Os piares nos que se asenta o noso centro son a mellora da calidade do ensino e a Innovación Educativa apoiándonos na mellora das competencias do alumnado, en especial:
• a Biblioteca escolar como axente dinamizador de aprendizaxes innovadores ,
• un programa específico de Expresión Oral,
• a potenciación da lingua galega
• unha adecuada Educación Emocional,
• e a Educación Mediática e Informacional como medio para acadar un desenvolvemento axeitado das competencias clave.
Neste senso o profesorado ven participando en diferentes cursos e xornadas de formación para a mellora da práctica educativa, co obxectivo final de propiciar cambios metodolóxicos no proceso de ensino aprendizaxe, coa introdución desde os primeiros niveis educativos das tecnoloxías da información como recurso educativo, canle de comunicación e ferramenta para a elaboración de contidos.
O Plan Dixital integrarase no Proxecto Educativo do centro compartindo obxectivos con outros Proxectos de Innovación do centro e desenvolvéndose de xeito interdisciplinar a través da áreas curriculares.
As nosas propostas precisan fortalecerse proporcionando ao alumnado de Educación Infantil e Primaria a competencia, os medios e o Entorno de Virtual de aprendizaxe que contribúan a desenvolver as Orientacións elaboradas pola UNESCO sobre a AMI no seu documento “Alfabetización Mediática e Informacional (2011) e o Marco Común de Competencia Digital Docente(MEC, 2017), relacionados cos cinco parámetros competenciais:
• información e alfabetización informacional,
• comunicación e colaboración,
• creación de contidos dixitais,
• seguridade,
• resolución de problemas.
Con estes vimbios pretendemos artellar o noso proxecto, dando continuidade as propostas que viñamos desenvolvendo no ámbito da alfabetización mediática e a formación da competencia dixital, facendo posibles o éxito escolar cun enfoque metodolóxico que avance en eficacia e innovación.
Pensamos ademais que o proxecto fortalecerá a igualdade de oportunidades e fornecerá o Plan de Igualdade do centro, posibilitando que nenos e nenas adquiran as mesmas competencias tecnolóxicas e dixitais.
Nos últimos cursos o Plan de educación Dixital foi adaptándose aos cambios metodolóxicos introducidos na escola, nos últimos cursos de xeito importante ao incorporarse o centro á rede de centros do Plan LIA 2 de Bibliotecas Escolares, para a Lectura, a educación Informacional e a Aprendizaxe, e coa incorporación ao Proxecto Edixgal no curso 2020-2021.
Con este impulso o centro ampliou os dispositivos tecnolóxicos do centro, dotando de tablets , portátiles, impresora 3D, scornabots e outros medios para o ensino-aprendizaxe. O emprego habitual destes medios nas aulas crea novas necesidades educativas mellorando a oferta educativa do centro, proporcionando un ensino máis acorde co Principio de Igualdade de Oportunidades.
A Lei Orgánica 2/2006, do 3 de maio, de Educación, regula diferentes aspectos relacionados coa competencia dixital e a innovación educativa, así no artigo 121 establece que o proxecto educativo do centro recollerá, entre outros aspectos, a estratexia dixital do centro.
O artigo 111 bis establece que as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas.
O artigo 132 da devandita Lei establece como competencias dos directores e directoras, entre outras, exercer a dirección pedagóxica, promover a innovación educativa e impulsar plans para a consecución dos fins do proxecto educativo do centro; e fomentar a cualificación e formación do equipo docente, así como a investigación, a experimentación e a innovación educativa no centro.
A disposición adicional quinta da Resolución do 17 de xuño de 2021, da Secretaría Xeral de Educación e Formación Profesional (DOG 30 de xuño) dita instrucións para o desenvolvemento das ensinanzas de educación infantil, educación primaria, educación secundaria obrigatoria e bacharelato no curso académico 2021-2022.
A Resolución do 3 de setembro de 2021, da Secretaría xeral de Educación e Formación Profesional, dita instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
Este marco lexislativo adecúase ao Plan de Acción da Educación Dixital (2021-2027), unha iniciativa política da Unión Europea (UE) para apoiar unha adaptación sostible e eficaz dos sistemas de educación e formación dos Estados membros de la UE na era dixital.
