32003771
CEIP Plurilingüe Curros Enríquez
Celanova
Ourense
32004118
CPI Antonio Faílde
Coles
Ourense
36002773
CEIP do Foxo
Estrada, A
Pontevedra
36008489
CEP Altamira
Salceda de Caselas
Pontevedra
36009524
CEP Pedro Caselles Beltrán
Tomiño
Pontevedra

Estes 10 centros seleccionados recibirán unha asignación de 600 euros para o desenvolvemento dun obradoiro especializado, destinado a un grupo de alumnos e alumnas que tivesen ao longo do curso un papel protagonista (dentro do grupo de voluntarios e voluntarias), participando directamente no deseño e xestión de actividades na biblioteca escolar.

Todo o alumnado voluntario recibirá un diploma pola súa colaboración como acción de voluntariado cultural.

Unha vez máis o noso agradecemento ó Equipo de Biblioteca coordinado pola mestra responsable Mª José Abelleira Pequeño.

 

Distribuir contido


by Dr. Radut