O día 12 de xuño fixemos unha saída ao río Grande como colofón ao proxecto que estamos levando a cabo. Esta actividade foi dirixida por Paco Bañobre, da asociación ecoloxista Adega. Primeiro explicounos que características tiñan os ecosistemas fluviais e a diversidade que estos albergan.
Despois meteuse no río cun trueiro para coller algúns animais que viven nas plantas e no leito do río.
As mostras metéronse nunhas bandexas. Con moito coidado e coa axuda dunhas pinzas buscamos macro invertebrados que separamos nuns pequenos recipientes.
Atopamos moitas larvas de libélulas e cabaliños do demo que observamos con lupas. Todos os animais e plantas que sacamos do río foron devoltos á auga.
Para finalizar a actividade analizamos as características físico químicas da auga. Collemos tres mostras nuns tubos e engadímoslles os reactivos correspondentes para poder determinar o estado da auga.
Observamos que o osixeno disolto na auga era máis ou menos o axeitado, que o PH era neutro e que o nivel de nitróxeno era o correcto. Xuntando toda esta información concluimos que o estado da auga do río Grande é bo, aínda que é conveniente sinalar que nos días previos choveu de forma abundante e esto axuda a mellorar os resultados obtidos.
