O CEIP Xunqueira 2 está situado nas aforas do centro urbano de Pontevedra nunha área chamada “A Xunqueira”, de onde toma o seu nome, na marxe dereita do río Lérez. O centro, sitúase na rúa Alexandre Bóveda S/N. A saída e entrada ao centro realízase pola rúa mencionada anteriormente. Na actualidade o centro conta con cinco unidades de Educación Infantil e once unidades de Educación Primaria. Situado en zona escolar, non se trata dun centro identificado cun barrio definido, nin asociado a un contexto social determinado. Ó estar o colexio tan ben situado, a 10 minutos do centro da cidade, ten moitas posibilidades de asistir a moitas actividades organizadas tanto polo centro como polas propias institucións do Concello. O alumnado deste centro procede de moi diferentes zonas, tanto do centro da cidade como dos arredores ou do medio rural. Está rodeado doutros centros de educativos relacionados con distintas etapas educativas. O nivel de estudos desta poboación é medio-alto. O centro está adscrito ao IES Xunqueira 2 ao que vai destinado o 99% do noso alumnado.
Este Plan dixital intégrase no noso Proxecto Educativo xa que a actualidade así o require. O centro forma parte dun mundo en cambio permanente de unha sociedade e mercado laboral cada vez máis dixitalizado polo que se busca dar resposta a estas novas necesidades e demandas, formando cidadáns do futuro coas competencias necesarias para desenvolverse nunha contorna dixitalizada.
Parte do profesorado está a empregar diversos instrumentos e aplicacións TIC no seu traballo educativo. A páxina web do centro é frecuentemente actualizada con información escolar e sobre actividades de interese para a comunidade. A aula virtual está sendo empregada por parte do profesorado como espazo para achegar contidos, materiais e actividades de traballo para o alumnado. Algúns membros do profesorado elabora materiais propios para a aula virtual e noutras plataformas para o uso directo na aula. Temos blogs de biblioteca e dinamización lingüística. A implantación do proxecto E-Dixgal comprometeu ademais ao centro e ao profesorado na participación de actividades de formación. O uso do correo electrónico para diferentes comunicacións, convocatorias, titorías, etc está totalmente asumido e asentado no traballo diario do profesorado. O profesorado usa tamén as aplicacións de xestión educativa e profesional proporcionadas pola Xunta e Abalar-móbil para comunicar coas familias. É frecuente o uso de diferentes aplicacións, materiais e recursos web nas actividades educativas do centro. Dependendo das necesidades de cada caso, o profesorado emprega recursos multimedia, actividades, aplicacións e contidos en liña, etc.
O Plan Dixital de centro, unha vez aprobado polo Claustro e o Consello escolar será incorporado na PXA do curso 23/24. As accións programadas no presente plan implicarán de forma activa á dirección do centro e profesorado de todos os niveis educativos na procura de acadar os obxectivos marcados no mesmo. O desenvolvemento do plan no vindeiro curso será transversal e integrador e pretende mellorar a competencia e a asunción das ferramentas dixitais como parte do proceso educativo para toda a comunidade escolar incluídas, no posible, as familias.
