Xustificación
Para a elaboración deste plan partimos do marco lexislativo vixente:
- Os artigos 111 bis, 121 e 132 da LO 2/2006, de 3 de maio, de Educación establecen a promoción do uso das tecnoloxías da información e a comunicación na aula, a obrigatoriedade de recoller a estratexia dixital do centro no proxecto educativo e inciden nas competencias da persoa que ostenta a dirección do centro para o desenvolvemento dos proxectos do centro e o cumprimento da lexislación vixente.
-
Artigo 30.1 do DECRETO 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia.
Artigo 34.1 do DECRETO 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia.
- A Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022, establece as medidas de actuación relativas ao deseño, elaboración e implementación do Plan Dixital para o curso 2021-2022.
Contextualización no centro e contibución ao proxecto educativo
O plan dixital está concibido para mellorar aqueles aspectos nos que se observaron deficiencias e/ou necesidades tras a análise das enquisas realizadas polo profesorado e alumnado do centro e facilitar a actividade docente a nivel dixital. Así mesmo, destacar a importancia de que o centro conte coa infraestrutura necesaria para levar a cabo a actividade cotiá cos recursos multimedia necesarios para desenvolver o proxecto educativo do centro, as programacións de aula e os distintos proxectos de innovación nos que participa. Tamén contribuirá a fomentar a creación de espazos de intercambio de materiais e experiencias educativas e a promover a formación piramidal entre docentes do mesmo nivel e/ou ciclo e do centro en xeral e a autoformación.
O colexio forma parte da rede Abalar dende o curso 2012-2013 e no curso 2014-2015 participou no programa Edixgal. Tras a experiencia dos tres anos de obrigado cumprimento e tras a análise das enquisas realizadas polo profesorado, alumnado e familias para coñecer a súa opinión do programa e valorar a súa continuidade, decidiuse solicitar a baixa en Edixgal polos resultados negativos obtidos e o claro rexeitamento por parte das familias do alumnado e do profesorado.
Actualmente continuamos dentro da rede Abalar pero resulta moi difícil desenvolver o traballo a nivel dixital xa que o equipamento está obsoleto e as avarías e mal funcionamento dos ultraportátiles, sobre todo, limitan e, ás veces, impiden a integración da tecnoloxía nas actividades que conforman a programación de aula. Solicitouse á UAC en numerosas ocasións, por teléfono e por correo electrónico, a renovación do equipamento, pero sen éxito.
No presente curso escolar o centro participa nos seguintes programas de innovación: Programa PLAMBE, Contratos programa (PROA, CPInnova, CPInclúe), Proxecto Abalar, Sección Bilingüe (5º e 6º). Todos estes proxectos precisan dunha infraestrutura e equipamento dixitais axeitados para a súa implementación e contan cos recursos presentes no centro que dan soporte ás súas necesidades.
Ademais destes proxectos de innovación, estanse a implementar outros e actividades de grande interese para o alumnado nos que se precisa o emprego da tecnoloxía ben para desenvolvelos na súa integridade, ben para traballar nalgunha das súas fases a nivel investigación e/ou creación de modelos e formularios. Estes programas son: Proxecto de dinamización da Lingua Galega, Mediación entre Iguais, Patios Dinámicos, Horto Escolar, Proxecto Laboratorio.
De cara á programación anual do curso 2023-2024 prevese iniciar a posta en marcha das accións que figuran no plan de acción do plan dixital para a consecución dos obxectivos propostos valorando ao final de curso o grao de consecución dos mesmos e as propostas para o seguinte curso académico.
Este plan pretende ser un documento onde se recollen as estratexias orientadas a continuar o proceso de mellora da competencia dixital do profesorado e alumnado iniciado co itinerario formativo recollido no Plan TIC e está enmarcado no proxecto educativo de centro e en consonancia co mesmo.
Proceso de elaboración
Para a elaboración do plan dixital creouse, segundo o indicado na Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022, un Equipo de Dinamización do Plan Dixital integrado polas tres persoas que conforman o equipo de dinamización TIC e a directora do centro.
Seguindo as recomendacións do Centro de Formación e Recursos de Vigo, creouse un grupo de traballo composto por todas as persoas que conforman o Equipo de Dinamización do Plan Dixital e a coordinadora foi instada a matricularse no curso da aula virtual da Rede Galega de Educación Dixital (Adix Vigo 3) onde se establecían as distintas fases e tarefas a entregar, ademais de publicarse materiais explicativos e modelos para elaborar este documento.
O equipo contou coa colaboración do mentor asignado ao centro que desenvolveu labores de asesoramento e achegou materiais explicativos e modelos para desenvolver as distintas fases de elaboración do plan.
A análise inicial levouse a cabo tendo en conta os seguintes aspectos:
- Análise resultante das enquisas elaboradas polo profesorado, equipo directivo e alumnado coa ferramenta SELFIE.
- Análise resultante do test de competencia dixital docente elaborado polo profesorado.
- Análise dos resultados do informe DAFO.
- Análise dos recursos e infraestrutura existentes no centro.
- Análise das achegas de mellora recollidas na memoria do curso 2020-2021 do equipo de dinamización TIC.
As persoas integrantes do grupo de traballo asistiron a dúas sesións de formación por videoconferencia onde se presentaron os modelos e exemplos para a elaboración do DAFO e do Plan de Acción.
