O secretario xeral de Política Lingüística, Valentín García inaugurou hoxe no claustro de San Nicolás o Real de Vilafranca a exposición ‘Antonio Fernández Morales e o galego do Bierzo’, que se abre no marco do simposio que se está celebrando estes días na propia Vilafranca, en Ponferrada e en Cacabelos con motivo do bicentenario do poeta berciano do Rexurdimento.

García Gómez resaltou a importancia de “dar a coñecer a figura de Fernández Morales entre o conxunto da poboación e, dunha maneira especial, entre as novas xeracións, pois é un referente importante para os galegofalantes castelán-leoneses e para todos aqueles que traballan polo noso idioma máis alá das fronteiras de Galicia”. Neste sentido, o secretario xeral recordou que, tras a súa parada en Vilafranca, a mostra percorrerá os centros educativos que participan no Programa de Promoción da Lingua Galega no Bierzo e en Sanabria “que, coa incorporación este curso do CRA Cubillos de Sil, son xa vinte”.

A canda o titular de Política Lingüística, interviñeron na inauguración José Manuel Pereira Vega, alcalde de Vilafranca; Gerardo Álvarez Courel, presidente do Consello Comarcal do Bierzo; Víctor Fernández Freixanes, presidente da Real Academia Galega; Héctor M. Silveiro, coordinador da Comisión Cultural Martín Sarmiento e autor dos textos da mostra; Francisco Macías, produtor da mostra e editor de Edicións Positivas e Manuel González Prieto, coordinador do grupo Médulas en defensa do galego no Bierzo.

Programa de Promoción da Lingua Galega no Bierzo e en Sanabria

Grazas á colaboración iniciada no ano 2001 entre a Xunta de Galicia e a Junta de Castilla y León, ampliada coa sinatura do Protocolo xeral de colaboración entre os dous gobernos en 2006, actualmente estudan materias de ou en galego preto dun milleiro de alumnos e alumnas no ensino primario ou medio en centros de León e de Zamora no marco do Programa de Promoción da Lingua Galega no Bierzo e Sanabria.

Tras a recente incorporación do CRA leonés Cubillos de Sil, son xa catorce os colexios de infantil e primaria e cinco os institutos adscritos ao programa, aos que debe sumarse tamén a Escola Oficial de Idiomas de Ponferrada.

Poeta berciano do Rexurdimento

Antonio Fernández Morales (Astorga, 1817 – Cacabelos, 1896) foi un militar e poeta berciano en lingua galega. Comezou a escribir neste idioma baixo a influencia do seu amigo o filólogo catalán Mariano Cubí i Soler. En 1861 publicou os “Ensayos poéticos en dialecto berciano”, converténdose así no autor do segundo libro en galego do Rexurdimento, tras Xoán Manuel Pintos con “A gaita gallega” (1853).