O C.R.A. “María Zambrano “ e unha agrupación das antigas escolas unitarias de Couso, Fornelos, Marzán, Novás, Paradela (trasladada temporalmente a Eiras por obras) e Pías, situadas en distintas entidades de poboación. Foi constituído como tal o día 7 de setembro de 2000 en un só colexio baixo unha dirección e uns métodos de traballo comúns.
As nosas escolas atópanse incluídas e dispersas no medio rural do Concello de O Rosal (Pontevedra).
O noso centro está constituído por 6 edificios escolares, cun total de oito aulas de Educación Infantil, tres de E. Primaria e unha sede administrativa sita en Pías.
Todas as aulas de infantil e primaria son de escolarización mixta, é dicir, as aulas de infantil contan con alumnos de 3, 4 e 5 anos e as de primaria con alumnado de 1o e 2o curso.
O claustro do centro está formado por un total de 20 mestras/es, dos cales 11 son titores/as, 3 son apoios de educación infantil, 6 mestras/es especialistas (AL, PT, inglés, relixión, psicomotricidade e música) e unha orientadora.
Como persoal non docente contamos cunha coidadora.
A poboación do Concello, formada polas parroquias de Sta. Marina de O Rosal, S. Xoán de Tabagón, S. Bartolomé de Eiras e S. Miguel de Tabagón, está bastante diseminada, ocupando a parte baixa do Val e as beiras do río Miño. É de carácter rural e a ocupación fundamental das súas xentes é a agricultura, con especial dedicación ó viño e ós cultivos de invernadoiros con unha importancia crecente do emprego asalariado.
As características socio-económicas-culturais son dun nivel medio-baixo.
O Plan dixital do CRA María Zambrano é unha ferramenta de planificación integrada no Proxecto Educativo e tamén na PXA e que busca o desenvolvemento do tratamento da información e competencia dixital e a integración das TIC como ferramenta didáctica nos procesos de ensinanza-aprendizaxe.
Para elo é moi necesario analizar as vantaxes e inconvenientes do seu uso dende a perspectiva do proceso de ensinanza e aprendizaxe, de aí que hoxe é moi necesario
dominar as ferramentas básicas nas “novas tecnoloxías”. Partindo de todo isto, para conseguir que a incorporación plena das TIC no centro sirva de maneira decidida para mellorar o proceso E-A, é necesario adoptar unha serie de medidas que van máis alá da dotación de recursos e ten que ir acompañado de políticas de formación do profesorado e da elaboración de materiais, en distintos soportes, para o desenvolvemento ao máximo das potencialidades.
É por elo que este plan vai dirixido a toda nosa Comunidade Educativa: alumnado, familias e mestres/as.
A Competencia Dixital no noso alumnado é semellante entre infantil e 1o-2o de primaria: facendo uso das TIC de maneira manipulativa, para reforzar contidos e actividades traballadas na aula, e na busca, selección e creación de información.
Necesitando sempre unha supervisión ou acompañamento por parte do profesorado e familias.
A Competencia Dixital das familias, a nivel xeral é básica: saben navegar e buscar información, comunicarse por redes sociais,.. Acceden a enlaces para a realización
de entrevistas co profesorado, enviar email para comunicarse co centro... A maioría accede a Internet cos seus dispositivos móbiles. Reciben tamén notificacións do Centro por Abalar. A maioría carecen de estratexias básicas para acompañar aos seus fillos e fillas na nova cultura dixital e posen un descoñecemento de uso seguro e responsable para o desenvolverse na rede.
No aspecto legal tiveronse en conta:
- Artigo 30.1 do DECRETO 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia.
- Artigo 34.1 do DECRETO 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia.
que rezan:
“Os centros docentes deberán incluír dentro do seu proxecto educativo e funcional a súa estratexia dixital a través dun plan dixital de centro, que se concibe como un instrumento para mellorar o desenvolvemento da competencia dixital da comunidade educativa, o uso das tecnoloxías dixitais no proceso de ensino e aprendizaxe e a transformación dos centros en organizacións educativas dixitalmente competentes, e que se concretará anualmente na programación xeral anual a través das correspondentes actuacións”
e desenvoltos nos seguintes artigos no tocante a estrutura do Plan Dixital:
- Artigo 15 da ORDE do 30 de maio de 2023 pola que se desenvolve o Decreto 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia e se regula a avaliación nesa etapa educativa.
- Artigo 14 da ORDE do 26 de maio de 2023 pola que se desenvolve o Decreto 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia e se regula a avaliación nesa etapa educativa.
