O conselleiro de Cultura, Educación e Ordenación Universitaria, Xesús Vázquez Abad, salientou esta mañá a ampliación do CEIP Ben Cho Shey (Pereiro de Aguiar) como unha mostra da clara aposta da Xunta de Galicia polo ensino público. Neste sentido recordou a importancia que un investimento como este- de 470.000 euros-, ten no actual contexto de crise económica, no que a inversión en obras está case a desaparecer en outras Comunidades Autónomas.

“Ao longo deste ano 2013 imos investir máis de 3 millóns de euros en obras de mellora nos centros educativos públicos da provincia de Ourense, velando pola calidade das súas instalacións e dando resposta, ao mesmo tempo, ás necesidades crecentes de prazas públicas para a escolarización en zonas como a de Pereiro de Aguiar. Cómpre lembrar que estes traballos, unidos aos xa realizados no centro desde 2009, supoñen un investimento total da Consellería no centro – tanto en obras como en outros programas educativos- superior aos 560.000 euros.

Durante o seu percorrido polo centro, no que estivo acompañado polo director do mesmo, Antón Gómez; e pola xefa territorial da Consellería na provincia, Mercedes Gallego; o conselleiro lembrou que a ampliación do CEIP Ben Cho Shey era unha demanda histórica da comunidade educativa do centro, que poderá atender – unha vez rematada a reforma- a 50 nenas e nenos máis.

Novas aulas e melloras na accesibilidade

Para iso, crearanse 3 novas aulas de infantil cos seus correspondentes aseos e 3 novas aulas de primaria  (neste caso cunha zona de almacenaxe cada unha de elas). Así mesmo crearase unha aula de reforzo, un área de orientación e unha zona de arquivo. A accesibilidade do centro verase tamén reforzada coa instalación dun ascensor, e a reestruturación de espazos permitirá a creación dunha nova saída de planta pola fachada posterior, así como a ampliación da biblioteca escolar. Ademais crearase un salón de usos múltiples na planta semisoto e substituirase a caldeira da calefacción por unha nova.

“As obras están moi avanzadas e agardamos que o vindeiro mes de setembro as alumnas e alumnos deste centro xa poidan gozar das novas instalacións”, explicou o conselleiro.

Vázquez Abad aproveitou a súa visita ao colexio para interesarse polo funcionamento da biblioteca escolar do centro, na que a Consellería leva investidos 5.450 euros. Ademais puido visitar a aula dixital coa que conta o centro, equipada con proxector, encerado dixital e ordenador para o profesor.