Xustificación do Plan Dixital en relación coa normativa vixente.
Este documento está baseado na seguinte regulación:
· Art. 111 bis, Art. 121 e Art. 132 da LO 2/2006, de 3 de maio, de Educación.
· Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022.
· Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022.
· Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
Contextualización do Plan Dixital no centro. Contribución ao Proxecto Educativo do Centro.
O desenvolvemento económico do concello de Silleda está ligado ao sector agrogandeiro, tanto no que respecta ao desempeño directo da actividade -permanecían en activo máis de 400 explotacións agrarias no ano 2020-, como á rede de servizos que se foi vertebrando arredor do sector. Non obstante, cómpre sinalar que nos últimos anos estamos asistindo a un proceso de diversificación que está a estender o impulso da actividade económica a novos ámbitos, entre os que destacan os relacionados co aproveitamento do potencial turístico da comarca. Estes novo campos de emprendemento piden, tamén, unha evolución tecnolóxica e dixital, é por eso que o centro necesita unha modernización nestes campos.
A Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes galegos, establece que os plans dixitais deberán ter en conta estes tres grandes principios:
a) A resposta á realidade social resultante do uso xeneralizado das tecnoloxías de información e comunicación en múltiples aspectos da vida cotiá.
b) O enfoque cara unha comprensión integral do impacto persoal e social da tecnoloxía e unha reflexión ética acerca da relación entre tecnoloxías, persoas, economía e medio ambiente.
c) A transformación dixital que inclúa unha visión da competencia dixital máis moderna e ampla, acorde coas recomendacións europeas relativas ás competencias clave para a aprendizaxe permanente.
Así pois, o Plan Dixital está chamado a ser un instrumento que debe favorecer e promover a uso dos medios dixitais tanto nos procesos de ensino-aprendizaxe como no resto procesos de xestión do centro, sempre co fin último de colaborar no desenvolvemento integral do alumnado. Por iso, debe ser un documento que estea integrado no Proxecto Educativo, no Proxecto de Dirección e na Programación Xeral Anual.
Por outra parte, o Plan Dixital é un elemento que vai axudar a consolidar a traxectoria do centro no ámbito das “novas tecnoloxías”, unha liña pola que o IES Plurilingüe Pintor Colmeiro leva apostando desde hai moitos anos. Neste sentido, somos un centro que se esforzou para ter unha dotación tecnolóxica que permitise traballar o mellor posible a competencia dixital e tecnolóxica, tanto co alumnado do réxime ordinario como coas persoas adultas (ofrecemos desde hai bastantes anos cursos de alfabetización dixital para persoas adultas).
Por último, o Plan Dixital deberá ser un elemento que se integre na vida do centro e que, en consecuencia, estableza un diálogo fluído con todos os plans e proxectos nos que o centro está implicado, tanto aqueles que parten da administración educativa (contratos-programa, PLAMBE, plan proxecta, clubs de lectura, CUALE, etc), como os que proceden de ámbitos tan diversos como as entidades municipais, a Deputación Provincial ou a Unión Europea (Erasmus).
O Plan Dixital é unha ferramenta que nos permite realizar unha análise exhaustiva de todos os aspectos relacionados coas tecnoloxías e a dixitalización e, por conseguinte, deseñar e despregar un plan de acción que propoña actuacións concretas de mellora. Así pois, o Plan Dixital é unha achega importante á dinámica do centro que formará parte da PXA dos cursos vindeiros, completando o apartado que ata agora lle dedicabamos ao Plan de integración das TIC.
Proceso de elaboración.
Para a realización do Plan Dixital do centro, contouse cun grupo de traballo (20 h) formado por 9 persoas dentro dun plan de formación:
· P2105074 - PFPP P2131053 Análise da competencia dixital do centro e elaboración do plan dixital.
Ao longo deste tempo, o grupo de traballo, tivo a axuda do equipo ADIX de zona e 4 horas de formación para elaborar os apartados máis importantes deste documento.
