Xustificación do Plan Dixital
A Lei Orgánica 2/2006, do 3 de maio, de Educación, regula diferentes aspectos relacionados coa competencia dixital e a innovación educativa, así no artigo 121 establece que o proxecto educativo do centro recollerá, entre outros aspectos, a estratexia dixital do centro, de acordo co establecido no artigo 111 bis, no que se establece que as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas.
O artigo 132 da devandita Lei establece como competencias dos directores e directoras, entre outras, exercer a dirección pedagóxica, promover a innovación educativa e impulsar plans para a consecución dos fins do proxecto educativo do centro; e fomentar a cualificación e formación do equipo docente, así como a investigación, a experimentación e a innovación educativa no centro.
Contextualización do Plan Dixital no centro e contribución ao Proxecto Educativo do Centro
Vilagarcía ten unha posición privilexiada desde moitos puntos de vista. Atópase no fondo da ría de Arousa e na beira norte da comarca do Salnés. Dentro destes espazos, a súa posición estratéxica, no límite das áreas de influencia das rexións urbanas de Pontevedra-Vigo e Santiago, convértea nun punto esencial de referencia para as terras arousás, é o núcleo reitor tanto da ría como da comarca.
A diversificación da estrutura económica está na base da urbanización difusa de todo o espazo, xa que a unha agricultura moi intensiva de viñedo e horta, engádense a pesca e o marisqueo na ría, unha dotación empresarial e industrial notable, sobre todo ao redor das cidades de Ribeira e Vilagarcía, e un papel relevante da actividade turística.
A estrutura socioprofesional da poboación ocupada pon de manifesto como a economía do Salnés posúe as características propias dunha economía integrada nun circuíto moderno de mercado, cun importante sector industrial e terciario que xera unha alta porcentaxe de asalariados/as e traballadores/as por conta allea. Dentro do terciario a maior proporción correspóndese coa rama comercial, seguida da Administración Pública, Defensa e Seguridade Social e do sector da Educación.
Aínda que a pesca e as actividades marisqueiras son moi significativas e xeran importantes recursos, a importancia da industria e dos servizos minimizan o seu impacto económico.
Os equipamentos educativos, culturais e deportivos da cidade non son poucos. Conta con 11 centros de infantil e primaria: Vagalume, A Lomba, Anexo A Lomba, Arealonga, Carril, Escardia, Piñeiriño, Rubiáns, Vilaxoán, Sagrada Familia (privado) e San Francisco (privado). Tamén conta cun centro de educación especial, Princesa Letizia. Catro institutos públicos de educación secundaria e bacharelato: A. Cotarelo Valledor, Fermín Bouza Brey, O Carril, Castro Alobre, e dous colexios privados que tamén imparten ensinanzas de ESO (Sagrada Familia, San Francisco).
Así mesmo existe unha sección delegada da Escola Oficial de Idiomas, conservatorio de Música e unha Escola Municipal de Música. A poboación universitaria do concello acude aos centros distribuídos por todo o territorio galego destacando polo seu número o campus de Santiago de Compostela, seguido polo de Vigo, A Coruña, Pontevedra, Lugo e Ourense.
Os centros educativos formamos parte dun mundo en cambio permanente e dunha sociedade e mercado laboral cada vez máis dixitalizada e por esa razón, os centros educativos deben dar resposta a esas necesidades e demandas da sociedade e o mercado laboral para poder formar cidadáns do futuro coas competencias necesarias para desenvolverse nun entorno dixitalizado.
A nosa traxectoria no ámbito das novas tecnoloxía comeza no ano 2010 cando entramos a formar parte dos centros ABALAR e dende o curso 21-22 EDIXGAL en tódolos niveis da ESO.
O Plan dixital é un recurso clave para a planificación da estratexia dixital do noso centro. O Plan Dixital é o instrumento que adecúa e facilita o uso dos medios dixitais no proceso de ensinanza-aprendizaxe, entendido desde o obxectivo do desenvolvemento pleno e integral do alumnado.
Este plan contribúe a desenvolver a competencia dixital da comunidade educativa, promover a innovación e sacar o máximo partido das tecnoloxías da información e comunicación, e dos recursos educativos dixitais tanto a nivel organizativo de centro coma no proceso de ensinanza-aprendizaxe do alumnado.
O Plan Dixital establece como un dos seus principais eixos a transformación dixital na procura da excelencia, a universalidade e a equidade na educación; que elimina as fendas sociais e territoriais, que incentiva a formación continua e cre no talento, promocionando o emprendemento e a innovación, o reforzo das súas capacidades de investigación e a atracción e fomento da excelencia.
Este plan está concibido coma un documento vivo que contén os acordos alcanzados no centro con respecto aos obxectivos xerais do Plan, as estratexias de dinamización e xestión dos recursos tecnolóxicos e a inclusión das TIC nas diferentes concrecións curriculares. Supón un compromiso por parte de toda a comunidade educativa.
Proceso de elaboración
O Plan Dixital recolle a organización do traballo do centro escolar, recollendo as accións e prioridades que marcarán o plan de traballo do noso centro. Ademais dos coordinadores TIC e Edixgal, a participación do equipo directivo no proceso de deseño e implementación do Plan Dixital é clave, tanto pola visión global que desde a súa responsabilidade poida aportar (na fase de deseño), coma pola capacidade para mobilizar recursos da organización e de xerar liderados distribuídos que permitan o cambio atendendo a principios democráticos (na fase de implementación).
Trala liña PFPP levada a cabo no curso 2022-2023 danse por acadados os obxectivos O03PD e O04PD e pasan a formar parte do protocolo xeral de funcionamento do centro.
