- Contextualización do Plan Dixital no centro. Contribución ao Proxecto Educativo do Centro
O IES Nº 1 da Estrada está situado na zona escolar do Concello da Estrada, ao lado dos outros dous institutos da vila, o Antón Losada Diéguez e o Manuel García Barros. É un centro de secundaria que ten adscritos os CEIP do Foxo, Codeseda, Oca e Vea; acolle, por tanto, alumnado procedente das aldeas e parroquias do medio rural, así como, excepcionalmente, alumnado da propia vila da Estrada. Por este motivo o centro conta cun servizo de transporte para a maior parte dos alumnos e alumnas.
O Plan Dixital supón a culminación do proceso de incorporar ao noso IES as novas tecnoloxías, que contribúen á mellora das competencias neste campo nos tempos en que as TIC forman un eixo fundamental no proceso de ensino-aprendizaxe.
Para comezar o proceso de incorporación das novas tecnoloxías, foise dotando o Centro da infraestrutura necesaria, como equipos informáticos e conectividade.
Con posterioridade, dotamos dúas aulas exclusivas con material informático, ademais da aula-taller de Tecnoloxía, na que se habilitou un espazo de computadores.
O curso 13-14 marcou unha nova liña de traballo no IES, coa nosa incorporación ao programa Abalar, que dotou ao alumnado de 1º e 2º da ESO co material informático achegado por ese programa. Así mesmo, o IES incorporou, para a comunicación coas familias, a aplicación Abalar-Móbil.
Xa a partir do curso 17-18, o IES engadiu material proveniente do proxecto KITS Dixitais (portátiles, canóns e encerados dixitais).
E no curso 20-21 foi aprobada en claustro a solicitude de participación no programa E-Dixgal, que dotaría de portátiles ao alumnado de 1º de ESO no curso 21-22, e que iría incorporando ao resto do alumnado nos cursos seguintes.
Con respecto aos distintos postos de traballo e Administración, no Centro contamos con equipamento informático e conectividade, que se van renovando en función das necesidades e da dispoñibilidade orzamentaria do centro.
A Biblioteca constitúe un espazo esencial na incardinación coas novas tecnoloxías. Grazas á súa incorporación á rede PLAMBE, foi dotada de medios informáticos modernos (tanto de xestión como de servizo ao alumnado) o que permitiu a xestión informatizada de todos os recursos dispoñibles. Cómpre sinalar, ademais, que somos un centro pioneiro na utilización do sistema Koha, que veu substituír o anterior sistema Meiga.
Tamén os Departamentos están dotados de infraestrutura necesaria para a conectividade, se ben os equipos que conteñen quedaron totalmente obsoletos, por falta de orzamento; en cambio, na sala de profesores foise investindo minimamente para cubrir as necesidades básicas do profesorado neste aspecto.
Canto a dispositivos ultraportátiles para aula móbil (con posibilidade de desprazamento a diferentes espazos), o Centro carece deste tipo de recurso.
Na actualidade, estamos á espera da implantación da fibra óptica no IES por parte de AMTEGA.
Este Plan Dixital constitúe un piar esencial na liña marcada no PEC un plan de integración das tecnoloxías da información e da comunicación que implique un cambio metodolóxico e unha adaptación á realidade para o mellor aproveitamento das posibilidades que as tecnoloxías da información e a comunicación ofertan.
- Breve xustificación do mesmo
O Plan Dixital de Centro elabórase ao abeiro da seguinte normativa:Artigo 37.1. do DECRETO 156/2022, do 15 de setembro, polo que se establecen a ordenación e o currículo da educación secundaria obrigatoria na Comunidade Autónoma de Galicia.
- Artigo 35.1 do DECRETO 157/2022, do 15 de setembro, polo que se establecen a ordenación e o currículo do bacharelato na Comunidade Autónoma de Galicia.
- Artigo 18 da ORDE do 26 de maio de 2023 pola que se desenvolve o Decreto 156/2022, do 15 de setembro, polo que se establecen a ordenación e o currículo da educación secundaria obrigatoria na Comunidade Autónoma de Galicia e se regula a avaliación nesa etapa educativa.
- Artigo 21 da ORDE do 26 de maio de 2023 pola que se desenvolve o Decreto 157/2022, do 15 de setembro, polo que se establecen a ordenación e o currículo do bacharelato na Comunidade Autónoma de Galicia e se regula a avaliación nesa etapa educativa.
