O Artigo 37.1. do DECRETO 156/2022, do 15 de setembro, polo que se establecen a ordenación e o currículo da educación secundaria obrigatoria na Comunidade Autónoma de Galicia, o Artigo 35.1 do DECRETO 157/2022, do 15 de setembro, polo que se establecen a ordenación e o currículo do bacharelato na Comunidade Autónoma de Galicia e a Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021- 2022 son a base lexislativa para a elaboración do Plan Dixital do IES Politécnico.
O PD do IES Politécnico de Vigo, intégrase dentro do Proxecto Educativo do Centro (PEC), como ferramenta para planificar o tratamento da información no mesmo, mellorar a competencia dixital do seu persoal e alumnado, e mellorar a integración das TIC como ferramenta didáctica nos procesos de ensino-aprendizaxe.
Tal e como se sinala na guía editada polo Instituto Nacional de Tecnoloxías Educativas e de Formación do profesorado (INTEF): “O PD debe ser o instrumento que adecúe e facilite o uso dos medios dixitais no proceso de ensino-aprendizaxe, entendido dende o obxectivo do desenvolvemento pleno e integral do alumnado”. Para iso, engade, “é fundamental dar un foco de centro ao uso dos recursos pedagóxicos dixitais, aproveitando as posibilidades e recursos dispoñibles, para que se converta nun proxecto compartido para os membros da comunidade educativa, que dea coherencia e orientación ó uso das tecnoloxías. Será un instrumento que formará parte do PEC, do Proxecto de Dirección e da Programación Xeral Anual”.
A referencia fundamental para que os centros desenvolvan o seu Plan Dixital, será o Marco Europeo para as Organizacións Educativas Competentes Dixitalmente (DigCompOrg), da Comisión Europea.
O PD será concibido coma un documento vivo, que recollerá os acordos acadados no centro respecto dos seus obxectivos xerais, respecto das estratexias de dinamización e xestión dos recursos tecnolóxicos, e da inclusión das TIC nos diferentes currículos. Supón un compromiso por parte de toda a comunidade educativa, na medida das posibilidades e nivel de formación actual de cada membro.
LOCALIZACIÓN E CONTEXTO HISTÓRICO DO CENTRO.
O centro localízase na rúa Torrecedeira, no núcleo urbano de Vigo, a carón da Escola Universitaria de Enxeñería Técnica Industrial e da Escola de Empresariais.
1930: Inaugúrase o centro coma Escola Elemental do Traballo.
1944: A Escola convértese na Escola de Orientación Profesional e Aprendizaxe.
Ofrece formación de Mestre Industrial, Contramestre, Oficial Mecánico (axustador, torneiro e fresador) e Electricista (montador, instalador e bobinador).
1955: Dítase a Lei de Formación Profesional Industrial.
1968: A Escola convértese na Escola de Mestría Industrial, ofertando titulacións de Mestre Mecánico e Mestre Electricista.
1970: Comeza o desenvolvemento da Formación Profesional, con dous graos: Primeiro grao (FP1), estruturado en dous cursos, e Segundo grao (FP2), estruturado en tres cursos. A Escola muda de novo o seu nome, converténdose nun Centro Nacional de Formación Profesional.
1990: Aprobación da LOXSE e introdución das etapas de ESO e Bacharelato.
2018: Conmemoración dos 50 anos de presenza na localización actual.
CARACTERÍSTICAS PRINCIPAIS DO ALUMNADO.
A procedencia xeral do alumnado depende da etapa educativa. O alumnado da ESO procede da contorna máis próxima, e polo xeral cursou primaria nun centro adscrito ao Politécnico (CEIP Pardo Bazán e CEIP Ramón y Cajal).
O alumnado da Formación Profesional Básica procede dunha contorna máis ampla, abarcando toda a cidade de Vigo.
O alumnado de Bacharelato procede da cidade e comarca.
O alumnado de Formación Profesional, tanto de graos medios coma superiores, procede maiormente de toda a área metropolitana de Vigo.
PRINCIPIOS, VALORES E SINAIS DE IDENTIDADE DO CENTRO.
- Compromiso coa educación, cos valores democráticos, coa equidade, coa loita contra as desigualdades, co ensino público, e a formación como pedra angular do desenvolvemento persoal, e como chave do denominado “ascensor social”.
- Compromiso coa sostibilidade económica (mediante a xestión eficaz e transparente dos recursos), social (mediante a convivencia e a educación en valores), e ambiental (a través do compromiso co respecto ao noso medio).
- Espírito de colaboración e traballo en equipo, co obxectivo de compartir coñecementos, boas prácticas e innovacións, para que tódolos centros se beneficien da aprendizaxe individual, e poidan enriquecela e ampliala, promovendo o intercambio educativo, a mobilidade e a participación en proxectos internacionais.
- Espírito crítico e transformador, fomentando a mellora continua e a innovación.
Segundo a resolución de 3 de setembro de 2021, constitúese no centro un Equipo de Dinamización do Plan Dixital, composto por:
- Un membro do equipo directivo (Xosé Euloxio Santos Leites, Director).
- O responsable da coordinación TIC (Luis Ángel Álvarez Gómez).
- Un membro do profesorado (José Ángel Araújo Iglesias).
Cóntase coa axuda dos mentores ADIX propostos pola Consellería de Educación:
- María Jesús Omil Tilve.
- Juan Luis Iglesias Ferrón.
E empréganse os seguintes recursos principais:
- Aula virtual de apoio: https://www.edu.xunta.gal/centros/plandixital/aulavirtual/
- Informe SELFIE: https://schools-go-digital.jrc.ec.europa.eu/
Etapas do proceso:
- Análise inicial da “competencia dixital do centro”, segundo enquisa anónima realizada a alumnado, profesorado e membros do equipo directivo, empregando a ferramenta de auto-avaliación SELFIE.
- Análise inicial da “competencia dixital docente” do profesorado (CDD), mediante enquisa realizada a través da ferramenta corporativa FPROFE.
- Elaboración da análise DAFO (Debilidades Ameazas Fortalezas Oportunidades), a partir da información obtida nas etapas anteriores, e coa axuda das guías de análise cualitativo e cuantitativo facilitadas polo equipo ADIX.
- Identificación das áreas de competencia dixital susceptibles de mellora, e establecemento dun “Plan de Acción” para lograr esas melloras.
- Redacción do presente Plan Dixital, a partir da información anterior.
