1.1.- Xustificación do Plan Dixital en relación coa normativa vixente
O marco normativo sobre o que se articula este documento é o seguinte:
- Art. 111 bis, Art. 121 e 132 da LO 2/2006, de 3 de maio, de Educación.
- Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrución para o desenvolvemento das ensinanzas de EI, EP, ESO e bacharelato no curso académico 2021/22
- Resolución de 3 de setembro de 2021, da Secretaría Xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-22.
1.2.- Contextualización do PD no centro e contribución ao Proxecto Educativo.
O CDAN Lugo é un centro que iniciou a súa andaina no 2003. Dende entón a actividade cultural e a oferta formativa nas escolas de danza da cidade foi incrementándose notablemente. Dende o centro participamos activamente na vida cultural da contorna a partir do “Plan de actividades culturais e de promoción das ensinanzas”; e esta vese complementada coa programación específica de danza ofertada polo Concello, que conta co Ciclo LED.
Trátase dun centro urbano, que linda co Conservatorio de Música Xoán Montes e a Escola Oficial de Idiomas, cos que comparte recinto escolar e, polo tanto, servizos como o aparcamento, a iluminación, as zonas verdes, etc. O barrio está ubicado no sur de Lugo, moi próximo á zona escolar do centro da cidade, así como tamén ao campus universitario.
O centro atende principalmente á poboación lucense aínda que como centro de referencia en Galicia recibimos alumnado doutras cidades, provincias e incluso comunidades autónomas. A composición do alumnado e das súas familias é diversa como reflicto da contorna social, cultural e económica da súa área de influencia.
O Proxecto Educativo (PE) do CDAN Lugo recolle entre outros aspectos a estratexia dixital do centro, na que se promoverá o uso das Tecnoloxías da Información e a Comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital no centro e nas aulas.
O PE do centro, tal e como recolle o Decreto 223/2010, do 30 de decembro, polo que se establece o Regulamento orgánico dos conservatorios elementais e profesionais de música e de danza da Comunidade Autónoma de Galicia, establece dentro dos órganos de coordinación docente que haberá unha persoa responsable da coordinación das tecnoloxías da información e a comunicación. Este será nomeado pola dirección do centro, por proposta da vicedirección. Ademais, debido ás necesidades específicas do conservatorio este conta con outros dous docentes que desempeñan a función de dinamización TIC, encargados da organización e xestión do fondo audiovisual das representacións do centro.
1.3.- Proceso de elaboración.
O Plan Dixital foi elaborado pola maior parte do equipo docente a partir dun grupo de traballo, no curso 2021/22 e implantouse no 2022/23.
Para a elaboración do documento estableceuse un Equipo de Dinamización do Plan Dixital, constituido por: Cristina Lata Villoch (directora) e Emilio Mesías Farías (coordinador) ao que este curso sumaranse os dous docentes que asumen o rol de dinamización TIC: Ana Belén Ferreiro López e Fabio Valiño San Martín.
Como punto de partida realizouse unha análise da situación do centro no eido das TIC, a través da ferramenta de autoavaliación SELFIE, un Test de Competencia Dixital Docente desenvolta pola Comisión Europea ao abeiro do Marco Europeo para Organizacións Educativas Dixitalmente Competentes (DigCompOrg).
O informe resultante deste test SELFIE, así como tamén a análise do contexto e das distintas partes interesadas do CDAN Lugo serviron de información para a elaboración do DAFO (Debilidades, Ameazas, Fortalezas e Oportunidades).
Toda a información extraída dos pasos anteriores, así como as propostas de mellora plantexadas a finais do pasado curso, serviron para deseñar un Plan de acción, no que se estableceron os obxectivos concretos, vinculados ás distintas áreas, así como tamén os indicadores de medición, a temporalización e as persoas responsables de cada un deles.
O documento definitivo resultante deste proceso incardinarase ao estipulado no PE, contribuíndo á mellora da capacidade dixital do alumnado e do profesorado, tal e como marca un dos obxectivos estratéxicos do centro, recollidos no MD62XES02.
